Read Alur Hoseya 8 Bible Online

Hoseya 8 - Alur bible

Hoseya 8

¹Keth agwara i dhogi. Calu acur ebino kum ot pa Yehova, kum gituro lembariba para, man gidubo kum cik para.

²Gibiywak i bang’a kumae, Mungu para, wan Israel wang’ei.

³Israel uwanyu gin ma ber woko: jadegi biriemo toke.

⁴Giting’o ubimo malu, ento ku lembe para ngo: giketho judongomawijo, man ang’eyo ngo: gitimo mungu m’araga ku mola ma tar man mola ma kwar migi, kara jukabgi woko.

⁵Ebayu nyathi dhiang’ peri woko, E Samaria; ng’ecwiny para opo i kumgi; ebibedo rokani ma fodi gikutundo ngo kum bedo ma leng’i?

⁶Kum cil maeni ai bang’ Israel; jabodho time en, man en e Mungu ngo; eyo, nyathi dhiang’ mi Samaria jubituro nziki nziki.

⁷Kum gicoyo yamu, man gibikayu vira: ebedo ku cam ma wi tiende ngo; twine biwodho mogo ngo; tek ecego, juwirok bimwonye.

⁸Jumwonyo Israel: kawono gini i kind thek calu combo ma nyayu mutoro i ng’atu moko ngo,

⁹Kum giidho malu bang’ Ascur, calu kana m’i thim e kende gire: Efraim ulonyo jumer.

¹⁰Eyo, kadok gilonyo i kind thek, kawono abicokogi; man gimaku jwik ni kum ter p’ubimo mi judongomawijo.

¹¹Kum Efraim umedo pemblam pi dubo, pemblam ubedo ire pi dubo.

¹²Agoro ire gin mi cik para rubanga apar; ento jukwanugi calu gin mi juwirok.

¹³Pi girathiera mi lam para, gilamu ring’o man gicame; ento Yehova jologi ngo: kawono ebipoi kum dubo migi, man ebiliewo dubo migi; gibidwogo i Misiri.

¹⁴Kum Israel wie wil kum Jacwicne, man egomo udi ma dwong’; man Yuda medo adhura ma tek; ento abioro mac wi adhura pare, man ebiwang’u udi ma tekne.