Read Alur Nahum 3 Bible Online

Nahum 3 - Alur bible

Nahum 3

¹Can wi adhura mi rimo! epong’ ceke ku ndra man rop; amaci ai ungo.

²Ba del, bang’ ukobre m’uyengre, man riuni m’ubedo keth keth, man magali m’uringo aringa,

³idho pa won riuni, man mil mi palamularu, ku rieny mi tong’, man udul mi ju ma junego, udhuru ma dit de mir avu, man kajik mi kum umbe; gipodho wi kumgi;

⁴kum udul asara pa won asara ma nen ber, ma en e dhaku mir ajoga, m’eloko thek ni kum asara pare, man juudi ni kum ajoga pare.

⁵Nen, agoyo kora i kumi, Yehova mir udul uwacu, man abiyabu kendi peri ma lor lor i weng’i; man abinyutho muneru peri ni thek, man lewic peri ni ker.

⁶Man abibolo cilo ma judagu i wii, man abidwoki ni won cilo, man abikethi calu giranena.

⁷Man ebitimbre, nia dhanu ceke ma gineni gibipiei kud i beng’i, man gibiwacu kumae, Nineve nyothre: ng’a ma biywage? abiyenyo iri jujuk kani?

⁸I ber ma sagu No-amon, ma yang’ ubedo i kind kulo ma dongo, m’ubedo ku pi m’utieke gbur; ma ot ma tek pare en e nam, man gang’ pare en e mi nami?

⁹Ethiopia man Misiri gi tego pare, man en embe ku kieu; Put man Lubim naka gi jukony peri.

¹⁰Ento jutere woko, ecidho i ng’eca; nyithindho pare ma thindho bende jurwadugi nziki nziki wi gengi ceke; man gibolo gagi pi dhanu pare mi yung, man dhanu pare ma dongo ceke jutwiogi ku nyoro.

¹¹In bende ibimer ku giramadha; jubikeni; ibiyenyo ot ma tek bende kum judegi.

¹²Ot ma tek peri ceke bibedo calu yendubolo kud ubolo m’ular ucek: tek juyengogi, gipodho i dhu jacam.

¹³Nen, dhanu peri ma ni i beng’i gi mon; dhugang’ mi ng’om peri gibedo thwolo ni judegini: mac uwang’u ukol peri.

¹⁴Twom pi iri pir atiek; dwok ot ma tek peri tek; mond i ulobo, man inyon ulobone; dwok kawang’ biriki tek.

¹⁵Mac biweng’i keca; palamularu bithumi woko; ebicemi pami nyathi bonyo: dwokri giri dupa calu nyithi bonyo; dwokri giri dupa calu bonyo.

¹⁶Imedo jukuloka peri ma sagu cero m’i polo: nyathi bonyo nyotho, man eduny.

¹⁷Judongomawijo peri gi calu bonyo, man jugorcik peri gi calu udul usene, m’ugonjo i arara i ceng’ mi koyo, ento ka ceng’ udongo giduny, man kakagi ng’eire ngo ka ma gibedo i ie.

¹⁸Jukwac peri ginindo, E ubimo mir Ascur; weg yung peri giyom; dhanu peri gilal wi gudi, man ng’atu moko mbe ma coko dhoggi.

¹⁹Jwik mi rem peri mbe; lero peri dit: dhanu ceke m’uwinjo rwongi giteng’o cing’gi i wii; kum ng’a ma dubo peri kukadhu thiri thiri ngo i wie?