Read Alur Yona 3 Bible Online

Yona 3 - Alur bible

Yona 3

¹Man lembe pa Yehova wok ba Yona wang’ arionde, m’uwacu kumae,

²Ai, cidh i Nineve, adhura maeno ma dwong’, man iyer ire lembayera m’angolo iri.

³Kum kumeno Yona ai, e ecidho Nineve, calku lembe pa Yehova. Nwang’u Ninevene en e adhura ma dit apila, mi woth mi ceng’ adek.

⁴E Yona maku mondo i adhurane woth mi ceng’ acel, man ekok, e ewacu kumae, E dong’ ceng’ pier ang’wen, e jubiredho Nineve.

⁵Man dhanu mi Nineve giyio Mungu; e ging’olo wekocam, man gikendo usuba, ugambre kum judongo m’i kindgi cil kum nyithindho m’i kindgi.

⁶E rwonglembene wok bang’ ubimo mi Nineve, man eai kud i komker pare, eketho kendi pare mi ker cen, man eumbre kud usuba, ebedo de i vura.

⁷Man eoro kwenda m’uyero i Nineve ku ng’ol p’ubimo ku weg yung pare, m’uwacu kumae, Kadok dhanu kadi lim, dhok kadi udul rombe, kud ubil gin moko; ku gicam cam, kadi pi de ku gimadhi:

⁸ento wek gibed auma kud usuba, dhanu ku lim de, man wek gilwong’ Mungu ma tek; eyo, wek gilokri kubang’gi kubang’gi ng’atuman kud i yo pare ma rac, man kud i yo pare ma rac, man ku i kuvuga ma ni i cinge.

⁹Ng’a m’ung’eyo tek Mungu bilokre ngo, biloko cwinye de, biweko lak kwinyo pare woko kara ku warwinyi?

¹⁰E Mungu neno tic migi, nia gilokri kud i yo migi ma rac; e Mungu loko cwinye kum gin ma rac m’ewacu ebitimo i kumgi; man etime ngo.