Read Alur Hoseya 12 Bible Online

Hoseya 12 - Alur bible

Hoseya 12

¹Efraim ukakre ku yamu, man elubo tok yamu ma yo nyangu: emedo ndra ku nyoth thiri thiri; man gitimo lembariba kud Ascur, man gitero mo i Misiri.

²Yehova bedo ku piem bende ku Yuda, man ebisendo Yakobo calku yo pare; e ebiculo ire calku giratima pare.

³Emaku ufunytiend umin kud i ic; e i awobi pare ebedo ku tego ku Mungu;

⁴eyo, ebedo ku tego wi malaika, man esagu; eywak, man epaku dhoge ire: enwang’e i Beth-el, man waweco wakude kuca,

⁵en e Yehova, Mungu mir udul; Yehova en e nyinge mi poi.

⁶Ka kumeno lokri ba Mungu peri: gwok kisa ku lembapoka, man ikur Mungu peri thiri thiri.

⁷En e jakuloka, mukero mir abombi ni i cinge: epiaru dimo wijo.

⁸Man Efraim uwacu kumae, Andha alony, anwang’u jupiny ira: i tic mi muli para ceke gibinwang’u kier moko ngo i ia ma en e dubo.

⁹Ento an a Yehova Mungu peri ugambre kud i ng’om Misiri, abiketho wubedo i hema kendo calu i ceng’ mir agba mi rwo.

¹⁰Ayero ni jubila bende, man amedo ginmawokiwang’; man ku cing’ jubila atimo lembabola.

¹¹Gilead en e kieri? gi gin mi ndra kende; i Gilgal gilamu thwoni dhiang’; eyo, pemblam migi calu udhuru mi thuthu mi podho.

¹²Man Yakobo ringo i podho mir Aram, man Israel utimo pi dhaku, man pi dhaku ekwayu rombe.

¹³Man Yehova wodho Israel ku i Misiri ni kum jabila, man ebedo agwoka ni kum jabila.

¹⁴Efraim unyayu ng’ecwiny m’akeca: ka kumeno jubiweko rimbe i wie, man Rwoth pare bidwoko cac pare i wie.