Read Alur Wel 32 Bible Online

Wel 32 - Alur bible

Wel 32

¹Nwang’u nyithindho pa Ruben man nyithindho pa Gad gi weg udul lim ma dit apila: e kinde ma gineno ng’om mi Yazer, ku ng’om mi Gilead, nia, nen, ka maeno en e ka mi lim;

²nyithindho pa Gad ku nyithindho pa Ruben gibino ma giyero ni Musa, man ni Eleazar ma jalam, man ni judongomawijo mir udul, giwacu kumae,

³Ataroth, ku Dibon, man Yazer, ku Nimra, man Hecbon, ku eleale, man Sebam, man Nebo, ku Beon,

⁴en e ng’om ma Yehova goyo i wang’ udul mir Israel, en e ng’om mi lim; man jutic peri gi weg lim.

⁵E giwacu kumae, Tek wanwang’u bero i weng’i, wek jumi ng’om maeni ni jutic peri ubed ni piny; kud wuterwa loka Yordan.

⁶E Musa wacu ni nyithindho pa Gad man ni nyithindho pa Ruben kumae, Utumegwu bicidho ba lwiny, man wubibedo keni?

⁷Man pirang’o wudwoko cwiny nyithindho mir Israel ng’ic kum kadhu lokaca i ng’om ma Yehova mio igi?

⁸Kwaruwu timo kumeno, kinde m’aorogi kud i Kadec-barnea nineno ng’om.

⁹Kum ka giidho malu ba poga mi Eckol, man gineno ng’ombe, gidwoko cwiny nyithindho mir Israel ng’ic, kara ku gimond i ng’om ma Yehova mio igi.

¹⁰E ng’ecwiny pa Yehova opo i ceng’ maeca, e ekwong’o, ewacu kumae,

¹¹Andha ng’atu moko mbe m’uai i Misiri, ugambre ma rundine pier ario ku ma sagu, ma bineno ng’om m’akwong’o ni Forahim, ni Isak, man ni Yakobo; kum giluba ku cwiny gi ceke ngo:

¹²ndhu Kaleb ma wod Yefune ma Jakenizi, ku Yocuwa ma wod Nun; kum gilubo Yehova ku cwinygi ceke.

¹³E ng’ecwiny pa Yehova opo kum Israel, man eketho gidhokri kun ku kun i langa rundi pier ang’wen, maram dhanum’utuk ceke, m’utimo rac i wang’ Yehova, githum ko.

¹⁴Man, nen, wucungo i ka pa kwaruwu, nyai mi judubo, kara wumed ng’ecwiny pa Yehova ma lake tek kendo yo bang’ Israel.

¹⁵Kum tek wulokru cen ku lube, ebiwekogi i langa kendo; e wubinyotho dhanu maeni ceke.

¹⁶E gicoro ceng’ni i bang’e, man giwacu kumae, Wabigoyo dwol keni mi lim mwa, man adhura mi nyithindho mwa ma thindho:

¹⁷ento wan giwa wabibedo ayika ku jamtho mi cidho i wang’ nyithindho mir Israel, maram watero kogi kakagi: e nyithindho mwa ma thindho bibedo i adhura mwa ma tek kum ju m’ubedo i ng’ombe.

¹⁸Wabidwogo ba udi mwa ngo, ma fodi nyithindho mir Israel kunwang’u aba migi ngo kubang’gi kubang’gi.

¹⁹Kum wabinwang’u aba karacelo kugi ngo loka Yordan, man yor i wang’gi; kum aba mwa podho iwa lokani ng’et Yordan yo nyangu.

²⁰E Musa wacu igi kumae, Tek wubitimo gin maeni, tek wubironjru giwu ku jamtho mi cidho i wang’ Yehova ba lwiny,

²¹man ku ba dhanu m’i kindwu m’ubedo aronya ku jamtho bikadhu Yordan i wang’ Yehova, maram eriemo ko judegine kud i wang’e,

²²man jumwonyo ng’ombe i wang’ Yehova; yo ku ng’eye wubilund dwogo, man wubibedo ma lembe mbe i wiwu yo ba Yehova, man yo bang’ Israel; e ng’om maeni bibedo iwu ni piny i wang’ Yehova.

²³Ento tek wubitimo kumeni ngo, nen, wudubo ni Yehova; man wung’ei andha nia dubo mu binwang’uwu.

²⁴Wugom adhura ni nyithindho mu ma thindho, man dwol ni rombe mu; man wutim gin m’uai kud i dhogwu.

²⁵E nyithindho pa Gad man nyithindho pa Ruben, giyero ni Musa, giwacu kumae, Jutic peri bitimo calu rwodha ng’olo.

²⁶Nyithindho mwa ma thindho, ku mon mwa, kud udul rombe mwa, man lim mwa ceke, bibedo kuca i adhura mi Gilead;

²⁷ento jutic peri bikadhu lokaca, ku ba dhanu ceke m’ubedo aronya mi lwiny, i wang’ Yehova ba lwiny, calu rwodha wacu.

²⁸Kum kumeno Musa ng’olo lembe pigi ni Eleazar ma jalam, man ni Yocuwa ma wod Nun, man ni wi udi pa wego mi suru mi nyithindho mir Israel.

²⁹E Musa wacu igi kumae, Tek nyithindho pa Gad ku nyithindho pa Ruben gikadhu karacelo kudu loka Yordan, ku ba dhanu ceke m’ubedo aronya ku jamtho ba lwiny, i wang’ Yehova, e ng’om bibedo amwonya i weng’wu; wubilund mio igi ng’om mi Gilead ni piny:

³⁰ento tek gibikadhu lokaca karacelo kudu aronya ku jamtho ngo gibibedo ku piny i kindwu i ng’om Kanan.

³¹Man nyithindho pa Gad ku nyithindho pa Ruben giloko lembe giwacu kumae, Calu Yehova wacu ni jutic peri, e wabitimo kumeca.

³²Wabikadhu lokaca aronya ku jamtho i wang’ Yehova i ng’om mi Kanan man piny mir aba mwa bidong’ karacelo kudwa loka Yordan.

³³E Musa mio igi, en e ni nyithindho pa Gad, man ni nyithindho pa Ruben, man ni ng’et suru pa Manase ma wod Yusuf, ker pa Sihon m’ubimo mi Juamori, man ker pa Og m’ubimo mi Bacan, en e ng’om, calkud adhurane ku kieune, cil adhura mi ng’om m’utieke gbur.

³⁴E nyithindho pa Gad gigomo Dibon, kud Ataroth, man Aroer,

³⁵ku Atroth-cofan, man Yazer, ku Yogbeha,

³⁶man Beth-nimra, ku Beth-haran: adhura ma tek, man dwol mi rombe.

³⁷Man nyithindho pa Ruben ugomo Hecbon man Eleale, ku Kiriathaim,

³⁸man Nebo, ku Bal-meon (ma nying’gi lokre), man Sibma: man gimio nying’ mange ni adhura ma gigomo.

³⁹Man nyithindho pa Makir ma wod Manase cidho ba Gilead, man gimake, man giyaku piny mi Juamori ma nuti i ie.

⁴⁰E Musa mio Gilead ni Makir ma wod Manase; e ebedo i ie.

⁴¹E Yair ma wod Manase cidho man egamu pacune, manelwong’ogi Havoth-yair.

⁴²Man Noba cidho man emaku Kenath, ku pacune, man elwong’e Noba, calu nyinge gire.