Read Alur Hoseya 2 Bible Online

Hoseya 2 - Alur bible

Hoseya 2

¹Wuwac ni utumegwu kumae, Ami;[4] man ni nyimegwu kumae, Ruhama.[5]

²Wuii ku megwu, wuii; kum en e dhaku para ngo, kadok an de an a cware ngo; man wek ecor asara pare cen kud i wang’e, man dubri swa pare ku kind thuno pare;

³amaru wodho kendi pare, man akethe calu i ceng’ ma junyole i ie, man adwoke calu langa, man akethe calu ng’om m’uthwo, anege de ku rieupi.

⁴Eyo, kisa binega ngo kum nyithindho pare; kum gi nyithindho mir asara;

⁵kum meggi timo asara, en m’egamu ic migi etimo ku lewic; kum ewacu kumae, Abicidho tok jumer para, m’umio ira kwen para ku pi para, yukrombe para man atutu para, mo para ku giramadha para.

⁶Ka kumeno, nen, abijigo yo peri kud ukudho, man abigoyo gang’ i kume, kara kud enwang’ yo pare.

⁷Man ebilubo tok ju m’umare, ento ebirubogi ngo; ebiyenyogi, ento ebinwang’ugi ngo: ebilund wacu kumae, Abicidho man abidok ba cwara ma kwong’a; kum naka e ber ira ma sagu kawono.

⁸Kum eng’eyo ngo nia amio ire cam, man pigulok ma nyasa, ku mo, man amedo ire mola ma tar ku mola ma kwar, ma gitimo ko ni Bal.

⁹Ka kumeno abigamu cam para kendo i nindone, man pigulok ma nyasa para i nindone, man abikabu yukrombe para kud atutu para ma maku uum muneru pare.

¹⁰Kawono abiyabu wi lewic pare i wang’ jumer pare, man ng’atu moko mbe ma bibodhe kud i cinga.

¹¹Abiketho mutoro pare ceke bende jik, kud agba pare, ceng’ dwi pare ma por, man ceng’ sabatu pare, ku cokri pare ceke mi rwo.

¹²Man abinyotho ulok pare ku yendubolo pare, m’ewacu pire kumae, Maeni sukulia para ma jumer para gimio ira; man abidwokogi ni luli, e yedi m’i thim bicamugi.

¹³Man abiliewo ceng’ pa Balim i wie, m’ewang’u udok ma ng’wice ng’ar ire, kinde m’erukre gire ku gwilo pare m’i ith man jambruko pare, man ecidho tok jumer pare, man wie wil i kuma, Yehova wacu.

¹⁴Ka kumeno, nen, abibidhe, man abikele i langa, man abiyero lembjuk ire.

¹⁵E abimio ire podho mir ulok pare ku kuca, man poga mir Akor ni dhugola mi genogen; man ebidwoko lembe ku kuca, calu i nindo mir aradu pare, man calu i nindo m’eidho ie kud i ng’om Misiri.

¹⁶Man ebibedo i ceng’ maeca, Yehova wacu, nia ibilwong’a Ici, man ibilwong’a Balif kendo ngo.

¹⁷Kum abikabu nying’ Balim woko kud i dhoge, man jubilwong’ogi kendo ngo ku nying’gi.

¹⁸Man i ceng’ maeca abitimo lembariba igi ku yedi m’i thim, man ku winyo m’i polo, man ku gin ma lak i ng’om: man abituro atum ku palamularu ku lwiny kud i ng’om, man abiketho givuto piny museme.

¹⁹E abigemi ira mi nja; eyo, abigemi ira i bedopwe, man i pokolembe, man i mer mi bero, man i kisa.

²⁰Abigemi ira cil i bedo mandha; man ibing’eyo Yehova.

²¹Man ebitimbre i ceng’ maeca, abiloko lembe, Yehova wacu, abiloko lembe ni polo, e gibiloko lembe ni ng’om;

²²man ng’om biloko lembe ni cam, ku pigulok ma nyasa, ku mo; e gibiloko lembe ni Yezrel.

²³Man abicoye ira i ng’om; man kisa binega kum dhaku ma fodi unwang’u kisa ngo; man abiwacu ni ju ma naka gi dhanu para ngo kumae, In i dhanu para; man gibiwacu kumae, In i Mungu para.