Read Alur Wel 20 Bible Online

Wel 20 - Alur bible

Wel 20

¹Man nyithindho mir Israel en e udul dho, gibino i langa mi Zin i dwi ma kwong’ane; e dhanu gibedo Kadec; e Miriem utho keca, man juyike keca.

²Man pi de mbe ni udul: e gicokri karacelo gigi wi Musa man wi Harun.

³E dhanu gipiembri giku Musagi, man giyero, giwacu kumae, Maku watho kinde ma utumegwa tho i wang’ Yehova!

⁴Nedi wukelo cokri pa Yehova i langa maeni, kara watho keni, wan ku lim mwa?

⁵Pirang’o wuketho waai malu ku i Misiri, kara wuketh wamond i ka ma rac maeni? en e kakodhi ngo, kadi mir ubolo, kadi mir ulok, kadi mir ulemo de; kadok pi mir amadha de mbe.

⁶E Musa giku Harun giai kud i vut cokri gicidho dhugola mi hema mi cokri, e gipodho arieba wang’gi: man dwong’ pa Yehova wok i bang’gi.

⁷E Yehova yero ni Musa, ewacu kumae,

⁸Mak uluth, man icok udul, in, wuku Harun m’umeru, man wuyer ni cana i wang’gi, kara ewodh pige; man ibiwodho pi igi kud i cana; kum kumeno ibimio giramadha ni udul man ni lim migi.

⁹E Musa gamu uluth kud i wang’ Yehova, calu eng’olo ire.

¹⁰E Musa giku Harun gicoko cokri karacelo i wang’ cana, man ewacu igi kumae, Wuwinj kawono? wu jujai; wabiwodho pi iwu kud i cana maeni?

¹¹E Musa ting’o cinge malu, man egoyo cana kud uluth pare wang’ ario; e pi ma dit uthwogre, man udul gimadhu, ku lim migi.

¹²Man Yehova wacu ni Musa giku Harun kumae, Kum wuyia ngo, kara wudwoka leng’ i wang’ nyichindho mir Israel, ka kumeno wubitero cokri maeni i ng’om m’amio igi ngo.

¹³Maeni pi mi Meriba; kum nyithindho mir Israel gipiembri ku Yehova, man enyuthre gire leng’.

¹⁴E Musa oro jukwenda uai Kadec ucidho bang’ ubimo mir Edom, uwacu kumae, Israel m’umeru wacu kumae, Ing’eyo sendri ceke m’upodho i kumwa:

¹⁵maram kwaruwa loro ko piny i Misiri, man wabedo i Misiri nindo m’uton hai; man Jumisiri gitimowa rac, ku kwaruwa:

¹⁶e kinde ma waywak ba Yehova, ewinjo dwandwa man eoro malaika, e ewo dho wa kud i Misiri: man, nen, wani i Kadec, adhura ma ni i kieu peri ma wi tung’.

¹⁷Akwei, wek wakadh kud i ng’om peri: wabikadhu kud i podho kadi podho mir ulok de ngo, kadok kulo mi pi m’atong’a de wabimadhu ngo; wabikadhu kud i ngudru p’ubimo; wabikier i cing’ ma yor acwic kadi ma yor acam de ngo, maram wakadhu ko kieu peri.

¹⁸E Edom uwacu ire kumae, ibikadhu kud i kinda ngo, amaru wok woko ku palamularu i kumi.

¹⁹Man nyithindho mir Israel uwacu ire kumae, Wabiidho kud i ngudru: man tek wamadhu kum pi peri, an ku lim para, abilund mio wel pinje: wek akadh akenda, ku tienda, m’atimo gin moko mange ngo.

²⁰Man ewacu kumae, ibikadhu ngo. E Edom ucore i wie ku dhanu ma dit, man ku cing’ ma tek.

²¹Edom ukwero Israel kumeni ya kud ukadh kud i kieu pare: kum kumeno Israel ulokre cen kud i bang’e.

²²Man giai i Kadec giwotho: e nyithindho mir Israel, en e udul dho, gibino ba got Hor.

²³Man Yehova yero ni Musa giku Harun wi got Hor, i ng’et kieu mi ng’om Edom, ewacu kumae,

²⁴Jubicoko Harun ba dhanu pare; kum ebimondo ngo i ng’om m’amio ni nyithindho mir Israel, kum wujai kum lembe para ba pi mi Meriba.

²⁵Gam Harun gikud Eleazar ma wode, man ikelgi malu ba got Hor;

²⁶man iwodh kendi pa Harun, man iroye kum Eleazar ma wode: e jubicoko Harun ba dhanu pare, man ebitho kuca.

²⁷E Musa timo calu Yehova ng’olo: man giidho malu wi got Hor i wang’ udul ceke.

²⁸E Musa wanyu kendi pa Harun, man eluthe kum Eleazar ma wode; e Harun utho kuca wi got: man Musa giku Eleazar giloro piny ku wi got.

²⁹E kinde ma udul ceke gineno nia Harun utho, giywagu Harun ceng’ pier adek, en e ot ceke mir Israel.