Read Alur Zekaria 6 Bible Online

Zekaria 6 - Alur bible

Zekaria 6

¹Man ang’ayu wang’a malu kendo, man aneno, man, nen, magali ang’wen ai kind gudi ario; man gudine gi gudi mi mola.

²Magali ma kwong’ane riuni ma kwar ni ie; man magali mir arionde riuni ma col ni ie;

³man i magali mir adege riuni ma tar; man magali mir ang’wende riuni ma tek m’athobi ni ie.

⁴Alund aloko lembe man awacu ni malaika ma waweco wakude kumae, Maeni ang’o, rwoth para?

⁵E malaika loko lembe man ewacu ira kumae, Maeni yamu ang’wen m’i polo, m’ucidho woko kud i cungo m’ecungo ko i wang’ Rwoth mi ng’om ngung’.

⁶Magali ma riuni ma col ni ie cidho woko yo ba ng’om ma yor ariwa ma malu; man ma tar ucidho woko yo ng’eigi; man m’athobi cidho yor i ng’om ma yor ariwa ma piny.

⁷Man ma kwar ucidho woko, e giyenyo gicidh kara giwoth kun ku kun i ng’om: man ewacu kumae, Ai kakeni, woth kun ku kun kud i ng’ om. Ka kumeno giwotho kun ku kun kud i ng’om.

⁸Elund elwong’a, man eweco i bang’a, ewacu kumae, Nen, ju m’ucidho yo ba ng’om ma yor ariwa ma malu gikwio cwinya i ng’om ma yor ariwa ma malu.

⁹Man lembe pa Yehova bino i bang’a, m’uwacu kumae,

¹⁰Gam kum dhanu mi ng’eca, cil mi Heldai, mi Tobija, man mi Yedaya; man ibin cing’ nica, man imond i ot pa Yosia ma wod Zefania, m’uai i Babeli;

¹¹eyo, gam mola ma tar ku mola ma kwar i bang’gi, man itim jamkermiwic, man iroi i wi Yocuwa ma wod Yehozadak, ma jalam ma dit:

¹²man iwac ire kumae, Yehova mir udul uwacu kumae, Nen, ng’atu ma nyinge Jang: man ebiloth ku i kakare; e ebigomo hekalu pa Yehova;

¹³cil en ebigomo hekalu pa Yehova; man ebiyeyo yung, e ebijany man ebibimo ku wi komker pare; man ebibedo jalam ku wi komker pare; man lembapora mi kwiocwiny bibedo i kind juario maeni.

¹⁴Man jamkermiwicne bibedo ni Helem, man Tobija, man ni Yedaya, man ni Hen ma wod Zefania, ni poi i hekalu pa Yehova.

¹⁵Man ju ma gini bor gibibino man gibigomo i hekalu pa Yehova; e wubing’eyo nia Yehova mir udul uora i beng’wu. Man maeni bitimbre, tek wubiworo dwand Yehova Mungu mu kud amora.