Read Alur Hoseya 4 Bible Online

Hoseya 4 - Alur bible

Hoseya 4

¹Wuwinj lembe pa Yehova, wu nyithindho mir Israel; kum Yehova bedo ku piem ku dhanu m’i ng’om, kum lemandha mbe i ng’om, kadi bero, kadi ng’eyong’ec pa Mungu.

²Gin moko mbe ndhu kwong’ ma kadhukuwilembe, ku negonek, man kwalukwo, ku dubriswa; gimojo rop, man rimo mulo rimo.

³Ka kumeno ng’om biywak man ku ba dhanu ceke m’ubedo i ie bibedo ng’ic, karacelo ku yedi m’i thim ku winyo ma kor polo; eyo, rec m’i nam bende bikabre woko.

⁴Ento ng’atu moko kud ujai, kadok ng’atu moko de kud ujuki; kum dhanu peri gi calu ju m’ujai ni jalam.

⁵Man ibikier ku dieceng’, man jabila bende bikier karacelo kudi ku diewor; man abinyotho meru.

⁶Dhanu para ginyothri kum ng’eyong’ec m’urem: kum ikwero ng’eyong’ec, an bende abikweri, kara kud ibed jalam ira: kum wii wil kum cik pa Mungu peri, an bende wia biwil kum nyithindho peri.

⁷Calu gimedri, e gidubo ira kumeno; abidwoko dwong’ migi ni lewic.

⁸Gikakri ku dubo mi dhanu para, man giketho adundegi kum kier migi.

⁹Man ebibedo, nia calu dhanu bedo, jalam bibedo kumeca; man abisendogi kum yo migi, man abiculo igi wang’ tic migi.

¹⁰E gibicamu, man gibiyeng’ ungo; man gibitimo tarwang’, e gibinyai ungo; kum giweko ketho cwinygi kum Yehova.

¹¹Asara ku pigulok ku pigulok ma nyasa kabu ng’eyothelembe.

¹²Dhanu para gipenjo lembapora ba dundyen migi, man uluth migi yero igi; kum tipo mir asara ketho gikier, e gitimo tarwang’, ma giai ko ku the cing’ Mungu migi.

¹³Gilamu lam wi bith gudi, man giwang’u udok ma ng’wice ng’ar wi ungulu gudi, the bongu ku kalafuru ma tar kud ulam, kum tipone ber: ka kumeno nyigwu timo tarwang’, man mugole mu dubri swa.

¹⁴Abisendo nyigwu ngo kinde ma gitimo asara, kadi mugole mu kinde ma gidubri swa; kum co gigi gicidho cen ku weg tarwang’, man gilamu lam karacelo ku weg asara; e jubing’ielo dhanu ma ng’eyothelembe mbe kugi.

¹⁵Kadok in, Israel, itimo tarwang’, ento Yuda kud ukier; man kud wubin i Gilgal, kadok kud wuidh Beth-aven, kadi kud wukwong’ kwong’ kumae, Calu Yehova bedo kwo.

¹⁶Kum Israel utimbre gire ku co, calu rwaya ma jaco: kawono Yehova bikakugi calu nyathi rombo i ka ma lac.

¹⁷Efraim umoko kum mungu m’araga; weke e kende.

¹⁸Giramadha migi doko wac; gitimo tarwang’ thiri thiri; jubim pare maru lewic dit.

¹⁹Yamu wire i bombe; e jubiketho lewic umakugi kum lam migi.