Read Alur Amos 8 Bible Online

Amos 8 - Alur bible

Amos 8

¹Rwoth Yehova nyutho ira kumeni: man, nen, katoko mi nying’ cwir.

²Man ewacu kumae, Amos, ineno ang’o? man awacu kumae, Katoko mi nying’ cwir. Yehova lund uwacu ira kumae, Kajik uwok wi dhanu para Israel; abikadhu akadha kud i ng’etgi kendo ngo.

³Man wer mi hekalu bibedo goyonduru i ceng’ maeca, Rwoth Yehova wacu: avu bibedo dupa; gibibayugi woko ling’ ling’ i kaka ceke.

⁴Wuwinj maeni, E wun ma wuyenyo wumwony jucanpiny, man wuvoi jucan mi ng’om,

⁵ma wuwacu kumae, Dwi ma por bibedo umbe awene, kara walok cami? man sabatu, kara wawodh nganu, ma wadwok ko katoko nok, man cekel dit, ma watim ko ku ndra ku mukero mir abombi de:

⁶kara wang’ieu jucan ku mola ma tar, man jucanpiny ku wara ario, man walok cung’ nganu?

⁷Yehova kwong’o ku dwong’ pa Yakobo kumae, Andha wia biwil ki ngo kum tic migi moko.

⁸Kum ng’om bimiel kum maeni ngo, man ku ba dhanu ku ba dhanu m’ubedo i ie biywak ungo? eyo, ebiai dho calu Kulo; man ebisendre e ebidok kendo, calu Kulo mi Misiri.

⁹Man ebitimbre i ceng’ maeca, Rwoth Yehova wacu, nia abiketho ceng’ umwony dieceng’, man abiyutho ng’om i ceng’ ma terere.

¹⁰E abiloko agba mu ni ywak, man wer mu ceke ni goyonduru; man abikelo gonia wi pier ceke, man lunywic i wie kubang’e kubang’e; man abikethe calu ywak mi wodo ma kulong’, man kajikne calu ceng’ ma kec.

¹¹Nen, ceng’ ubino, Rwoth Yehova wacu, nia abioro ndru i ng’om, ndru mi kwen ungo, kadi rieupi de ngo, ento mi winjo lembe pa Mungu.

¹²E gibiwotho gambre ba nam cil kum nam, man gambre yor ariwa ma malu cil yo nyangu; gibiringo kun ku kun kara giyeny lembe pa Yehova, e gibinwang’e ngo.

¹³I ceng’ maeca nyir ma wang’gi leng’ kud awobi bivoc ni rieupi.

¹⁴Ju ma kwong’o kwong’ ku dubo mi Samaria, man giwacu kumae, Calu mungu peri bedo kwo, E Dan, man, Calu yo mi Ber-ceba bedo kwo; gibipodho, e gibiai kendo ngo.