Read Alur Daniel 12 Bible Online

Daniel 12 - Alur bible

Daniel 12

¹Man i nindo maeca Mikael bicungo, jaditmawijo ma dwong’ m’ucungo kum juthu; man nindo mi masendi bibedo nuti, ma fokuwok ungo ugambre i thekri mi thek cil i nindo nino m’ubino: man i nindo maeca jubibodho juthu, ku ba dhanu ceke ma junwang’u egore i kitabu.

²Man dupa mi ju m’unindo i utur mi ng’om gibiceu, jumoko mi kwo ma rondo ku rondo, man jumoko mi lewic ku cac ma rondo ku rondo.

³Man ju ma gi riek gibirieny calu der mir apokapiny; man ju m’uloko dhanu dupa ba bedopwe ke calu cero rondo ku rondo.

⁴Ento in, E Daniel, cik dhu lembene, man imwon ayi kum kitabu, cil i nindo mi kajikne: dupa biringo kun ku kun, man ng’eyong’ec bimedre.

⁵E an a Daniel, alund aneno, man, nen, ju ario mange cungo, ng’atu acel dhu kulo ma yo kuni, ng’atu mange ke dhu kulo ma yo kuca.

⁶Man ng’atu acel uwacu ni ng’atu m’uronyo bongu ma nwang’, ma ni wi pi mi kulo kumae, Kajik mi musana maeni bibedo rokani?

⁷Man awinjo ng’atu m’uronyo bongu ma nwang’, ma ni wi pi mi kulo, kan eting’o cinge ma yor acwic ku cinge ma yor acam malu i polo, man ekwong’o kwong’ ku ng’atu m’ubedo rondo ku rondo nia ebibedo mi nindo; man nindo moko, ku ng’et nindo; man ka gidaru turo tego mi dhanu ma leng’ nziki nziki, gin maeni ceke bithum.

⁸Man awinjo, ento ang’eyo ngo: alund awacu kumae, E rwoth para, kajik mi gin maeni bibedo ang’o?

⁹Man ewacu kumae, Cidh i yo peri, Daniel; kum lembene juciko dhoge man jumwono ayi i kume cil i nindo mi kajikne.

¹⁰Dhanu dupa gibidwokri leng’, man gibidwokri tar, man jubimulo igi; ento judubo gibitimo dubo; man ng’atu moko mbe ma kind judubo ma bing’eyo thelembe; ento ju ma gi riek gibing’eyo thelembe.

¹¹Man ugambre i nindo ma lam m’awang’a ma thiri thiri bikabre ie woko, man ginmajudagu ma ketho uvuru bicungo, ceng’ bibedo rubanga acel ku dak ario ku pier abung’wen.

¹²Mugisa ni ng’atu m’ukuro, man m’utundo kum ceng’ rubanga acel ku dak adek ku pier adek wi abic.

¹³Ento cidh peri cil i kajikne; kum ibiyom, man ibicungo, i makapiny peri, i kajik mi ceng’.