Read Alur Mika 1 Bible Online

Mika 1 - Alur bible

Mika 1

¹Lembe pa Yehova m’ubino ba Mika ma Jamoracti i nindo pa Yotham, kud Ahaz, man Hezekia, ma gin ubimo mi Yuda, m’eneno pi Samaria ku Yerusalem.

²Wuwinji, wu kodhidhanu, kewu ceke; winji, E ng’om, ku gin ceke ma ni i ie: man wek Rwoth Yehova bed jamulembe i kumwu, Rwoth kud i hekalu pare ma leng’.

³Kum, nen, Yehova ai woko kud i kakare, man ebiloro piny, man ebinyono ka ma malu mi ng’om.

⁴E gudi biloi i there, man poga bikak, calu udogyen i wang’ mac calu pi m’ukonjre ku ka ma lung’.

⁵Maeni ceke wok kum gondri pa Yakobo, man kum dubo mi ot mir Israel. Gondri pa Yakobo en e ang’o? en e Samaria ngo? man ka ma malu pa Yuda ang’o? gi Yerusalem ngo?

⁶Ka kumeno abidwoko Samaria ni udhuru mi thim, man calu ka ma jupidho ie podho mir ulok; man abibayu kidine piny i poga, man abiyabu there.

⁷Man ayi gin m’acwia m’ang’ika pare jubiodo nziki nziki, man sukulia pare ceke jubiwang’u ku mac, man abiketho mungu pare m’araga ceke bedo kende; kum ecokogi ku sukulia pa won asara, man gibidok ba sukulia pa won asara.

⁸Pi maeni abiywak man abigoyo nduru; abicidho mbe kendi man muneru; abitimo goyonduru calu utho, man ywak calu udo.

⁹Kum lero pare cangre ngo; kum ewok cil kum Yuda; etundo ba dhugang’ mi dhanu para, cil kum Yerusalem.

¹⁰Kud wuyere i Gath, kud wuywak ki; ang’iela i utur i Beth-leafra.

¹¹Kadh cen, E ng’atu m’ubedo i Cafir, i muneru man lewic: ng’atu m’ubedo i Zanan uwok woko ngo; goyonduru mi Beth-ezel bikabu kacungo kud i beng’wu.

¹²Kum ng’atu m’ubedo i Maroth ukuro gin ma ber hai, kum lem ma rac uloro piny ku ba Yehova cil kum dhugang’ mi Yerusalem.

¹³Twi magali kum riuni ma jang’wec, E ng’atu m’ubedo i Lakic: en e thekri mi dubo ni nya Sayuni; kum gondri mir Israel unwangre ii.

¹⁴Ka kumeno ibimio giramia mi pokri mi Moreceth-gath: udi mi Akzib bibedo gin mir abombi ni ubimo mir Israel.

¹⁵Fodi abikelo i beng’i, E ng’atu m’ubedo i Mareca, ng’atu ma bimwonyi: dwong’ mir Israel bibino cil kum Adulam.

¹⁶Luny wii, man thum yukwii woko ni nyithindho mir anyong’a peri: kok dhu wii m’uwang’ calu acur; kum gicidho i ng’eca kud i beng’i.