Read Alur Wel 28 Bible Online

Wel 28 - Alur bible

Wel 28

¹Man Yehova yero ni Musa, ewacu kumae,

²Ng’ol ni nyithindho mir Israel, man iwac igi kumae, Girathiera para, cemo para mi lam para ma jutimo ku mac, mi ng’wic mido ma ng’ar ira, wuketh’ cwinywu ya wuthier ira i nindone ma kakare.

³Man ibiwacu igi kumae, Maeni girathiera ma jutimo ku mac ma wubithiero ni Yehova: nyithi nyogi rombe ma rundigi acel acel ma mulima mbe i kumgi, ario ku ba ceng’ ku ba ceng’, ni lam m’awang’a ma thiri thiri.

⁴E ibithiero nyathi rombo acel kugweno, man nyathi rombo mucelo ibithiero uthieno;

⁵man ng’et mogo ma yom mir apaje ma i katoko ni lam mi mogo, m’ujebre ku ng’et mo m’afoda mir ang’wende ma i amorpi.

⁶En e lam m’awang’a ma thiri thiri, ma jung’olo wi got Sinai ni ng’wic mido ma ng’ar, lam ma jutimo ku mae ni Yehova.

⁷Man lam m’amadhane bibedo ng’ete mir ang’wende ma i amorpi mi nyathi rombo acel: konj girathiera mi giramadha mi giramadha ma lake tek i kamaleng’ ni Yehova.

⁸Man ibithiero nyathi rombo mucelo uthieno: calu lam mi mogo mi kugweno, man calu lam m’amadhane, ibithiere, lam ma jutimo ku mac, mi ng’wic mido ma ng’ar ni Yehova.

⁹Man i ceng’ sabatu nyogi rombe ario ma rundigi acel acel ma mulima mbe i kumgi, man ng’et mogo ma yom apaje ario ma i katoko ni lam mi mogo, m’ujebre ku mo, ku lam m’amadhane:

¹⁰maeni lam m’awang’a mi sabatu kubang’e kubang’e, umed lam m’awang’a ma thiri thiri, man lam m’amadhane.

¹¹Man i thekri mi dwi mu wubithiero lam m’awang’a ni Yehova: thwoni dhiang’ m’aradu ario, man nyog rombo acel, ku nyithi nyogi rombe abiro ma rundigi acel acel ma mulima mbe i kumgi;

¹²man ng’et mogo ma yom ma i katoko apaje adek ni lam mi mogo, m’ujebre ku mo, mi thwoni dhiang’ kubang’e kubang’e; man ng’et mogo ma yom apaje ario ni lam mi mogo, m’ujebre ku mo, mi nyog rombo acel;

¹³man ng’ete mir apaje mi mogo ma yom m’ujebre ku mo ni lam mi mogo mi nyithi rombe kubang’e kubang’e; ni lam m’awang’a mi ng’wic mido ma ng’ar, lam ma jutimo ku mac ni Yehova.

¹⁴Man lam m’amadhane bibedo ng’et pigulok ma i amorpi mi thwon dhiang’, man ng’ete mir adege ma i amorpi mi nyog rombo, man ng’ete mir ang’wende ma i amorpi mi nyathi rombo: maeni en e lam m’awang’a mi dwi kubang’e kubang’e cil ku ba dwi ceke mi rundi.

¹⁵Man nyog diel acel ubed ni lam mi dubo ni Yehova; jubithiere umed lam m’awang’a ma thiri thiri, ku lam m’amadhane.

¹⁶Man i dwi ma kwong’ane, i ceng’ apar wi ang’wende mi dwi, en e kadhukuwijo pa Yehova.

¹⁷Man i ceng’ apar wi abije mi dwi maeni bibedo agba: jubicamu kwen ma thobi mbe i ie ceng’ abiro.

¹⁸Ceng’ ma kwong’ane bibedo cokri ma leng’: wubitimo tic moko ma jumuli ko ngo;

¹⁹ento wubithiero lam ma jutimo ku mac, lam m’awang’a ni Yehova: thwoni dhiang’ ario m’aradu, ku nyog rombo acel, ku nyithi nyogi rombe abiro ma rundigi acel acel; gibibedo ma mulima mbe i kumgi iwu;

²⁰man lam mi mogone, mogo ma yom ma jujebo ku mo: wubithiero ng’ete mir apaje adek mi thwon dhiang’, man ng’ete mir apaje ario mi nyog rombo:

²¹wubithiero ng’ete mir apaje acel mi nyithi rombe abiro kubang’e kubang’e;

²²man nyog diel acel ni lam mi dubo, kara utim adunya piwu.

²³Wubithiero maeni umed lam m’awang’a mi kugweno, ma en e ni lam m’awang’a ma thiri thiri.

²⁴Wubithiero ceng’ ku ceng’ calu maeni, ceng’ abiro, cemo mi lam ma jutimo ku mac, ni ng’wic mido ma ng’ar ni Yehova: jubithiere umed lam m’awang’a ma thiri thiri, ku lam m’amadhane.

²⁵Man i ceng’ abirone wubibedo ku cokri ma leng’; wubitimo tic moko ma jumuli ko ngo.

²⁶I ceng’ mi landu mwoka bende, kinde ma wuthiero lam mi mogo ma nyen ni Yehova i agba mu mi yenga, wubibedo ku cokri ma leng’; kud wutim tic moko ma jumuli ko;

²⁷ento wubithiero lam m’awang’a ni ng’wic mido ma ng’ar ni Yehova: thwoni dhiang’ m’aradu ario, nyog rombo acel, nyithi nyogi rombe abiro ma rundigi acel acel;

²⁸ku lam mi mogone, mogo ma yom ma jujebo ku mo, ng’ete mir apaje adek mi thwoni dhiang’ kubang’e kubang’e, ng’ete mir apaje ario mi nyog rombo acel,

²⁹ng’ete mir apaje mi nyithi rombe kubang’e kubang’e mi nyithi rombe abiro;

³⁰nyog diel acel, kara utim adunya iwu.

³¹Umed lam m’awang’a ma thiri thiri, ku lam mi mogone, wubithierogi (gibibedo iwu ma mulima mbe i kumgi), ku lam m’amadhane.