Read Alur Wel 22 Bible Online

Wel 22 - Alur bible

Wel 22

¹Man nyithindho mir Israel uwotho, man gigonjo i pambu mi Moab loka Yordan ba Yeriko.

²Man Balak ma wod Zipor uneno gin ceke ma Israel utimo kum Juamori.

³Man lworo nego Moab dit kum dhanu, kum gi dupa: e cwiny Moab udieng’ kum nyithindho mir Israel.

⁴Man Moab uwacu ni judongo mi Midian kumae, Kawono udul maeni binang’u gin ceke m’i ng’etwa kun ku kun, calu koni dhiang’ nang’u lum m’i thim. Nwang’u Balak ma wod Zipor en e ubimo mi Moab i nindo maeca.

⁵Man, eoro jukwenda ba Balam ma wod Beor, i Pethor, ma en e dhu Kulo, ba ng’om mi nyithindho mi dhanu pare, kara ulwong’e, ewacu kumae, Nen, dhanu moko nuti m’uai Misiri: nen, giumo wang’ ng’om, man gibedo yor i wang’a.

⁶Ka kumeno, akwei, koibin nyakawono, ilam dhanu maeni ira; kum gi tek ira m’usagu: kuno nyo abisagu, kara wagoigi, man kara ariemgi woko kud i ng’ombe; kum ang’eyo nia ng’atu ma tek imio mugisa i wie e mugisa bedo i wie, man ng’atu ma tek ilamu e lam bedo i wie.

⁷Man judongo mi Moab ku judongo mi Midian gicidho ku sukulia mi ewo thelembe i cing’gi; man gibino ba Balam, e giyero ire lembe pa Balak.

⁸Man ewacu igi kumae, Wuvut keni diewor maeni, man abikelo lembe i beng’wu kendo, calu Yehova biyero ira: e judongomawijo mi Moab gibedo giku Balamgi.

⁹Man Mungu bino ba Balam, man ewacu kumae, Maeni dhanu ma nedi ma ni karacelo kudi?

¹⁰E Balam uwacu ni Mungu kumae, Balak ma wod Zipor, m’ubimo mi Moab, eoro kwenda i bang’a, ewacu kumae,

¹¹Nen, dhanu m’uai kud i Misiri, giumo wang’ ng’om: kawono, koibin ilamgi ira; kuno nyo abicopo kiedo kugi, man abiriemogi woko.

¹²E Mungu wacu ni Balam kumae, Ibicidho kugi ngo; ibilamu dhanune ngo; kum jumio mugisa i wigi.

¹³E Balam uai malu kugweno, man ewacu ni judongomawijo pa Balak kumae, Wudok i ng’om mu; kum Yehova kwero kud acidh kudu.

¹⁴E judongomawijo mi Moab uai malu, man gidok ba Balak, e giwacu kumae, Balam ukwero ku wabin kugi.

¹⁵Man Balak uoro judongomawijo kendo, mange, ma gi weg yung de ma sagu gin.

¹⁶E gibino ba Balam, giwacu ire kumae, Balak ma wod Zipor uwacu kumae, Akwei, kud iyi gin moko ceri kubino i bang’a:

¹⁷kum abidodi ni yung ma dit apila, man gin ceke ma tek iwacu ira abitimo: ka kumeno, akwei, koibin, ilam dhanu maeni ira.

¹⁸Man Balam uloko lembe ewacu kumae ni jutic pa Balak, Kadok Balak umi ira ot pare pong’ ku mola ma tar man mola ma kwar, acopo kadhu ku wi lembe pa Yehova Mungu para ngo, ma nia atim nok kadi dit.

¹⁹Ka kumeno kawono akwayuwu, wun bende wubed kakeni diewor maeni, kara ang’ei gin ma Yehova biyero ira kendo.

²⁰E Mungu bino ba Balam ku diewor, man ewacu ire kumae, Tek dhanu bino lwong’i, ai malu, wuci kugi; ento lembe m’ayero iri kende, e m’ibitimo.

²¹E Balam uai malu kugweno, man eroyo jambwoth mi kana pare, e gicidho giku judongomawijo mi Moab.

²²E ng’ecwiny pa Mungu opo kum ecidho; man malaika pa Yehova gure gire i yo ni jasend ire. Nwang’u ebewotho ku wi kana pare, e jutic pare ario gini karacelo kude.

²³Man kana neno malaika pa Yehova cungo i yo, ku palamularu pare i cinge, e kana kier cen kud i yo, man ecidho i thim: e Balam ugoyo kanane, kara ewire i yo.

²⁴E malaika pa Yehova lund ucungo i yo i kind podho mir ulok, nwang’u gang’ ni i ng’ete maeni, man i ng’ete mucelo.

²⁵E kana neno malaika pa Yehova, man ecidh egudre gire kum gang’kidi, man emadu tiend Balam kum gang’kidi: man egoye kendo.

²⁶Man malaika pa Yehova eoro kendo, man ecungo kpa i kind ariti, ka ma kalokne mbe kadok i cinge ma yor acwic kadi ma yor acam.

²⁷E kana neno malaika pa Yehova, man evuto piny the Balam: e ng’ecwiny pa Balam uopo, man egoyo kana kud uluth pare.

²⁸E Yehova yabu dhu kana, man ewacu ni Balam kumae, Atimo ang’o iri, m’igoya ko wang’ adek maeni?

²⁹Man Balam uwacu ni kana kumae, Kum icaya: dok ande palamularu ni i cinga, nwang’u ande anegi kawono.

³⁰Man kana wacu ni Balam kumae, An a kana peri ngo, m’iwotho i wia i min nindo mi kwo peri ceke maram utundo ko tini? naka de abedatimi kumeni? Man ewacu kumae, Ungo.

³¹Yehova lund uyabu wang’ Balam, man eneno malaika cungo i yo, ku palamularu pare sii i cinge; e ekulo wie, man epodho arieba wang’e.

³²Man malaika pa Yehova wacu ire kumae, Igoyo kana peri wang’ adek maeni nedi? nen, awok eni ni jasend, kum yo peri kier i wang’a:

³³e kana nena, man ekier cen i wang’a bang’ adek maeni: dok k’ekier ira cen ungo, nwang’u ande anegi andha, man abodhe ma kwo.

³⁴E Balam uwacu ni malaika pa Yehova kumae, Adubo; kum ang’eyo ngo nia icungo ira i yo: ka kumeno kawono, tek eton ii, abidok i ng’eya.

³⁵Man malaika pa Yehova wacu ni Balam kumae, Cidh karacelo ku dhanune; ento lembe m’abiwacu iri kende, e m’ibiyero. Kum kumeno Balam ucidho karacelo ku judongomawijo pa Balak.

³⁶E kinde ma Balak uwinjo nia Balam ubino, ewok woko kara giromb kugi i Adhura mi Moab, ma ni i kieu mir Arnon, ma ni i ng’et kieu ma wi tung’.

³⁷E Balak uwacu ni Balam kumae, Aoro kwenda kud amora ucidh ulwong’i ngo? pirang’o ibino ngo i bang’a? acopo dodi andha ni yung ungo?

³⁸E Balam uwacu ni Balak kumae, Nen, abino i beng’i: kawono abedo ku nyatego moko m’ayero ko gin moko? lembe ma Mungu ketho i dhoga, eca e m’abiyero.

³⁹E Balam gicidho giku Balak, man gibino ba Kiriathhuzoth.

⁴⁰Man Balak uthumo koni dhiang’ ku rombe ni lam, e eoro ba Balam, man ba judongomawijo ma gini karacelo kude.

⁴¹Man etimbre kugweno, nia Balak ugamu Balam, man eketho eidho i ka ma malu pa Bal; man ku kuca eneno wi dhanune ceke.