Read Alur Wel 30 Bible Online

Wel 30 - Alur bible

Wel 30

¹E Musa yero ni wi suru mi nyithindho mir Israel, ewacu kumae, Maeni gin ma Yehova ng’olo.

²Kinde ma dhanu ng’olo lembang’ola ni Yehova, kadi ekwong’o kwong’ kara etwi ng’eyong’ec pare ku twic, ebituro lembe pare ngo; ebitimo calku gin ceke m’uai kud i dhoge.

³E kinde ma dhaku bende ng’olo lembang’ola ni Yehova, man etwire gire ku twic, m’ebedo i ot pa won, i aradune,

⁴e won uwinjo lembang’ola pare, ku twic m’etwio ko ng’eyong’ec pare, man won uling’ i kume; e lembang’ola pare ceke bilund cungo, ku twic ceke kubang’e kubang’e m’etwio ko ng’eyong’ec pare bicungo.

⁵Ento tek won ukwere i ceng’ m’ewinjo, lembang’ola pare mbe, kadi twic m’etwio ko ng’eyong’ec pare de mbe, ma bicungo: e Yehova biweko ire, kum won ukwere.

⁶Man tek ebedo ku nico, kinde ma lembang’ola pare ni i wie, kadi wec mi dendhoge m’ukadhu, m’etwio ko ng’eyong’ec pare,

⁷e nico pare winjo maeno, man eling’ i kume i ceng’ m’ewinje; e lembang’ola pare bilund cungo, man twic m’etwire ko bilund cungo.

⁸Ento tek cware kwere i ceng’ m’ewinjo, ebilund thiro lembang’ola ma ni i wie, man wec mi dendhoge m’ukadhu, m’etwio ko ng’eyong’ec pare: man Yehova biweko ire.

⁹Ento lembang’ola pa dhaku ma nico pare tho, kadi pa ng’atu ma nico pare rieme, cil gin ceke m’etwio ko ng’eyong’ec pare, bicungo i kume.

¹⁰Man tek eng’olo lembang’ola i ot pa cware, kadi etwio ng’eyong’ec pare ku twic mi kwong’,

¹¹e cware winjo, man ebedo ling’ i kume, man ekwere ngo; e lembang’ola pare ceke bicungo, man twic kubang’e kubang’e m’etwio ko ng’eyong’ec pare bicungo.

¹²Ento tek cware thirogi man ediogi piny i ceng’ m’ewinjogi, e gin ma tek uai i dendhoge pi lembang’ola pare, kadi pi twic mi ng’eyong’ec pare, bicungo ngo: cware thirogi; e Yehova biweko ire.

¹³Ku ba lembang’ola ceke, man ku ba kwong’ mi twic ceke mi sendo ng’eyong’ec, cware copo ketho ecungo, kadi cware copo thire.

¹⁴Ento tek cware bedo ling’ ndhu i kume ceng’ ku ceng’, e eketho lembang’ola pare ceke cungo, kadi twic pare ceke, ma ni i wie: eketho gicungo, kum ebedo ling’ i kume i ceng’ m’ewinjogi.

¹⁵Ento tek ethirogi man ediogi piny yo ng’ei m’ewinjogi, e ebiyeyo dubo pare.

¹⁶Maeni cik, ma Yehova ng’olo ni Musa, i kind nico ku cege, i kind wego ku nyare, ma eni i aradu pare, i ot pa won.