Read Alur Habakuk 3 Bible Online

Habakuk 3 - Alur bible

Habakuk 3

¹Rwo pa Habakuk ma jabila, ni Cigionoth.

²E Yehova, awinjo rwongi, man lworo nega: E Yehova, yep tic peri i die rundi; I die rundi keth eng’eire: I kwinyo poi kum kisa.

³Mungu bino kud i Teman, Man Ng’atu Maleng’ kud i got Paran. Sela. Dwong’ pare umo polo. Man ng’om upong’ ku pak pare.

⁴Man rieny pare en e calu der; Der uai kud i cinge; Man keca en e kapondo mi tego pare,

⁵Thong’om cidho i wang’e, Guk m’uwang’ uai ku ba tiende.

⁶Ecungo, man eporo ng’om; Eneno, man elalu thek; Man gudi mi nja kethre mba; Ungulu gudi ma nja gigung’; Woth pare gi calu ma con.

⁷Aneno hema mi Kucan i can; Kusika mi ng’om Midian umiel.

⁸Thungo nego Yehova kum kulo ma dongo? Ng’ecwiny peri bedo kum kulo ma dongo, Kadi kwinyo peri kum nami? Ketho iwotho wi riuni peri, Wi magali peri mi bothi?

⁹Atum peri juketho bedo ngbeng’; Kwong’ ma jumio ni suru en e lemandha. Sela. Ikaku ng’om ku kulo ma dongo.

¹⁰Gudi gineni, e lworo negogi; Wavuvu mi pi kadhu; Nam uwodho dwande, Man eting’o cinge malu.

¹¹Ceng’ ku dwi gicungo ti i kabedo migi, Ni der mir athero peri ka gicidho, Ni rieny mi tong’ peri ka giriang’ni.

¹²Ikadhu kud i ng’om ku kwinyo; Iyoko thek i ng’ecwiny.

¹³Iwok ni both mi dhanu peri, Pi both pa ng’atu m’iwiro; Itong’o lero kud i ot pa jadubo, M’iyabu mbegi cil i ng’ut. Sela.

¹⁴Icobo wi jutego pare ku dul pare ma dhe: Gibino calu vira niketha woko; Anyong’a migi en e calu camu jucan nyalwe.

¹⁵Inyono nam ku riuni peri, Ngongo mi pi ma tek.

¹⁶Awinjo, man kuma miel, Dendhoga miel kum dwalne; Top umondo i cogona, man amiel i kakara; Kum akoakur be ceng’ mi can ling’ ling’, Kum bino mi dhanu ma gibino mwonyowa.

¹⁷Kum kadok yendubolo bithiwo ngo, Kadok nyingulok de bibedo mbe kum ulok; Kadok tic mir ulam de bijwik, Man pothi bicego cemo moko ngo; Udul rombe de bithumbre woko kud i kwac. Man dhok bibedo mbe i dwol:

¹⁸Ento anyong’a binega ni kum Yehova, Mutoro de binega ni kum Mungu mi both para.

¹⁹Yehova, ma Rwoth, en e tego para; Man edwoko tienda calu tiend ruda, Man ebiketho awotho wi ka ma malu para.