Read Alur Zekaria 14 Bible Online

Zekaria 14 - Alur bible

Zekaria 14

¹Nen, ceng’ pa Yehova bino, ka jubipoko ayeki i kindi.

²Kum abicoko thek ceke utim ali kum Yerusalem; man jubimaku adhurane, e jubiyaku udi, man jubitimo mon rac; man ng’et adhurane bicidho i ng’eca, man dong’ dhanu bithumbri woko ngo ku i adhurane.

³Yehova bilund cidho woko, man abitimo ali kum thek maeno, calu kan ekiedo i ceng’ mi lwiny.

⁴E tiende bicungo i ceng’ maeca wi got Zeituni, ma eni i wang’ Yerusalem ma yo nyangu; e got Zeituni bikak i diere yo nyangu man yo reto, man poga ma dit bibedo nuti; man ng’et got bicoro yor ariwa ma malu, man ng’ete yor ariwa ma yo piny.

⁵Man wubiringo kud i poga mi got para; kum poga mi got bitundo kum Azel; eyo, wubiringo, calu wuringo kud i wang’ digidi i nindo pa Uzia m’ubimo mi Yuda; e Yehova Mungu para bibino, ku ju ma leng’ ceke gikugi.

⁶E ebitimbre i ceng’ maeca, nia der bibedo mbe; ju m’urieny bicori cen:

⁷ento ebibedo ceng’ acel m’ung’eire ni Yehova; dieceng’ ungo, man diewor de ngo; ento ebitimbre, nia i kinde mir uthieno der bibedo nuti.

⁸E ebitimbre i ceng’ maeca, nia pi mi kwo biai kud i Yerusalem: ng’ete kucel yo ba nam ma yo nyangu, ng’ete mucelo ke yo ba nam ma yo reto: ebibedo i nindo mi lietho man i nindo mi koyo.

⁹Man Yehova bibedo Ubimo wi ng’om yu: i ceng’ maeca Yehova bibedo acel, nyinge de acel.

¹⁰Jubidwoko ng’om ceke calu Araba, ugambre Geba cil kum Rimon ma yor ariwa ma piny ni Yerusalem; e jubiting’e malu, man ebibedo i kakare, ugambre dhugang’ pa Benyamin cil kum ka mi dhugang’ ma kwong’ane, cil kum dhugang’ mi gui, man ugambre kum otkur pa Hananel cil kum pany mi bic p’ubimo.

¹¹E dhanu bibedo i ie, man kwong’ bibedo mbe kendo; ento Yerusalem bibedo museme.

¹²Man maeni bibedo thong’om ma Yehova bigoyo ko kodhidhanu ceke m’utimo ali kum Yerusalem: ring’kumgi bitop kinde ma gicungo wi tiendgi, man wang’gi bitop ku i ugone, man lebgi bitop kud i dhoggi.

¹³E ebitimbre i ceng’ maeca, nia masendi m’uai ba Yehova bibedo i kindgi; man gin kubang’gi nzu gibimaku cing’gi ng’atuman ku wadi man ku wadi, man cing’ ng’atuman bitingre malu kum cing’ wadi.

¹⁴Man Yuda bende bikiedo i Yerusalem; man lonyo mi thek ceke mi ng’ete gbur jubicoko karacelo, mola ma kwar, ku mola ma tar, man kendi, m’usagre.

¹⁵Man thong’om mi riuni, mi kana, mi ngamia, man mi kana ma tung’ man mi lim ceke ma bibedo nuti i kagonjo maeno, bibedo kumeno calu thong’om maeno.

¹⁶Man ebitimbre, nia ku ba dhanu nzu m’udong’ mi thek ceke m’ubino kum Yerusalem gibiidho malu ku ba rundi ku ba rundi nirwo ni Ubimo, Yehova mir udul, man nikwiro agba mi otbak.

¹⁷Man ebibedo, nia ng’atu ma mi juudi ceke mi ng’om ma kuidho malu i Yerusalem ungo nirwo ni Ubimo, Yehova mir udul, koth bicwi i wigi ngo.

¹⁸Man tek juot mi Misiri idho malu ngo, man gibino ngo, kadok i wigi de ebicwi ngo; maeni thong’om ma Yehova bigoyo ko thek m’uidho malu ngo nikwiro agba mi otbak.

¹⁹Maeni bibedo ponji mi Misiri, man ponji mi thek ceke ma giidho malu ngo nikwiro agba mi otbak.

²⁰I ceng’ maeca lembe bibedo wi ngara mi riuni kumae, LENG’ NI YEHOVA: man ajiku i ot pa Yehova bibedo calu tabu i wang’ pemblam.

²¹Eyo, ajiku ceke i Yerusalem man i Yuda bibedo leng’ ni Yehova mir udul; man dhanu ceke m’umio lam gibibino gibiting’o kindgi moko, e gibitedo i ie; man i ceng’ maeca Jakanani bibedo mbe kendo i ot pa Yehova mir udul.