Read Alur Wel 12 Bible Online

Wel 12 - Alur bible

Wel 12

¹E Miriem giku Harun giyero nying’ Musa kum dhaku ma Nyakuci m’egamu; kum egamu dhaku ma Nyakuci.

²Man giwacu kumae, Yehova yero andha ku Musa kende? eweco kudwa bende ngo? E Yehova winjo maeni.

³Nie ng’atu ma Musa e mol dit, ma sagu dhanu ceke ma gini i wang’ ng’om.

⁴E Yehova wacu pio ni Musa, man ni Haran, man ni Miriem kumae, Wuwok woko wun adek wuci ba hema mi cokri. E gin adek giwok woko.

⁵E Yehova loro piny i mbegi mir afuru, man ecungo i dhugola mi Hema, e elwong’o Harun giku Miriem; e gin ario giwok woko.

⁶Man ewacu kumae, Dong’ wuwinj lembe para: tek jabila ni i kindwu, an a Yehova abiketho wang’eira kude i ginmawokiwang’, wabiweco wakude de ku wang’ lek.

⁷Jatic para ma Musa bedo kumeno ngo: ebedo mandha i ot para ceke:

⁸wabiweco wakude dhok ku dhok, cil ku lembanyutha, ku wec ma via via de ngo; man ebineno ayi Yehova: ka kumeno lworo yero lembe ma rac kum jatic para ma Musa negowu ngo?

⁹E ng’ecwiny pa Yehova opo i kumgi; e ecidho.

¹⁰Man afuru ai malu ku wi Hema; man, nen, Miriem en e won joi, tar calu pei; e Harun uneno Miriem, man, nen, en e won joi.

¹¹E Harun uwacu ni Musa kumae. A, rwoth para, akwei, kud iketh dubo i wiwa, kum watimo lemkasegu, man kum wadubo.

¹²Akwei, kud iyi ebed calu avu, ma ng’et ringe nyothre kinde m’eai kud i min.

¹³E Musa Lwong’o Yehova, ewacu kumae, E Mungu, akwei, cange.

¹⁴E Yehova wacu ni Musa kumae, Tek won ung’ulo lau i wang’e kende, lewic nege ceng’ abiro ngo? wek jucik bang’e ng’ei kagonjo ceng’ abiro, man yo ng’ei maeno jubiroye kendo.

¹⁵Ejucikoba Miriem ng’ei kagonjo ceng’ abiro: e dhanu wotho ngo ma fodi jukuroyo Miriem kendo ngo.

¹⁶Man yo ku ng’eye dhanu wotho uai Hazeroth, man gigonjo i langa mi Paran.