Read Alur Hoseya 9 Bible Online

Hoseya 9 - Alur bible

Hoseya 9

¹Anyong’a kud unegi, E Israel, ni mutoro, calu kodhidhanu; kum itimo tarwang’, m’iweko ko Mungu peri; imaru sukulia wi lelacam kubang’e kubang’e.

²Lela mi fodo cam ku pany mir ulok bikakugi ku cam ungo, man pigulok ma nyasa birem ire.

³Gibibedo i ng’om pa Yehova ngo; ento Efraim bidok i Misiri, man gibicamu cemo m’ucido i Ascur.

⁴Gibikonjo lam mi pigulok ungo ni Yehova, kadok mutoro de binyai i ie ngo ni kumgi: lam migi bibedo igi calu kwen mi juywak; dhanu ceke m’ucamu kume gibicido; kum kwen migi bibedo ni kec migi; ebimondo i ot pa Yehova ngo.

⁵Wubitimo ang’o i ceng’ mi cokri mi rwo, man i ceng’ mir agba pa Yehova?

⁶Kum, nen, giai woko ku ba nyoth; ento Misiri bicokogi, Memfis biyikogi; piny migi ma ber mi mola ma tar, ayilayila bimwonyogi; ukudho bibedo i hema migi.

⁷Ceng’ mi lieu wok; Israel bing’eyo maeni: jabila en e jakasegu, ng’atu ma won tipo en e abelu, kum sagri mi dubo peri, man kum adegi dit.

⁸Efraim en e jakur karacelo ku Mungu para: pi jabila, uwic pa jamak winyo ni i yo pare ceke, man adegi i ot pa Mungu pare.

⁹Ginyothri gigi hai, calu i ceng’ mi Gibeya: ebipoi kum dubo migi, ebiliewo dubo migi.

¹⁰Anwang’u Israel calu nyingulok i langa; aneno kwaruwu calu nyingyen ma kwong’a i kind yendubolo i nindo pare ma kwong’a: ento gibino ba Bal-peor, man githieri gigi ni gin mi lewic, e gidoko ni ginmajudagu calu gin ma gimaru.

¹¹Pi Efraim, dwong’ migi biringo calu winyo: nyol bibedo mbe, man bedo ku ic de bibedo mbe, man gamu ic de bibedo mbe.

¹²Kadok gitungo nyithindhgi, ento abimayugi, ketho nia ng’atu moko mbe ma bidong’; eyo, can i wigi bende kinde m’awekogi!

¹³Efraim, calu aneno Turo, jupidhe i ka ma ber: ento Efraim juwodho nyithindhe woko ni janek.

¹⁴Mi igi, E Yehova, ibimio ang’o? mi igi ic ma dubre ku thuno ma dwono.

¹⁵Dubo migi ceke ni i Gilgal; kum adagugi keca: kum dubo mi tic migi abiriemogi woko kud i ot para; abimarugi kendo ngo; judongomawijo migi ceke gi juco.

¹⁶Jugoyo Efraim, ulaggi thwo, gibicego nying’gi moko ngo: eyo, kadok gicego, ento abinego nying ic migi mi mer.

¹⁷Mungu para bibayugi woko, kum giciko ithgi i bang’e ngo; e gibibedo juwoth i kind thek.