Read Alur Yoel 1 Bible Online

Yoel 1 - Alur bible

Yoel 1

¹Lembe pa Yehova m’ubino ba Yoel ma wod Pethuel.

²Wuwinj maeni, wu dhanu m’uti, man wucik ithwu, wun ceke ma wubedo i ng’om. Maeni bedo i nindo mu, kadi i nindo pa kwaruwu?

³Wuyer pire ni nyithindho mu, man wek nyithindho mu giyer ni nyithindho migi, man nyithindho migi giyer ni dhanum’utuk mange.

⁴Maeno m’udong’ ma nyathi bonyo camu ngo bonyo camu; man maeno ma bonyo weko kukun ucamu; man maeno ma kukun uweko nyathin abirbir ucamu.

⁵Wuceu, wun andrej giramadha, man wuywaki; wugoi nduru de, wu jumadh pigulok ceke, ni kum pigulok ma lim lim; kum ethumbre woko kud i dhogwu.

⁶Kum thek uidho wi ng’om para, ma tek, man ma welne mbe; lake en e lak umvor, man lake m’i lwokni en e pa min umvor.

⁷Enyotho ulok para, man ealu apoka yendubolo para: edwoke temble, man ebaye woko; jangene judwoko tar.

⁸Wuywak calu nyaku m’ukendo usuba eywagu ko cware mir ayada pare.

⁹Girathiera mi mogo ku girathiera m’amadha githumbri woko kud i ot pa Yehova; julam, jutic pa Yehova, giywak.

¹⁰Podho nyothre, ng’om de ywak; kum cam unyothre, pigulok ma nyen udwono, man mo jik.

¹¹Cwinywu ng’abre, E wu jutipodho, wugoi nduru, E wu jugwok ulok, pi nganu man pi cam; kum mwoka mi podho nyothre.

¹²Ulok de tal, man yendubolo voc; yendulemo, thith bende, man yenduru, en e yen ceke m’i podho giner: kum mutoro jung’ kud i wot dhanu.

¹³Wutwi usuba i pierwu, man wuywaki, wu julam; wugoi nduru, wu jutim mi pemblam; wubin, wuvut diewor soro i usuba, wu jutic pa Mungu para: kum girathiera mi mogo ku girathiera m’amadha jucero ni ot pa Mungu mu.

¹⁴Wudwok wekocam leng’, wulwong’ cokri mi rwo, wucok dhanu m’uti ku dhanu ceke m’ubedo i ng’om ba ot pa Yehova Mungu mu, man wulwong’ Yehova.

¹⁵Aka cenge! kum ceng’ pa Yehova ni ceng’ni, man calu nyoth ma ai ba Jategokpo ebibino.

¹⁶Cemo thumbre woko kud i wang’wa ngo, eyo, mutoro kud anyong’a kud i ot pa Mungu mwa?

¹⁷Kodhi top kud i thunglu ng’om; dero udong’ ni uvuru, kacokcam utur; kum cam uner.

¹⁸E maram yedi becur ko acura! udul lim cwinygi ng’abre, kum kakwae migi mbe; eyo, udul rombe betagu.

¹⁹E Yehova, alwong’o i beng’i; kum mac uwang’u kakwae mi langa, man lebmac uwang’u yedhi ceke m’i thim.

²⁰Eyo, yedi m’i thim gigamu cwinygi i beng’i; kum kulo mi pi dwono, man mac uwang’u kakwae mi langa.