Read Alur Zekaria 13 Bible Online

Zekaria 13 - Alur bible

Zekaria 13

¹I ceng’ maeca kulo m’udhenyni biyabre ni ot pa Daudi man ni ju m’ubedo i Yerusalem, pi dubo man pi cilo.

²Man ebitimbre i ceng’ maeca, Yehova mir udul uwacu, nia abithumo nying’ mungu m’araga woko kud i ng’om e jubipoi pigi kendo ngo; man abiwodho jubila ku tipo m’ucido bende woko kud i ng’om.

³Man ebitimbre nia, ka ng’atu moko biewo lembe asu, won ku min m’unyole bilund wacu ire kumae, Ibibedo kwo ngo; kum iyero ndra i nying’ Yehova; man won ku min m’unyole gibicobe plu kan eewo.

⁴Man ebitimbre i ceng’ maeca, nia lewic binego jubila kubang’gi nzu kum ginmawokiwang’, kan eewo; kadok kanzu mi yuklim gibikendo ngo kara gibomb abombi:

⁵ento ebiwacu kumae, An a jabila ngo, an a jatipodho; kum judwoka ni ng’eca ugambre m’a nyathin.

⁶E ng’atu acel biwacu ire kumae, Poyo maeni ma kind cingi en e ang’o? Ebilund dwoko lembe kumae, Maeni poyo mi rem ma junyayu i kuma i ot mi jurimba.

⁷Ceu, E palamularu, kum jakwac para, man kum ng’atu ma wada, Yehova mir udul uwacu: wugoi jakwac, e rombe bilal; e abiloko cinga wi ju ma thindho.

⁸Man ebitimbre, nia i ng’om ceke, Yehova wacu, ng’ete ario ma ni i ie bithumbre woko man bitho; ento mir adege bidong’ i ie.

⁹Man abikelo ng’ete mir adege i mac, e abidwokogi leng’ calu judwoko mola ma tar leng’, man abiponjogi calu juponjo mola ma kwar. Gibilwong’o nyinga, man abiwinjogi: abiwacu kumae, En e dhanu para; man gibiwacu kumae, Yehova en e Mungu para.