Read Alur Habakuk 2 Bible Online

Habakuk 2 - Alur bible

Habakuk 2

¹Abicungo wi kur para, man abikethra wi odkur, e abing’io kara anen gin m’ebiweco kuda, man gin m’abiloko pi lem dhau para.

²E Yehova loko lembe ira, ewacu kumae, Kieu ginmawokiwang’, man keth ebed ngbeng’ wi ban, kara ng’atu m’usome ringi.

³Kum ginmawokiwang’ fodi en e pi nindo ma juketho, man etimo pio i dhu kajikne, man ebicwayu ndra ngo: kadok egalu, kure; kum ebibino andha, ebigalu ngo.

⁴Nen, ng’eyong’ec pare tingre, ebedo pwe i ie ngo; ento won bedopwe bibedo ni kum yioyic pare.

⁵Eyo, karacelo ku maeni, pigulok en e jatim awondi, ng’atu ma tingre, m’ebedo thugi ngo; m’emedo avane calu liel, man en e calu tho, ma jucopo yeng’e de ngo, ento ecoko thek i bang’e, man ecoko kodhidhanu ceke i bang’e.

⁶Maeni ceke gibiting’o lembabola i kume ngo, man agore ma ton i ijo i kume, man gibiwacu kumae, Can i wi ng’atu m’unyayu gin ma pare ngo! rokani? man m’uketho ter mi mukwatu i wie!

⁷Ju ma bikei biai pio ngo, man ju ma bidieng’o cwinyi gibiceu ungo, man ibibedo igi ngo ni ayeki?

⁸Kum iyaku thek dupa, dong’ kodhidhanu ceke gibiyeki, kum rimb dhanu, man kum rop m’utimbre kum ng’om, kum adhura man kum dhanu ceke m’ubedo i ie.

⁹Can wi ng’atu m’ugamu kuloka mi dubo mi ot pare, kara eketh ot pare malu, kara egonjre kud i cing’ mi dubo!

¹⁰Itimo lembapora mi lewic ni ot peri, ku thumo kodhidhanu dupa woko, man idubo kum ng’eyong’ec peri.

¹¹Kum kidi biywak kud i gang’kidi, man riu biloko ire lembe kud i yen.

¹²Can wi ng’atu m’ugomo pacu ku rimo, man m’uketho adhura nyang’ ni kum dubo!

¹³Nen, eai ba Yehova mir udul ungo nia kodhidhanu gimuli ku tic pi mac, man thek giol gigi kum gin ma ie nanu?

¹⁴Kum ng’om bipong’ ku ng’eyong’ec mi dwong’ pa Yehova, calu pi umo nam.

¹⁵Can wi ng’atu ma mio giramadha ni wadi, iri m’imedo kwir peri i ie, man imere bende, kara inen muneru migi!

¹⁶Ipong’ ku lewic, ku dwong’ re ngo: imadh bende, man ibed calu won yaa ngo; kikombe m’i cing’ Yehova ma yor acwic bilokre i wii, man lewic ma dit bibedo wi dwong’ peri.

¹⁷Kum rop m’utimbre kum Lebanon biumi, man nyoth mi yedi, m’unyayu lworo i igi; kum rimb dhanu, man kum rop m’utimbre kum ng’om, kum adhura ku dhanu ceke m’ubedo i ie.

¹⁸Ayi gin m’acwia m’apaya kulokane ang’o, ma jabodhone ng’ike; ayi gin m’acwia m’atwaga, cil japonji mi ndra, nia ng’atu m’utimo ayine gene, kara etim mungu m’araga ma weco ngo?

¹⁹Can wi ng’atu m’uwacu ni yen kumae, Ceu: ni kidi ma weco ngo de kumae, Ai malu! Maeni biponjo? Nen, jumwone ku mola ma kwar man ku mola ma tar, e yuyo moko mbe i ie tak de.

²⁰Ento Yehova ni i hekalu pare ma leng’: wek ng’om ngung’ ubed ling’ i wang’e.