Read Alur Matayo 12 Bible Online

Matayo 12 - Alur bible

Matayo 12

¹I nindo maeno Yesu wotho i podho cam ceng’ sabatu; julubne de kec ubenegogi e gimaku jaku jang cam gimwodo de.

²Ento ka Jufarisayo gineno maeni, giwacu ire kumae, Nen, julubni gitimo gin ma cik uyio ngo ya jutim i ceng’ sabatu.

³Ento ewacu igi kumae, Wusomo gin ma Daudi timo ngo, ka kec ubenege, ku ju ma ginuti gikugi;

⁴maram emondo ko i ot pa Mungu, ecamu kwen ma athiera de, ma cik uyio ngo ire ecam, kadok ni ju ma ginuti gikugi de, ento ni julam kendgi?

⁵Kadi wusomo ngo i cik, nia i ceng’ sabatu julam mi hekalu gikadhu ku wi ceng’ sabatu, man gibedo ku dubo ngo?

⁶Ento awacu iwu, nia acel nuti keni ma sagu hekalu.

⁷Ento tek wung’eyo thelembe nini, Ayenyo kisa, lam ungo, kuno di wupoko lembe rac ungo wi ng’atu ma dubo mbe kude.

⁸Kum Wod dhanu en e rwoth mi ceng’ sabatu.

⁹Man eai kakeca, emondo de i kacokri migi:

¹⁰man nen, ng’atu ma cinge lindre. Gipenje de, giwacu kumae, Cik uyio jukei kum ceng’ sabatu? kara gidote.

¹¹Man ewacu igi kumae, Ng’atu moko m’i kindwu, ma won rombo acel, tek eni de podho i vur i ceng’ sabatu, ebimake, ebiwodhe woko de ngo?

¹²Dhanu sagu rombe dit apila! Kum kumeno cik uyio ya jutim tic ma ber ceng’ sabatu.

¹³Elund ewacu ni ng’atuno kumae, Riei cingi. E erieyo de; man edoko bo de, calu mucelo.

¹⁴Ento Jufarisayo gicidho woko, gipido lembe de i kume, maram ginyothe ko.

¹⁵E Yesu m’ung’eyo maeni eai ku kakeca: man dupa gilubo ng’eye; e ekeyo kumgi kpo,

¹⁶man eng’olo igi nia ku giketh jung’eye:

¹⁷kara lembe ma Isaya ma jabila yero timbre kakare, m’uwacu kumae,

¹⁸Nen, jatic para m’agoyo wie; Jamerna ma mutoro nego ng’eyong’ec para i kume: Abiketho Tipo para i wie, Man ebiyero lembapoka ni Thekdhanumange.

¹⁹Ebidhau ngo, kadi ebikok ma tek de ngo; Kadok ng’atu moko de mbe ma biwinjo dwande i gengi.

²⁰Usi m’unyoc ebituro ngo, Atutu m’udunyo yiro de ebinego ngo, Cil ma fok’eoro lembapoka ni aloci ngo.

²¹Man i nyinge Thekdhanumange bigeno.

²²Julund jukelo ng’atu acel ma won pajogi i bang’e, ma en e abinga ajuba de: e ekeyo kume, kara ng’atu ma ajuba weci enen de.

²³Udul dhanu ceke de igi wang’ lii, giwacu kumae, Maeni copo bedo wod Daudi?

²⁴Ento ka Jufarisayo winjo lembe maeni, giwacu kumae, Ng’atuni bewodho pajogi en ungo, ento ni kum Beelzebul ma jadit mi pajogi.

²⁵E en m’eng’eyo lembe ma igi bepido ewacu igi kumae, Ku ba ker ceke ma tek upokre gire enyothre; ku bang’ adhura ceke de kadi ot de m’upokre gire ebicungo ngo:

²⁶man tek Jok uwodho Jok woko, nwang’u epokre gire; ka ker pare bilund cungo nenedi?

²⁷Tek an awodho pajogi ni kum Beelzebul, wotwu ke giwodhogi woko ni kum ng’a? ka kumeno gibibedo jupoklembe mu.

²⁸Ento tek awodho pajogi ku Tipo pa Mungu, meca ker pa Mungu bino i beng’wu.

²⁹Kadi ng’atu moko copo mondo i ot pa jatego nenedi, eyak piny pare de, tek elar etwio jatego ngo? e kan ebilund nyotho ot pare.

³⁰Ng’atu ma tek wakude ngo nwang’u erony i kuma; man ke ng’atu ma wacoko wakude ngo nwang’u eketho.

³¹Ka kumeno awacu iwu kumae, Ku ba dubo ku lembacidi ceke biwekre woko ni dhanu; ento lembacidi ma kum Tipo re biwekre ngo.

³²Man ng’atu ma tek biyero lembe kum Wod dhanu, ebiwekre woko ire; ento ng’atu ma tek biyero kum Tipo Maleng’ re, ebiwekre woko ire ngo, kadok i ng’om maeni, kadi i maeca ma bibino.

³³Kadi wuketh yen udok ber, nyinge de dok ber; kadi wuketh yen udok rac, nyinge de dok rac: kum jung’eyo yen ni nyinge.

³⁴Wu nyikwai thwol, wucopo yero gin ma ber nenedi, ma wun wu raci? kum kud i gin m’usagre mir adunde e dhok de yero.

³⁵Ng’atu ma ber wodho gin ma ber woko kud i piny m’akana pare ma ber: ng’atu ma rac de wodho gin ma rac woko kud i piny pare m’akana ma rac.

³⁶Man awacu iwu, nia ku ba lembe ceke ma kite mbe ma dhanu biyero gibitito pire ceng’ pokolembe.

³⁷Kum jubigonyo lembe m’i wii ku lembe peri, man jubipoko lembe rac i wii de ku lembe peri.

³⁸Jugorcik kucel ku Jufarisayo gilund giloko lembe ire, giwacu kumae, Japonji, wayenyo wanen giranyutha i beng’i.

³⁹Ento edwoko lembe ewacu igi kumae, Dhanum’utuk ma gi rac ma gi weg gier de gibeyenyo giranyutha; giranyutha moko de mbe ma bimire igi, ndhu giranyutha pa Yona ma jabila:

⁴⁰kum calu Yona bedo ceng’ adek ku diewor de i cino rec ma dit; e Wod dhanu de bibedo kumeno ceng’ adek ku dieworne de i adunde ng’om.

⁴¹Dhanu mi Nineve bicungo i pokolembe karacelo ku dhanum’utuk maeni, e gibipoko lembe i wie rac; kum joca loko cwinygi kum lembayera pa Yona; man nen, ng’atu ma sagu Yona ni keni.

⁴²Ubimo ma dhaku ma yor ariwa ma yo piny bicungo i pokolembe karacelo ku dhanum’utuk maeni, man ebipoko lembe i wie rac: kum eai i tung’ ng’om kara ewinj rieko pa Suleman; man nen, ng’atu ma sagu Suleman ni keni.

⁴³Ento tipo m’ucido, kan eai kud i dhanu, ekadhu ku ka ma pi mbe i ie, m’ebeyenyo yom, enwang’e de ngo.

⁴⁴Elund ewacu kumae, Abidok i ot para m’aai i ie; kan ewok de, enwang’u ie nanu, ebedo ayweya, aruka de.

⁴⁵Elund ecidho, egamu tipo mange abiro i bang’e ma gi rac ma sage, e gimondo i ie gibedo de keca: bedo ma ng’atuno bedo ko macen doko rac ma sagu ma kwong’a. Ebibedo cil kumeno bende ni dhanum’utuk maeni ma gi rac.

⁴⁶Ka fodi ebeweco ni udul dhanu, nen, min giku utumin mire gicungo woko, giyenyo giwec i bang’e.

⁴⁷E ng’atu acel uwacu ire kumae, Nen, meru ku utumeru de gicungo woko, giyenyo giwec i beng’i.

⁴⁸Ento eloko lembe ewacu kumae, ni ng’atu m’uyero ire, Ng’a ma ma? man utumira de gi ng’agi?

⁴⁹E erieyo cinge yo ba julubne, man ewacu kumae, Nen, ma ku utumira!

⁵⁰Kum ng’atu ma tek bitimo yeny ma i Vwa m’i polo yenyo, nwang’u en e umira, ku nyamira de, ku ma de.