Read Alur Daniel 5 Bible Online

Daniel 5 - Alur bible

Daniel 5

¹Belcazar m’ubimo timo agba ma dit ni judongo pare rubanga, man emadhu pigulok i wang’ rubangane.

²Ka Belcazar ubilo pigulok, eng’olo ya jukel agulu mi mola ma kwar ku mola ma tar ma Nebukadnezar ma won uyaku i hekalu ma ni i Yerusalem; kara ubimo ku judongo pare, ku mon pare man mon pare m’araga, gimadh i ie.

³Gilund gikelo agulu mi mola ma kwar ma juyaku i hekalu mi ot pa Mungu ma ni i Yerusalem; e ubimo ku judongo pare ku monde man monde m’araga, gimadhu kud i igi.

⁴Gimadhu pigulok, man gipaku mungu mi mola ma kwar, ku mi mola ma tar, ku mi mola, man mi nyunyu, ku mi yen, man mi kidi.

⁵I saa nica lwet cing’ dhanu wok, man egoro yo kum thethala wi uza mi korot mi odker p’ubimo: man ubimo neno dund cing’ m’ugoro.

⁶Wang’ ubimo lund ulokre i ie, man pidoic pare ng’abre; man ujonj piere lokni, man conge goire ku wadi.

⁷Ubimo kok ma tek ya jukel juwodhtho, ku Jukaldayo, man jubila. Ubimo yero man ewacu ni jurieko mi Babeli kumae, Ng’atu ma tek bisomo lembagora maeni, man eewo ira there de, ebironjre kud uluga, man ebibedo ku thondh mola ma kwar i ng’ute, man ebibedo jabim mir adege i ker.

⁸Jurieko p’ubimo ceke gilund gimondo; ento gicopo somo lembagorane ngo, kadi gicopo ketho ubimo ng’ei there de ngo.

⁹Ubimo Belcazar cwinye lund ung’abre dit, man wang’e lokre i ie, man judongo pare igi pido.

¹⁰Nie min ubimo mondo i ot cemo ni kum lembe p’ubimo ku judongo pare: min ubimo yero man ewacu kumae, E ubimo, bed rondo ku rondo; kud iyi pidoii ng’abre, man kud iyi weng’i lokre.

¹¹Ng’atu moko nuti i ker peri, ma tipo mi mungu ma leng’ ni i ie; man i nindo pa wuru der ku ng’eyothelembe ku rieko, calu rieko mi mungu, unwangre i ie; man ubimo ma Nebukadnezar ma wuru, ubimo, awacu, ma wuru, ekethe ni jadit mi weg ajoga, ku juwodhtho, ku Jukaldayo, man jubila;

¹²kum tipo ma ber hai, ku ng’eyong’ec, ku ng’eyothelembe, ku ewo the lek, ku nyutho lembe ma tek, ku daru lembe ma jiji, unwangre i Daniel maeni, m’ubimo caku nyinge Beltecazar. Nie wek julwong’ Daniel, e ebiewo there.

¹³Julund jukelo Daniel i wang’ ubimo. Ubimo yero man ewacu ni Daniel kumae, In i Daniel maeno, mi nyithindho mi ng’eca m’uai i Yuda, ma ubimo ma vwa kelo kud i Yuda?

¹⁴Awinjo piri, nia tipo mi mungu ni ii, man nia der ku ng’eyothelembe man rieko ma ber hai unwangre ii.

¹⁵Nie jurieko, ku juwodhtho, juroyogi i wang’a, kara gisom lembagora maeni, man giketh ang’ei there de; ento gicopo ewo the ginduni ngo.

¹⁶Ento awinjo piri, nia icopo ewo there, ku daru lembe ma jiji: nie tek icopo somo lembagorane, man iketho ang’ei there de, ibironjri kud uluga, man ibibedo ku thondh mola ma kwar i ng’uti, man ibibedo jabim mir adege i ker.

¹⁷Daniel ulund uloko lembe man ewacu i wang’ ubimo kumae, Wek giramia peri bed iri giri, man imi sukulia peri ni ng’atu mange; ento abisomo lembagora maeno ni ubimo, man abiketho eng’eyo there.

¹⁸E in ubimo, Mungu ma Malu Ngbir umio ker ni Nebukadnezar ma wuru man yung ku lonyo man dwong’;

¹⁹man kum yung m’emio ire, kodhidhanu ceke, ku thek, man dhok, kumgi miel lworo de negogi i wang’e: m’eyenyo eneggi enego, m’eyenyo ewek ubed kwo eweko bedo kwo; ng’atu m’eyenyo edode edode, man ng’atu m’eyenyo ejwige ejwige.

²⁰Ento kan adundene tingre malu, man cwinye doko tek ketho etimo ku kuhaya, jukabe ku wi komker mir ubimo, man jukabu dwong’ i bang’e:

²¹man jurieme ku kind wot dhanu, man judwoko adundene calu mi lim, man kabedo pare ni karacelo ku kana m’i thim; juketho ecamu lum pami koni dhiang’, kume de ng’ic ku thoi m’i polo; maram eng’eyo ko nia Mungu ma Malu Ngbir ubimo i ker mi dhanu, man nia eketho malu i wie ng’atu ma tek eyenyo.

²²Man in i wode, E Belcazar, ijwigo adundeni ngo, kadok ing’eyo maeni ceke,

²³ento itingri giri kum Rwoth m’i polo; man gikelo agulu mi ot pare i weng’i, man in ku judongo peri, ku mon peri, man mon peri m’araga, gimadhu pigulok kud i igi; man ipaku mungu mi mola ma tar ku mola ma kwar, man mi mola, mi nyunyu, mi yen, man mi kidi, ma neno piny ungo, ma winjo de ngo, ma ng’eyo de ngo: man Mungu ma yuyo peri ni i cinge, man yo peri ceke pare, iyunge ngo.

²⁴E dund cing’ julund juoro kud i wang’e, man lembagora maeni jugoro.

²⁵E maeni lembagora ma jugoro: MENE, MENE, TEKEL, UFARSIN.

²⁶Maeni thelembe mi ginduno: MENE; Mungu kwanu wel ker peri, man ejige.

²⁷TEKEL; jupori i mukero, man junwang’u irem.

²⁸PERES; ker peri pokre, man jumie ni Jumedi ku Juajemi.

²⁹Belcazar ulund ung’olo, man juronyo Daniel ku kendi m’uluga, man juketho nyoro mi mola ma kwar i ng’ute, man etimo lembang’ola pire, nia ebibedo jabim mir adege i ker.

³⁰I diewor nica junego Belcazar m’ubimo mi Jukaldayo.

³¹Man Dario ma Jamedi ugamu ker, ma rundi pare calu pier abusiel wi ario.