Read Alur Amos 2 Bible Online

Amos 2 - Alur bible

Amos 2

¹Yehova wacu kumae: Mi gondri adek mi Moab, eyo, mir ang’wen, abiloko masendine cen ungo; kum ewang’u cogo mir ubimo mir Edom udoko ni nunu.

²Ento abioro mac wi Moab, man ebiwang’u udi mi ker mi Kerioth; man Moab bitho ku yakni, ku kok, man ku badwal mir agwara;

³man abikabu japoklembe kud i kinde, man abinego judongomawijone karacelo kude, Yehova wacu.

⁴Yehova wacu kumae: Mi gondri adek mi Yuda, eyo mir ang’wen, abiloko masendine cen ungo; kum gikwero cik pa Yehova, man gigwoko cik pare ngo, ndra migi ketho gikier, ma calu kwarugi wotho i ie.

⁵Ento abioro mac wi Yuda, man ebiwang’u udi mi ker mi Yerusalem.

⁶Yehova wacu kumae: Mi gondri adek mir Israel, eyo, mir ang’wen, abiloko masendine cen ungo; kum giloko ju ma pwe ni mola ma tar, man jucanpiny ku wara ario,

⁷gi ju ma giketho cwinygi kum utur mi ng’om ma wi jucan, man giloko yo mi ju ma mol cen: man ng’atu ma nico ku won gimondo wi nyaku acel kara gicid nyinga ma leng’:

⁸man givuto gigi piny i ng’et pemblam kubang’e kubang’e wi kendi ma gigamu ni mukwatu; man i ot pa Mungu migi gimadhu pigulok mi wadi ju ma juketho giculo.

⁹Ento anyotho Jaamori i wang’gi, ma kaborne calu kabor mi musonge, man e tek calu bongu; ento anyotho nyinge ku malu, man ulage ku piny.

¹⁰Man ke awodhowu kud i ng’om Misiri, man apeyowu rundi pier ang’wen i langa, kara wumwony ng’om pa Jaamori.

¹¹Man ating’o wotwu ni jubila, man kind awobi mu ni Junaziri. Ebedo kumeno ngo, E nyithindho mir Israeli? Yehova wacu.

¹²Ento wumio pigulok ni Junaziri gimadhi, man wung’olo ni jubila, wuwacu kumae, Kud wueu.

¹³Nen, abedo adia i thewu calu magali ma pong’ ku kumna bedo adia.

¹⁴Man ringo ng’wec birwinyo ni jung’wec; man jatego bidwoko tego pare tek ungo; kadok jatego de bibodhre gire ngo;

¹⁵kadok ng’atu ma kilo atum de bicungo ngo; man ng’atu ma jang’wec ma ku tielo de bibodhre gire ngo; kadok ng’atu ma wotho ku riuni de bibodhre gire ngo;

¹⁶man ng’atu ma cwinye tek i kind jutego biringo muneru i ceng’ maeca, Yehova wacu.