Read Alur Daniel 1 Bible Online

Daniel 1 - Alur bible

Daniel 1

¹I rundi mir adege mi camuker pa Yehoiakim m’ubimo mi Yuda, Nebukadnezar m’ubimo mi Babeli bino Yerusalem, man etieke kud ali.

²Man Rwoth umio Yehoiakim m’ubimo mi Yuda i cinge, karacelo kud agulu moko mi ot pa Mungu; man eterogi i ng’om mi Cinar ba ot pa mungu pare; e ekelo agulu i ot kanpiny pa mungu pare.

³Man ubimo yero ni Acpanaz ma jego mi judongo pare, ya ekel dhanu moko mi nyithindho mir Israel, ma gi mi kodhi mi ker man mi dhanu ma pigi nuti;

⁴awobi ma poyo mbe i kumgi, ento ma cu, man ma riu i rieko ceke, ma ng’eyong’ec de ni kugi, ma ng’eyo girang’eya de, man wagi dhanu ma copo cungo i odker p’ubimo; man kara eponjgi ponji ku dhu Jukaldayo.

⁵Man ubimo ng’olo igi cemo mi cemo p’ubimo ceng’ ku ceng’, man ni pigulok m’emadhu, man nia jutung’gi rundi adek; kara yo ng’eye gicopo cungo wang’ ubimo.

⁶Nie kind joni gi eni, mi nyithindho pa Yuda, Daniel, ku Hanania, ku Micael, man Azaria.

⁷Man jego mi judongo ecaku nying’gi; pa Daniel ecaku Beltecazar; man pa Hanania ecaku Cadrak; man pa Micael ecaku Mecak; man pa Azaria ecaku Abed-nego.

⁸Ento Daniel ukeco i adundene nia ebicidre gire ku cemo p’ubimo ngo, kadok ku pigulok m’emadhu: ka kumeno ekwayu ba jego mi judongo nia kud ecidre gire.

⁹Nie Mungu ketho Daniel unwang’u bero ku ngisi i wang’ jego mi judongo.

¹⁰E jego mi judongo wacu ni Daniel kumae, Lworo benega kum rwoth para m’ubimo, m’eng’olo cemo mu ku giramadha mu: kum ebineno weng’wu bedo rac ma sagu wang’ awobi wedu nedi? ka kumeno wumaru ketho ubimo thum wia.

¹¹Daniel ulund uwacu ni jagwok piny ma jego mi judongo ketho wi Daniel, ku Hanania man Micael, kud Azaria kumae:

¹²Akwei, ponj jutic peri ceng’ apar; man wek jumi iwa dek wacam, ku pi de wamadhi.

¹³E ka jukojunen wang’wa i weng’i, man wang’ awobi m’ucamu cemo p’ubimo; man calu ineno, itim de ni jutic peri.

¹⁴Ka kumeno ewinjo dwandgi i lembe maeni, man eponjogi ceng’ apar.

¹⁵Man ka ceng’ apar uthum wang’gi nen ber ma sagu, man kumgi cwe ma sagu awobi ceke ma camu cemo p’ubimo.

¹⁶Kum kumeno jakurpiny ukabu cemo migi cen, ku pigulok ma maku gimadhi, man emio igi dek.

¹⁷Nie pir awobi ang’wen maeni, Mungu mio igi ng’eyong’ec ku bodho i ponji ku rieko ceke: man Daniel ubedo ku ng’eyothelembe mi ginmawokiwang’ ku lek de.

¹⁸Man ka ceng’ne thum m’ubimo ng’olo ya juroigi, jego mi judongo kelogi i wang’ Nebukadnezar.

¹⁹Man ubimo giweco kugi; e i kindgi ceke junwang’u jumoko ngo ma calu Daniel, ku Hanania, man Micael kud Azaria: ka kumeno gicungo i wang’ ubimo.

²⁰Man ku ba lembe ceke mi rieko ku ng’eyothelembe, m’ubimo penjo kogi, enwang’u nia gisagu weg ajoga ku juwodhtho ma ni i ker pare ceke wang’ apar.

²¹Man Daniel ubedo cil i rundi ma kwong’ane p’ubimo Kuro.