Read Alur Wel 18 Bible Online

Wel 18 - Alur bible

Wel 18

¹Man Yehova wacu ni Harun kumae, In wuku woti man ot pa wuru karacelo kudi wubiyeyo kier mi kamaleng’: man in wuku woti karacelo kudi wubiyeyo kier mi lamulam mu.

²Man utumeru bende, ma suru pa Lawi, ma suru pa wuru kelgi ceng’ni karacelo kudi, kara giribri karacelo kudi, man gitim iri tim: ento in ku woti karacelo kudi wubibedo i wang’ hema mi lembatuca.

³Man gibigwoko kur peri, ku kur mi Hema ceke: ento gibicoro ceng’ni agulu mi kamaleng’ man ba pemblam ungo, kara ku githo, kadok gin, kadi wun.

⁴E gibiribri karacelo kudi, man gibigwoko kur mi hema mi cokri, mi giratima ceke mi Hema: man jawirok bibino ceng’ni wun ungo.

⁵E wubigwoko kur mi kamaleng’, man kur mi pemblam; kara kwinyo kud ubed kendo Wi nyithindho mir Israel.

⁶Man an, nen, agamu utumegwu ma Julawi kud i kind nyithindho mir Israel: gi giramia iwu, ma jumio ni Yehova, kara gitim giratima mi hema mi cokri.

⁷Man in wuku woti karacelo kudi wubigwoko lamulam mu pi gin ceke mi pemblam, man pi maeno ma yo i kusikabongu; e wubitimo giratima: amio lamulam iwu calu giratima mi giramia: e jawirok m’ucoro ceng’ni jubinege.

⁸Man Yehova yero ni Harun kumae, Man an, nen, amio iri kur mi lam m’ating’a para, en e gin ceke ma leng’ mi nyithindho mir Israel; amiogi iri ni kum wir ma ku mo, man ni woti, calku makapiny mi nja.

⁹Maeni bibedo peri mi gin ma leng’ m’usagu, m’uai kud i mac: girathiera migi kubang’e kubang’e, cil lam mi mogo migi kubang’e kubang’e, man lam mi dubo migi kubang’e kubang’e, man lam mi kier migi kubang’e kubang’e, ma gibithiero ira, bibedo leng’ m’usagu iri man ni woti.

¹⁰Ibicamu kume calu gin ma leng’ m’usagu; co ceke kubang’gi kubang’gi gibicamu kume: ebibedo leng’ iri.

¹¹Man maeni peri: lam m’ating’a mi giramia migi, en e lam m’awira ceke mi nyithindho mir Israel; amiogi iri, man ni woti man ni nyigi karacelo kudi, calu makapiny mi nja; ku ba dhanu ceke m’i ot peri m’ubedo leng’ gibicamu kume.

¹²Mo ceke ma ber, man nyingulok ceke ma ber, man nganu ceke ma ber, en e landu mwoka migi ma gimio ni Yehova, amiogi iri.

¹³Landu mwoka mi gin ceke mi ng’om migi, ma gikelo ba Yehova, bibedo peri; ku ba dhanu ceke m’e leng’ i ot peri bicamu kume.

¹⁴Gin ceke ma jukoyo i Israel, bibedo peri.

¹⁵Gin ceke m’uyabu ic, mi ring’o ceke ma gibithiero ni Yehova, kadok mi dhanu kadi mi lim de bibedo peri: ento kayu mi dhanu ibiwaru andha, man kayu mi lim ma leng’ ungo ibiwaru.

¹⁶Man maeno ma jubiwaru m’i kindgi ugambre kum ma dwije acel ibiwaru, calku wel m’iketho, mi sente mi cekel abic, calku cekel mi kamaleng’ (ma en e gera pier ario).

¹⁷Ento kayu mi dhiang’, kadi kayu mi rombo, kadi kayu mi diel, ibiwaru ngo; gin gi leng’: ibikixo rimbgi wi pemblam, man ibiwang’u mio migi ni lam ma jutimo ku mac, ni ng’wic mido ma ng’ar ni Yehova.

¹⁸Man ring’gi bibedo peri, calu kor m’awira man calu bam ma yor acwic, ebibedo peri.

¹⁹Lam m’ating’a ceke mi gin ma leng’, ma nyithindho mir Israel uthiero ni Yehova, amio iri, ku woti man nyigi karacelo kudi, calu makapiny mi nja: en e lembariba mi kadu mi nja i wang’ Yehova iri man ni kodhini karacelo kudi.

²⁰Man Yehova wacu ni Harun kumae, Ibibedo kud aba ngo i ng’om migi, kadok makapiny moko m’i kindgi de ibibedo ko ngo: an a makapiny peri man aba peri i kind nyithindho mir Israel.

²¹Man nen, amio apaje ceke i Israel ni aba ni nyithindho pa Lawi, ka giratima migi ma gitimo, en e giratima mi hema mi cokri.

²²Man ugambre kawono nyithindho mir Israel bibino ceng’ni hema mi cokri ngo, gimaru yeyo dubo, man githo.

²³Ento Julawi bitimo giratima mi hema mi cokri, man gibiyeyo dubo migi: ebibedo ni cik mi nja ni dhanum’utuk mu; man i kind nyithindho mir Israel gibibedo kud aba ngo.

²⁴Kum amio apaje mi nyithindho mir Israel ni aba ni Julawi, ma githiero calu lam m’ating’a ni Yehova: ka kumeno awacu igi kumae, Gibibedo kud aba ngo i kind nyithindho mir Israel.

²⁵Man Yehova yero ni Musa, ewacu kumae,

²⁶Man kendo ibiyero ni Julawi, man iwac igi kumae, Kinde ma wugamu apaje ba nyithindho mir Israel m’amio iwu m’uai i bang’gi ni aba mu, wubilund thier o ng’ete ni lam m’ating’a ni Yehova, en e apaje mir apaje.

²⁷E lam m’ating’a mu jubikwanu iwu, calu ma tek en e cam mi lelacam, man calu pong’ mi pany mi pigulok.

²⁸Kumeno wun bende wubithiero lam m’ating’a ni Yehova kum apaje mu ceke, ma wugamu ba nyithindho mir Israel; man kum maeno wubimio lam m’ating’a pa Yehova ni Harun ma jalam.

²⁹Kud i kind giramia mu ceke wubithiero lam m’ating’a pa Yehova, mi kinde ma berne ceke en e ng’ete ma leng’ kud i ie.

³⁰Ka kumeno ibiwacu igi kumae, Kinde ma wuting’o ma berne kud i ie, jubilund kwane ni Julawi calu nyai mi lelacam, man calu nyai mi pany mi pigulok.

³¹Man wubicame i ka ceke kubang’e kubang’e wuku juudiwu: kum en e sukulia mu ka giratima mu i hema mi cokri.

³²Man wubiyeyo dubo ngo ni kume, ka wuting’o ma berne kud i ie: man wubicido gin ma leng’ mi nyithindho mir Israel ungo kara kud wutho.