Read Alur Zefania 3 Bible Online

Zefania 3 - Alur bible

Zefania 3

¹Can i wie m’ejai man m’ecido! ni adhura ma lem pare ie tek!

²Eworo dwal ungo; ejolo ponji de ngo; egeno Yehova ngo: ecoro ceng’ni Mungu pare ngo.

³Judongomawijo pare ma ni ie gin umvor m’urundo; jupoklembe pare gin urudi mir uthieno; giweko gin moko ngo mir urwone.

⁴Jubila pare kitgi mbe man gi weg ambili; julam pare gicido kamaleng’, gigondo cik.

⁵Yehova i diere en e pwe; ebitimo dubo ngo; ekelo lembapoka pare kamaleng’ ku ba rupiny ku ba rupiny, erem ungo; ento ju ma pwe ngo ging’eyo lewic ungo.

⁶Athumo thek woko; gang’kidi migi m’utingre judwoko ni uvuru; judwoko gengi migi ni susu, ketho nia ng’atu moko mbe ma kadhu; adhura migi junyotho, ketho nia ng’atu moko mbe ma nuti, ketho nia ng’atu moko mbe ma bedo i ie.

⁷Awacu kumae, Ndhu ilwora; ijol ponji; ka kumeno kabedo pare bikabre woko ngo, calku gin ceke m’ang’olo pire: ento giai pir man ginyotho tic migi ceke.

⁸Ka kumeno wukura, Yehova wacu, cil i ceng’ m’abiai malu i ie ni amaci; kum aketho cwinya kum coko thek karacelo, kara acok ker karacelo, kara akonj ng’ecwiny para i wigi, cil ng’ecwiny para ceke ma lake tek; kum ng’om ceke biwang’ ku mac mi ngiri para.

⁹Kum i nindo maeca abiloko dhok ma leng’ ni kodhidhanu, kara gin ceke gilwong’ nying’ Yehova, kara gitim ire ku cwinygi acel.

¹⁰Ugambre loka kulo ma dit mir Ethiopia jurwo para, en e nya jupara ma julalu, gibikelo lam para.

¹¹I ceng’ maeca jubiketho lewic i wii ngo kum tic peri ceke m’idubo ie ira; kum i nindo maeca abikabu dhanu peri m’uyungre kud i kindi, man ibibedo jakuhaya kendo ngo i got para ma leng’.

¹²Ento abiweko i kindi dhanu ma jucan ma jusendogi, man gibinwang’u gwok i nying’ Yehova.

¹³Dong Israel bidubo ngo, kadi ndra de gibiyero ngo; kadok leb mir abombi de binwangre i dhoggi ngo; kum gibicamu man gibivuto piny, man ng’atu moko mbe ma binyayu lworo i igi.

¹⁴Wer, E nya Sayuni; kok, E Israel; anyong’a negi man ifoi kud adunde ceke, E nya Yerusalem.

¹⁵Yehova kabu pokolembe peri woko, ebayu jadegini woko: ubimo mir Israel, en e Yehova, eni i kindi; lworo binegi kendo ngo kum lem ma rac.

¹⁶I ceng’ maeca jubiwacu pi Yerusalem kumae, Lworo kud unegi; E Sayuni, cingi kud ukonjre.

¹⁷Yehova Mungu peri ni i kindi, ng’atu ma tek ma bibodho; anyong’a binege i kumi ku mutoro; ebiyom i mer pare; anyong’a binege i kumi ku wer.

¹⁸Abicoko ju ma can unegogi pi cokri mi rwo, ma naka gini i beng’i; ma lembaewa ma ni i wie en e cac.

¹⁹Nen, i nindo maeca abitimo i kum dhanu ceke m’usendi; man abibodho gin ma won abala, man abicoko gin ma juriemo woko; man abiketho gibedo ku pak man nying’ ma naka lewic migi ni i ng’om yu.

²⁰I nindo maeca abiroyowu, man i nindo maeca abicokowu; kum abiketho wubedo ku nying’ man pak kind kodhidhanu ceke m’i ng’om kinde m’abidwoko ng’eca mu i weng’wu, Yehova wacu.