Read Alur Wel 4 Bible Online

Wel 4 - Alur bible

Wel 4

¹Man Yehova yero ni Musa man ni Harun, ewacu kumae,

²Gam wel wot Kohath ku kind wot Lawi, ku ba wat migi ku ba wat migi, ku ba udi pa weggi ku ba udi pa weggi,

³ugambre kum rundi pier adek ku ma sagu cil kum rundi pier abic, dhanu ceke m’umondo i tic kara gitim tic i hema mi cokri.

⁴Maeni en e tic mi wot Kohath i hema mi cokri, kum gin ma leng’ m’usagu:

⁵kinde ma gonjo tugo woth, Harun bimondo, giku wote, man gibitugo kusikabongu mi voi, man gibiumo sanduk mi lembatuca kude,

⁶man gibiume ku lau yedi m’i nam, man gibipedho bongu m’ulweku ceke i wie, man gibiroyo yende i kume.

⁷Man gibipedho bongu m’ulweku wi mesa mi kwen m’anyutha, man gibiketho atangla i wie, kud upal, ku tabu man kikombe ma jukonjo ko; man kwen ma thiri thiri bibedo i wie:

⁸man gibipedho bongu ma kwar ngbo i wigi, man gibiumo maeno ku lau yedi m’i nam, man gibiroyo yende i kume.

⁹Man gibigamu bongu m’ulweku, e gibiumo thethala mi der, ku thalane, ku makasine, ku wer mi makasine, kud agulu ceke mi mo, ma gitimo kudo ire:

¹⁰man gibikethe kud agulune ceke yor i jambum mi lau yedi m’i nam, man gibikethe wi yen.

¹¹Man gibipedho bongu m’ulweku wi pemblam mi mola ma kwar, man gibiume ku jambum mi lau yedi m’i nam, man gibiroyo yende’:

¹²man gibigamu agulu ceke mi timotim, ma gitimo kudo i kamaleng’, man gibikethogi i bongu m’ulweku, man gibiumogi ku jambum mi lau yedi m’i nam, man gibikethogi wi yen.

¹³Man gibikabu vuru woko ku kum pemblam, man gibipedho bongu m’uluga i wie:

¹⁴man gibiketho agulune ceke i wie, ma gitimo tim kudo i vute, atangla mi mac, ku gol mi ring’o, kud upal, kud alibi, kud agulu ceke mi pemblam; man gibipedho jambum mi lau yedi m’i nam i wie, man gibiroyo yende.

¹⁵Man kinde ma Harun ku wote gidaru umo kamaleng’, ku jamni ceke mi kamaleng’, kinde ma gonjo maku tugo woth; yo ng’ei maeno, wot Kohath bibino yeye: ento gibimulo kum gin ma leng’ ungo, gimaru tho. Gin maeni en e ter mi wot Kohath i hema mi cokri.

¹⁶Man kur pa Eleazar ma wod Harun ma jalam bibedo mo mi der, kud udok ma ng’wice ng’ar ma lim lim, ku lam mi mogo ma thiri thiri, ku mo mir awira, man kur mi hema dho, ku gin ceke ma ni i ie, kamaleng’, ku jamnine.

¹⁷E Yehova yero ni Musa man ni Harun, ewacu kumae,

¹⁸Kud wukab suru mi wat mi Jukohathi ku kind Julawi;

¹⁹ento wutim kumae i kumgi, kara gibed kwo, man ku githo, kinde ma gibino ceng’ni ba gin ma leng’ m’usagu: Harun ku wote bimondo, man gibikethogi kubang’gi kubang’gi ng’atuman ba tic pare man ba ter pare;

²⁰ento gibimondo nineno kamaleng’ kadok nyathigi de ngo, gimaru tho.

²¹Man Yehova yero ni Musa, ewacu kumae,

²²Gam wel mi wot Gercon bende, ku ba udi pa weggi ku ba udi pa weggi, ku ba wat migi ku ba wat migi;

²³ikwangi ugambre kum rundi pier adek ku ma sagu cil kum rundi pier abic; dhanu ceke, m’umondo nikuro tic kara gitim tic i hema mi cokri.

²⁴Maeni en e tic mi wat mi Jugerconi, i timo tic man i yeyo ter:

²⁵gibiyeyo kusikabongu mi hema, man hema mi cokri, ku jambumne, ku jambum mi lau yedi m’i nam ma ni i wie, ku voi mi dhugola mi hema mi cokri,

²⁶ku gang’bongu mi lelagang’, man voi mi dhugola mi dhugang’ mi lelagang’, ma ni kum hema man kum pemblam m’utieke gbur, ku thondhe, man jambtic ceke mi tije, ku gin ceke ma tek jubitimogi ko: gibitimo i ie.

²⁷Tic ceke mi wot Jugerconi, i ter migi ceke, man i tic migi ceke bibedo ni kum lembang’ola pa Harun ku wote; man wubing’olo igi ter migi ceke i kur.

²⁸Maeni tic mi wat mi wot Jugerconi i hema mi cokri: man kur migi bibedo the cing Ithamar ma wod Harun ma jalam.

²⁹Pi wot Merari, ibikwanugi ku ba wat migi ku ba wat migi, ku ba udi pa weggi ku ba udi pa weggi;

³⁰ibikwanugi gambre kum rundi pier adek ku ma sagu cil kum rundi pier abic, ku ba dhanu ceke m’umondo i tic, kara gitim tic i hema mi cokri.

³¹Man maeni en e kur mi ter migi, calku tic migi ceke i hema mi cokri: bau mi hema, ku riune, ku mbegine, ku weme,

³²ku mbegi mi lelagang’ gbur, man weme ku gutene, ku thondhe, karacelo ku jamb ticne ceke, man karacelo ku tic migi ceke: man ku nying’gi wubiketho jambtic mi kur mi ter migi.

³³Maeni tic mi wat mi wot Merari, calku tic migi ceke, i hema mi cokri, the cing Ithamar ma wod Harun ma jalam.

³⁴Man Musa giku Harun ku judongomawijo mir udul gikwanu wot Jukohathi ku ba wat migi ku ba wat migi, man ku ba udi pa weggi man ku ba udi pa weggi,

³⁵ugambre kum rundi pier adek ku ma sagu cil kum rundi pier abic, dhanu ceke kubang’gi kubang’gi m’umondo i tic, pi tic i hema mi cokri:

³⁶man dhanu migi ma jukwanu welgi ku ba wat migi ku ba wat migi gi rubanga ario ku dak abiro ku pier abic.

³⁷Maeni gi ju ma jukwanu welgi mi wat mi Jukohathi, dhanu ceke m’utimo i hema mi cokri, ma Musa giku Harun gikwanu welgi calku lembang’ola pa Yehova ni kum Musa.

³⁸Man maeno ma jukwanu welgi mi wot Gercon, wat migi, man ku ba udi pa weggi ku ba udi pa weggi,

³⁹ugambre kum rundi pier adek ku ma sagu cil kum rundi pier abic, ku ba dhanu ceke m’umondo i tic, pi tic mi hema mi cokri,

⁴⁰cil dhanu migi ma jukwanugi, ku ba wat migi ku ba wat migi, ku ba udi pa weggi ku ba udi pa weggi, gi rubanga ario ku dak abusiel ku pier adek.

⁴¹Maeni gi ju ma jukwanu mi wat mi wot Gercon, dhanu ceke m’utimo i hema mi cokri, ma Musa giku Harun gikwanu welgi calku lembang’ola pa Yehova.

⁴²Man ju ma jukwanu welgi mi wat mi wot Merari, ku ba wat migi ku ba wat migi, ku ba udi pa weggi ku ba udi pa weggi,

⁴³ugambre kum rundi pier adek ku ma sagu cil kum rundi pier abic, ku ba dhanu ceke m’umondo i tic, pi tic i hema mi cokri,

⁴⁴en e dhanu migi ma jukwanu welgi ku ba wat migi ku ba wat migi, gi rubanga adek ku dak ario.

⁴⁵Maeni gi ju ma jukwanugi mi wat mi wot Merari, ma Musa giku Harun gikwanu calku lembang’ola pa Yehova ni kum Musa.

⁴⁶Dhanu ceke ma jukwanu mi Julawi, ma Musa giku Harun man judongomawijo mir Israel gikwanu, ku ba wat migi ku ba wat migi man ku ba udi pa weggi ku ba udi pa weggi,

⁴⁷ugambre kum rundi pier adek man ma sagu cil kum rundi pier abic, ku ba dhanu ceke m’umondo kara etim tic mi timotim, man tic mi yeyo ter i hema mi cokri,

⁴⁸en e dhanu migi ma gikwanugi, gi rubanga abora ku dak abic ku pier abora.

⁴⁹Calku lembang’ola pa Yehova Musa kwanugi, ku ba dhanu ceke calku tic pare, man calku ter pare: e ekwanugi kumeca, calu Yehova ng’olo ni Musa.