Read Alur Yona 4 Bible Online

Yona 4 - Alur bible

Yona 4

¹Ento lembene ton i Yona dit apila, man ng’ecwiny umake.

²Man erwo ni Yehova, e ewacu kumae, Akwei, E Yehova, awacu kumeni ngo, ka fodi ani i ng’om ma thuwa? Ka kumeno atimo pio kara apiei i Tarcic; kum ang’eyo nia in i Mungu ma won bero, man ipong’ ku kisa, ibedo yo ni ng’ecwiny, man isegri i mer mi bero, iloko cwinyi de kum gin ma rac.

³Ka kumeno kawono, E Yehova, akwei, kab kwo para kud i bang’a; kum e ber ira nitho sagu ma tek abedo kwo.

⁴Man Yehova wacu kumae, Itimo dre ka ng’ecwiny umeki?

⁵Yona lund uai woko ku i adhura, man ebedo i ng’et adhura ma yo nyangu, e ejio otbak ire keca, man ebedo the tipone, maram ebineno ko gin ma bitimbre kum adhurane.

⁶Man Yehova Mungu jio vombo, man eketho edongo wi Yona, kara edok ni tipo i wie, kara ubodhe kud i bedo pare ma rac. Kum kumeno anyong’a nego Yona apila kum vombone.

⁷Ento Mungu yiko ukal ka nyangu dongo urwone, man egoyo vombone, ketho ener.

⁸Man etimbre, ka ceng’ udongo, nia Mungu yiko yamu ma lieth ma yo nyangu; e ceng’ uwang’u wi Yona, ketho evoc, man ekwayu pire gire nia etho, e ewacu kumae, E ber ira tek atho sagu bedo kwo.

⁹E Mungu wacu ni Yona kumae, Itimo dre ka ng’ecwiny unegi kum vombo? Man ewacu kumae, Atimo dre kum ng’ecwiny umaka, cil ni tho.

¹⁰E Yehova wacu kumae, Kisa negi kum vombo, m’itimo tic moko ngo i kume kadok alaka de iketho elak in ungo; m’etwi diewor acel, m’enyothre de diewor acel:

¹¹man emaku piny ungo nia kisa nega kum adhura ma dit maeno ma Nineve, ma dhanu ma sagu rubanga dak acel ku pier ario ni i ie ma copo ng’eyo cing’gi ma yor acwic ku ma yor acam de ngo; ku lim dupa bende?