Read Alur Wel 10 Bible Online

Wel 10 - Alur bible

Wel 10

¹Man Yehova yero ni Musa, ewacu kumae,

²Tim agwara ario iri mi mola ma tar; timgi ku tic m’afoda: man ibilwong’o kudo udul, man mi woth mi gonjo.

³Man kinde ma gibikudhogi, udul ceke bicokri gigi i beng’i i dhugola mi hema mi cokri.

⁴Man tek gikudho acel kende, judongomawijo, ma wi rubanga mir Israel, gibilund cokri i beng’i.

⁵Man kinde ma wukudho girapoya gonjo m’ubedo i ng’et kagonjo ma yo nyangu bitugo woth migi.

⁶Man kinde ma wukudho girapoya mir arionde, gonjo m’ubedo i ng’et kagonjo ma yor ariwa ma piny bitugo woth migi; gibikudho girapoya pi woth migi.

⁷Ento kinde ma jubicoko cokri karacelo, wubikudho, ento wubikudho girapoya ngo.

⁸Man wot Harun, ma julam, gibikudho agwara: man gibibedo iwu ni cik mi nja cil ni dhanum’utuk mu.

⁹Man kinde ma wucidho ba lwiny i ng’om mu wi jadegi ma sendowu, wubilund kudho girapoya kud agwara; e jubipoi piwu i wang’ Yehova Mungu mu, e wubiboth ni judegi mu.

¹⁰I nindo mi mutoro mu bende, man i agba mu ma juketho, man i thekri mi dwi mu, wubikudho agwara wi lam m’awang’a mu, man wi lam mi girathiera mi kwiocwiny mu; e gibibedo iwu ni poi i wang’ Mungu mu; an a Yehova Mungu mu.

¹¹Man etimbre i rundi mir arionde, i dwi mir arionde, i ceng’ pier arionde mi dwi, nia afuru tingre malu ku wi hema mi lembatuca.

¹²Man nyithindho mir Israel gitugo woth calku woth migi kud i langa mi Sinai; man afuru bedo i langa mi Paran.

¹³Man gikwong’o woth migi calku lembang’ola pa Yehova ni kum Musa.

¹⁴Man ma kwong’ane abera mi gonjo mi nyithindho pa Yuda tugo woth calkud udul migi: man Nacon ma wod Aminadab ni wi udul pare.

¹⁵Man Nethanel ma wod Zuar ni wi udul mi suru mi nyithindho pa Isakar.

¹⁶Man Eliab ma wod Helon ni wi udul mi suru mi nyithindho pa Zebulun.

¹⁷E jugonyo hema piny; man wot Gercon ku wot Merari, m’uyeyo hema, gitugo woth.

¹⁸Man abera mi gonjo pa Ruben gitugo woth calkud udul migi: man Elizur ma wod Cedeur ni wi udul pare.

¹⁹Man Celumiel ma wod Zuricadai ni wi udul mi suru mi nyithindho pa Simeon.

²⁰Man Eliasaf ma wod Deuel ni wi udul mi suru mi nyithindho pa Gad.

²¹Man Jukohathi tugo woth, ma gibeyeyo kamaleng’: man jumange giketho hema cungo ma fodi giwok ungo.

²²Man abera mi gonjo mi nyithindho pa Efraim gitugo woth calkud udul migi: man Elicama ma wod Amihud ni wi udul pare.

²³Man Gamaliel ma wod Pedazur ni wi udul mi suru mi nyithindho pa Manase.

²⁴Man Abidan ma wod Gideoni ni wi udul mi suru mi nyithindho pa Benyamin.

²⁵Man abera mi gonjo mi nyithindho pa Dan, m’ebedo cen ni gonjo ceke, utugo woth calkud udul migi: man Ahiezer ma wod Amicadai ni wi udul pare.

²⁶Man Pagiel ma wod Okran ni wi udul mi suru mi nyithindho pa Acer.

²⁷Man Ahira ma wod Enan ni wi udul mi suru mi nyithindho pa Naftali.

²⁸Woth mi nyithindho mir Israel ubedo kumeni calkud udul migi; e gitugo woth.

²⁹E Musa wacu ni Hobab, ma wod Reuel ma Jamidiani, ma jalkwaru Musa kumae, Wabecidho i ka ma Yehova wacu pire kumae, Abimie iwu: bin wacidhu wakudu, man wabitimi ber; kum Yehova yero ber pir Israel.

³⁰Man ewacu ire kumae, Abicidho ngo; ento abidok i ng’om para ma dhe, man ba wat para.

³¹E ewacu kumae, Akwei, kud iwekwa; kum calu ing’eyo maram wabigonjo ko i langa, e ibibedo iwa kaka wang’.

³²Man ebibedo, tek wacidho wakudu, eyo, ebibedo, nia bero ma tek Yehova bitimo iwa, e wabitimo eca i beng’i bende.

³³E gitugo woth ugambre kum got pa Yehova woth mi ceng’ adek e sanduk mi lembariba pa Yehova cidho i wang’gi woth mi ceng’ adek kara uyeny igi kayom.

³⁴Man afuru pa Yehova ni i wigi ku dieceng’, kinde ma gitugo woth ma giai ko ku i kagonjo.

³⁵Man etimbre, kinde ma sanduk utugo woth, nia Musa wacu kumae, E Yehova, ai malu, man wek judegi peri gikethri; man wek ju m’udegi giring i weng’i.

³⁶Man kinde m’eyom ewacu kumae, E Yehova, dwog ba rubanga apar mi rubanga mir Israel.