Read Alur Daniel 4 Bible Online

Daniel 4 - Alur bible

Daniel 4

¹Nebukadnezar m’ubimo, ni kodhidhanu ceke, ku thek ceke, man dhok ceke, m’ubedo i ng’om yu: kwiocwiny umedre iwu.

²Ebedo ber ira ninyutho giranyutha ku musana ma Mungu ma Malu Ngbir utimo i bang’a.

³Giranyutha pare dit mire ma! musana pare tek mire ma! ker pare en e ker mi nja, bimobim pare ugambre kum dhanum’utuk cil kum dhanum’utuk.

⁴An, a Nebukadnezar, abeyom i ot para, man lembe bedo ira miero i odker para.

⁵Aneno lek m’unega ku lworo; man pidoic wi kavuto para ku ginmawokiwang’ mi wia ung’abu cwinya.

⁶Ka kumeno atimo cik kara akel jurieko ceke mi Babeli i bang’a, kara giketh ang’ei the lekne.

⁷E weg jogi, ku juwodhtho, ku Jukaldayo, man jubila, gilund gimondo; e ayero lekne i wang’gi; ento giketho there ng’eire ira ngo.

⁸Ento ma cen Daniel umondo i wang’a, ma nyinge Beltecazar, calku nying’ mungu para, ma tipo mi mungu ma leng’ ni i ie: e ayero lekne i wang’e, awacu kumae,

⁹E Beltecazar, jadit mi weg ajoga, kum ang’eyo nia tipo mi mungu ma leng’ ni ii, man lembamung’a moko mbe ma ng’abu cwinyi, yer ira ginmawokiwang’ mi lek para m’aneno, ku therene de.

¹⁰Ginmawokiwang’ mi wia wi kavuto para ubedo kumae: Aneno, man, nen; yen ucungo i die ng’om; man kadongone dit.

¹¹Yende dongo, man e tek, e kadongone tundo kum polo, man nenne tundo cil i kajik mi ng’om.

¹²Ithe de ber, nyinge de dit, man cemo mi giki ceke ni i ie: yedi m’i thim ginwang’u tipo i there, winyo ma kor polo de gibedo i jange, man kum ceke gicamu i bang’e.

¹³Aneno i ginmawokiwang’ mi wia wi kavuto para, man, nen, jakur acel ku ng’atu ma leng’ acel uloro piny kud i polo.

¹⁴Ekok ma tek, man ewacu kumae, Ng’ol yende piny, lwer ithe de woko, man keth nyinge woko: dong’ yedi ai woko kud i there, man winyo kud i jange.

¹⁵Ento wek dund ulage i ng’om, ku gwang’ mi nyunyu man mola, i lum ma lep lep m’i thim; man wek kume bed ng’ic ku thoi m’i polo: man wek maka pare bed karacelo ku yedi m’i ng’om:

¹⁶wek adundene lokre tung’ kud adunde dhanu, man wek adunde yedi mire ire; man wek nindo abiro kadh i wie.

¹⁷Lembapoka en e ni kum cik mi jukur, man lembakwaya en e ni kum lembe mi ju ma leng’; kara ju m’ubedo kwo ging’ei nia Ng’atu ma Malu Ngbir ubimo i ker mi dhanu, man emie ni ng’atu ma tek eyenyo, man eketho i wie ng’atu ma kite mbe i kind dhanu.

¹⁸Lek maeni, an a ubimo ma Nebukadnezar, aneno; man in, E Beltecazar cu there, kum jurieko ceke mi ker para gicopo ketho ang’ei there ngo; ento icopo; kum tipo mi mungu ma leng’ ni ii.

¹⁹Daniel ma nyinge Beltecazar, dhoge tal nyangba, man pidoic pare ng’abu cwinye. Ubimo loko lembe man ewacu kumae, Beltecazar, kud iwek lek, kadi ewothere de, ung’ab cwinyi. Beltecazar uloko lembe man ewacu kumae, Rwoth para, lekne bed ni ju m’udegi, ewothere de ni jusendni.

²⁰Yen m’ineno, m’udongo, m’ctek de, ma kadongone tundo kum polo, ma nenne tundo kum ng’om yu;

²¹ma ithe de ber, nyinge de dit, man cemo ma ni dhanu ceke ni i ie; ma yedi m’i thim gibedo i there, man ma winyo m’i polo de kabedo migi ni wi jange:

²²en e in, E ubimo, m’idongo idoko tek de; kum dwong’ peri dongo, man etundo cil i polo, man bim peri tundo i kajik mi ng’om.

²³Man kan ubimo neno jakur ku ng’atu ma leng’ m’uloro kud i polo, man uwacu kumae, Wung’ol yende piny, man wunyothe; ento wuwek dund ulage i ng’om, karacelo ku gwang’ mi nyunyu mi mola de, i lum ma lep lep m’i thim, man wek kume bed ng’ic ku thoi m’i polo; man wek makapiny pare bed karacelo ku yedi m’i thim, maram nindo abiro kadh ko i wie;

²⁴maeni en e there, E ubimo, man en e cik pa Ng’atu ma Malu Ngbir, m’uwok kum rwoth para m’ubimo:

²⁵nia jubi riemi woko ku kind dhanu, e kabedo peri bibedo karacelo ku yedi m’i thim, man jubiketho icamu lum calu koni dhiang’, man kumi bibedo ng’ic ku thoi m’i polo, e nindo abiro bikadhu i wii; maram ibing’eyo ko nia Ng’atu ma Malu Ngbir ubimo i ker mi dhanu, man emie ni ng’atu ma tek eyenyo.

²⁶Man kum ging’olo nia juwek dund ulag yen; ker peri bibedo giri kokoro, yo ng’ei m’ing’eyo nia polo bimo.

²⁷Kum kumeno, E Ubimo, wek lembapora para yire iri, man ijig dubo peri ku tic mi bedopwe, kier peri de ku nyutho kisa ni jucan; kuno nyo bedoyo peri bimedre.

²⁸Gin maeni ceke wok kum ubimo Nebukadnezar.

²⁹Ka dwi apar wi ario thum ebewotho i odker mi Babeli.

³⁰Ubimo yero man ewacu kumae, Maeni Babeli ma dit ungo, m’agomo pi kabedo mi ker, ku tego mi tek para man ni yung mi dwong’ para?

³¹Kinde ma lembe ni i dhu ubimo, dwal upodho kud i polo, uwacu kumae, E ubimo Nebukadnezar, eyere iri kumae: Ker uai kud i beng’i:

³²man jubiriemi ku kind dhanu; man kabedo peri bibedo karacelo ku yedi m’i thim; jubiketho icamu lum calu koni dhiang’; e nindo abiro bikadhu i wii; maram ing’eyo ko nia Ng’atu ma Malu Ngbir ubimo i ker mi dhanu, man emie ni ng’atu ma tek eyenyo.

³³I saa nica gin maeno timbre kum Nebukadnezar: e jurieme woko ku kind dhanu, man ecamu lum calu koni dhiang’, man kume bedo ng’ic ku thoi m’i polo, maram yukwie wobo ko calu yuk acur, man wi lwete calu wi lwet winyo.

³⁴Man ka ceng’ maeno thum, an a Nebukadnezar, ang’ayu wang’a malu i polo, man ng’eyothelembe para dwogo i bang’a, man amio mugisa ni Ng’atu ma Malu Ngbir, e apake man ayunge m’ebedo rondo ku rondo; kum bim pare en e bim mi nja, man ker pare gambre kum dhanum’utuk cil kum dhanum’utuk;

³⁵man dhanu ceke m’ubedo wi ng’om jukwanugi calu gin moko ngo; man etimo calu ie yenyo i udul m’i polo, man kind ju m’ubedo i ng’om; man ng’atu moko mbe ma copo cero cinge, kadi ma wacu ire kumae, Itimo ang’o?

³⁶I nindo maeca ng’eyothlembe para dwogo i bang’a; man pi dwong’ mi ker para, yung para ku rieny de dwogo i bang’a; man juporlembe para ku judongo para giyenyo i bang’a; e abedo tek i ker para, man dwong’ ma dit umedre ira.

³⁷Kawono, an a Nebukadnezar, apaku man afoyo man ayungo Ubimo m’i polo; kum tic pare ceke en e andha, man yo pare pwe; e ju m’uwotho ku kuhaya ecopo jwigo.