Read Alur Zekaria 2 Bible Online

Zekaria 2 - Alur bible

Zekaria 2

¹E ating’o wang’a malu, man aneno, man, nen, ng’atu moko ku thol mi poropiny i cinge.

²Alund awacu kumae, Icidho kani? Man ewacu ira kumae, Niporo Yerusalem, nineno karamb lacne, man karamb borne.

³Man, nen, malaika ma waweco wakude cidho woko, e malaika mange cidho woko nirombo kude,

⁴man ewacu ire kumae, Ringi, wec ku jalawobi maeni, wac kumae, Dhanu bibedo i Yerusalem, calu pacu ma gang’kidi mbe, kum udul dhanu ku lim ma ni ie,

⁵Kum an, Yehova wacu, abibedo ire ni gang’ mi mac m’utieke gbur, man abibedo ni dwong’ i diere.

⁶E, e, piei kud i ng’om ma yor ariwa ma malu, Yehova wacu; kum alaluwu nge nge calu the yamu ang’wen, Yehova wacu.

⁷E Sayuni, bodhri, e in m’ibedo karacelo ku nya Babeli.

⁸Kum Yehova mir udul uwacu kumae: Pi dwong’ eora ba thek m’uyakuwu; kum ng’atu m’umulo wu emulo tong wang’e.

⁹Kum, nen, abiyengo cinga i wigi, e gibibedo ni ayeki ni ju m’utimo igi; e wubing’eyo nia Yehova mir udul uora.

¹⁰Wer man anyong’a negi, E nya Sayuni; kum, nen, abino, man abibedo i kindi, Yehova wacu.

¹¹Man thek dupa gibiribri ba Yehova i ceng’ maeca, man gibibedo dhanu para; man abibedo i kindi, e ibing’eyo nia Yehova mir udul uora i beng’i.

¹²Man Yehova bicamu ker wi Yuda calu makapiny pare i ng’om ma leng’, man fodi ebigoyo wi Yerusalem.

¹³Kum ceke, wubed ling’ i wang’ Yehova; kum eceu kud i kabedo pare ma leng’.