Read Alur Wel 9 Bible Online

Wel 9 - Alur bible

Wel 9

¹Man Yehova yero ni Musa i langa mi Sinai i dwi ma kwong’ane mi rundi mir arionde yo ng’ei ai ma giai ko woko kud i ng’om Misiri, ewacu kumae,

²Mange ke wek nyithindho mir Israel gikwir kadhukuwijo i nindo ma jung’olo.

³I ceng’ apar wi ang’wende mi dwi maeni, uthieno, wubikwire i nindo ma jung’olne calku cikne ceke, man calku lembapokao: ceke, wubikwire.

⁴E Musa yero ni nyithindho mir Israel, nia gikwir kadhukuwijo.

⁵Man gikwiro kadhukuwijo i dwi ma kwong’ane, i ceng’ apar wi ang’wende mi dwije, uthieno, i langa mi Sinai: calku gin ceke ma Yehova ng’olo ni Musa, nyithindho mir Israel gitimo kmneca.

⁶E dhanu moko nuti, ma gicido ni kum avu mi dhanu ketho nia gicopo kwiro kadhukuwijo ngo i ceng’ maeca: e gibino i wang’ Musa man i wang’ Harun i ceng’ maeca:

⁷e dhanu maeno giwacu ire kumae, wacido ni kum avu dhanu: jucerowa nedi, ya ku wathier girathiera pa Yehova i nindo ma jung’olo i kind nyithindho mir Israeli?

⁸E Musa wacu igi kumae, Wukur, kara awinj gin ma Yehova bing’olo piwu.

⁹E Yehova yero ni Musa, ewacu kumae,

¹⁰Yer ni nyithindho mir Israel, wac kumae, Tek ng’atu moko ma mu kadi dhanum’utuk mu bibedo m’ecido ni kum avu, kadi bibedo i woth ma bor, ento ebikwiro kadhukuwijo ni Yehova.

¹¹I dwi mir arionde i ceng’ apar wi ang’wende uthieno gibikwire; gibicame ku kwen ma thobi mbe i ie man uboko ma kec:

¹²gibiweko kume moko ngo mi kugweno, kadok cogone de gibituro ngo: gibikwire calku cik ceke mi kadhukuwijo.

¹³Ento dhanu m’ubedo leng’, m’ubedo i woth ungo, man eweko kwiro kadhukuwijo, jubikabu ng’eyong’ec maeno woko ku ba juthugi; kum ethiero girathiera pa Yehova ngo i nindo ma jung’olo, ng’atu maeno biyeyo dubo pare.

¹⁴Man tek jawirok bibedo ni umondo i kindwu, man eyenyo ekwir kadhukuwijo ni Yehova; calku cik mi kadhukuwijo, man calku lembapokane, ebitimo kumeca: wubibedo ku cik acel, ni umondo, man ni ng’atu ma junyolo i ng’om.

¹⁵Man i ceng’ ma juting’o ie hema malu afuru umo hema, en e hema mi lembatuca: man uthieno eni wi hema calu en e ayi mac, cil kugweno.

¹⁶E ebedo kumeca ceng’ ceke: afuru ume, man enen calu mac ku diewor.

¹⁷E kinde ma tek afuru ai ku wi Hema, yo ng’ei maeno nyithindho mir Israel giwotho: man i ka ma afuru bedo, nyithindho mir Israel gigonjo keca.

¹⁸Nyithindho mir Israel giwotho ni kum lembang’ola pa Yehova, man gigonjo ni kum lembang’ola pa Yehova: gidong’ i kagonjo cil ma fodi afuru bedo wi hema.

¹⁹E kan afuru bedo wi hema nindo dupa, e nyithindho mir Israel gigwoko kur pa Yehova, man giwotho ngo.

²⁰Man nindo moko afuru bedo nindo ma nyanok wi hema; e gidong’ i kagonjo calku lembang’ola pa Yehova, man giwotho calku lembang’ola pa Yehova.

²¹Man nindo moko afuru bedo gambre uthieno cil kugweno; e kinde ma afuru tingre kugweno, giwotho: kadi tek ebedo ku dieceng’ man ku diewor, kinde ma afuru tingre, giwotho.

²²Kadok en e ceng’ ario, kadi dwi, kadi rundi, ma afuru galu wi hema, m’ebedo i wie, nyithindho mir Israel gibedo i kagonjo, gitugo woth ungo; ento kinde m’etingre, giwotho.

²³Gigonjo ni kum lembang’ola pa Yehova, man giwotho ni kum lembang’ola pa Yehova: gigwoko kur pa Yehova, ni kum lembang’ola pa Yehova ni kum Musa.