Read Alur Hoseya 5 Bible Online

Hoseya 5 - Alur bible

Hoseya 5

¹Wuwinj maeni, E wu julam, man wuwinji, E ot mir Israel, man wucik ithwu, E ot p’ubimo; kum lembapoka ni i kumi; kum wubedo ni uwic i Mizpa, man ni voi m’apedha wi Tabor.

²Man ju m’ucamu co giloro piny i nyoth; ento an a jajuk igi ceke.

³Ang’eyo Efraim, man Israel upandre ira ngo; kum kawono, E Efraim, itimo asara, Israel ucidre.

⁴Giratima migi yio igi ngo nia gilokri ba Mungu migi; kum tipo mir asara ni yor i igi, man ging’eyo Yehova ngo.

⁵E kuhaya mir Israel utuco i wang’e: ka kumeno Israel kud Efraim bikier i dubo migi; Yuda bende bikier gikugi.

⁶Gibicidho kud udul rombe migi man dhok migi niyenyo Yehova; ento gibinwang’e ngo: ekoc kugi.

⁷Gitimo kud awondi kum Yehova; kum ginyolo nyithindho ma juwirok: kumeno dwi m’upor bicamugi ku pothi migi.

⁸Wukudh agwara i Gibeya, man agwara i Rama: wugoi nduru i Beth-aven; i ng’ei, E Benyamin.

⁹Efraim bidoko ni uvuru i ceng’ mi juk: i kind suru mir Israel aketho jung’eyo gin ma bibedo nuti andha.

¹⁰Judongomawijo mi Yuda gi calu ju m’ukabu giranyutha mi kieu: abikonjo kwinyo para i wigi calu pi.

¹¹Cwiny Efraim ung’abre, man juture ku lembapoka; kum eyio wotho tok lembang’ola mi dhanu.

¹²Ka kumeno abedo ni Efraim calu abirbir, man ni ot pa Yuda calu top.

¹³Kinde ma Efraim uneno tho pare, man Yuda neno lero pare, Efraim ulund ucidho i Ascur, man eoro kwenda bang’ ubimo Yareb: ento ecopo keyo kumwu ngo, kadok lero mu de ebicangu ngo.

¹⁴Kum abibedo ni Efraim calu umvor, man calu nyathin umvor ni ot mi Yuda: an, ndhu, an, abiyeco man abicidho cen; abitero cen, man ng’atu moko mbe ma bibodho.

¹⁵Abicidho man abidok i kakara, maram gituco ko piem migi, man giyeny wang’a: gibiyenya kud amora i can migi.