Read Alur Ezekiel 9 Bible Online

Ezekiel 9 - Alur bible

Ezekiel 9

¹Elund ekok i itha ku dwande ma tek, m’ewacu kumae, Wuketh ju m’ugwoko adhura gicor ceng’ni, ku ba dhanu ku ba dhanu ng’atuman ku jambali pare mi nyoth i cinge.

²Man nen, dhanu abusiel ubino m’uai yo dhugang’ ma yo malu, m’ulokre yor ariwa ma malu, ku ba dhanu ku ba dhanu ng’atuman jambali pare mi nek ni i cinge; man ng’atu acel m’i kindgi bedo aronya ku bongu ma nwang’, ku tung mi vino pa jagor i ng’ete. E gimondo, man gicungo ng’et pemblam mi mola.

³Man dwong’ pa Mungu mir Israel uidho malu ku ba kerubi, ka ma naka ebedo i wie, ba riu mi dhugola mi ot: man elwong’o ba ng’atu m’uronjre ku bongu ma nwang’, m’ubedo ku tung mi vino pa jagor i ng’ete.

⁴Man Yehova wacu ire kumae, Kadh ku kind adhura, kud i kind Yerusalem, man iketh ayi wi ter nyim dhanu m’ugamu cwinygi man ma giywak kum ginmajudagu ceke m’utimbre i kinde.

⁵Man ewacu ni jumange i itha kumae, Wucidh ku i adhura i toke, man wugoi: kud wuyi weng’wu weki, kadok ngisi de kud unegwu:

⁶neg dhanu m’uti kot, jalawobi man nyaku ma sumba, ku nyithindho ma thindho man mon; ento kud wubin ceng’ni ng’atu moko ma ayi ni i kume: man wuthek kum kamaleng’ para. E gilund githeko kum dhanu m’uti ma ni i wang’ ode.

⁷Man ewacu igi kumae, Wucid ode, man wupong’ lelagang’ ku ju ma junego: wuwoki. E giwok, man gigoyo i adhurane.

⁸Man etimbre, kinde ma gibegoyo, man an a dong’, nia apodho arieba wang’a, aywak de, man awacu kumae, A Rwoth Yehova! ibinyotho dong Israel ceke ku konjo kwinyo peri woko wi Yerusalemi?

⁹Elund ewacu ira kumae, Kier mi ot mir Israel ku Yuda dit apila, man ng’ombe pong’ ku rimo, adhurane de pong’ ku nyotho pokolembe: kum giwacu kumae, Yehova kuno ng’ombe, man Yehova neno ngo.

¹⁰Man pi an bende, wang’a biweko ngo, kadok ngisi de binega ngo, ento abikelo yo migi i wigi.

¹¹Man, nen, ng’atu m’uronjre ku bongu ma nwang’, m’ubedo ku tung mi vino i ng’ete eloko lembe, ewacu kumae, Atimo calu ing’olo ira.