Read Alur Zekaria 11 Bible Online

Zekaria 11 - Alur bible

Zekaria 11

¹Yab dhugola peri, E Lebanon kara mac uwang’ musonge peri.

²Goi nduru, yendsipre, kum musonge podho, kum maeno ma ber junyotho: wugoi nduru, E wu bongu mi Bacan, kum luli ma tek urungre piny.

³Dwand jukwac m’ubegoyo nduru mire! kum dwong’ migi nyothre: ba ywak mir umvor ma thindho mire! kum kuhaya mi Yordan unyothre.

⁴Yehova Mungu para wacu kumae: Wukwai udul rombe mir athuma;

⁵ma weggi thumogi, man ginen gigi nia gimbe ku dubo; man ju m’uloko gi giwacu kumae, Mugisa bed ni Yehova, kum a lony: e jukwac migi ma dhe kisa negogi ngo i kumgi.

⁶Kum kisa binega kendo ngo kum dhanu m’ubedo i ng’om, Yehova wacu; ento, nen, abiketho dhanu kubang’gi kubang’gi i cing wadi, man i cing ubimo pare; man gibigoyo ng’om, e abibodhogi ngo kud i cing’gi.

⁷Kum kumeno akwayu udul rombe mi thum, andha ma ng’ic i kind udul rombe. Man agamu ira uluth ario; acel alwong’o Ber, man mucelo alwong’o Giratwia; e akwayu udul rombe.

⁸Man athumo jukwac adek woko i dwi acel; kum ng’eyong’ec para ol kugi, man ng’eyong’ec migi daga bende.

⁹Alund awacu kumae, Abikwayuwu ngo; maeno m’utho wek etho; man maeni ma juthumo woko, wek juthume woko; man wek ju m’udong’ kubang’gi kubang’gi gicam ring juwagi.

¹⁰Man ating’o uluth para Ber, man athumo ie ario, kara atur lembariba para m’atimo ku kodhidhanu ceke.

¹¹E etur i ceng’ maeca; e kumeno ju ma ng’ic mir udul rombe m’uwora ging’eyo nia en e lembe pa Yehova.

¹²Man awacu igi kumae, Tek e ber i weng’wu, wumi ira sukulia para; tek kumeno ngo, wuweki. Ka kumeno giporo ira sente mi mola ma tar pier adek ni sukulia para.

¹³Man Yehova wacu ira kumae, Baye ni jacwiagulu, welpiny ma ber ma gikwana kudo. Man ating’o ng’et mola ma tar pier adek maeno, e abayugi ni jacwiagulu i ot pa Yehova.

¹⁴Alund athumo uluth para mucelo doko ario, en e Giratwia, kara atur umego ma kind Yuda kud Israel.

¹⁵Man Yehova wacu ira kumae, Gam i beng’i kendo jamtic pa jakwac ma jakasegu.

¹⁶Kum, nen, abiting’o jakwac i ng’om, m’ebiliewo ju m’uthumbri woko ngo, kadok ayenya de abiyenyo maeno ma julalugi ngo, kadi ebicangu maeno m’utur de ngo, kadi ebikwayu maeno m’ubedo bo de ngo; ento ebicamu ring rombo m’ucwe, man ebiyeco kind tiendgi tung’ tung’.

¹⁷Can wi jakwac ma kabang’e mbe m’uweko udul rombe mire! palamularu bibedo wi bote, man wi wang’e ma yor acwic: bote bital ceke, man wang’e ma yor acwic bicido vii.