Read Alur Matayo 13 Bible Online

Matayo 13 - Alur bible

Matayo 13

¹Ceng’ maeno Yesu ai woko kud i ot, ebedo de dhu nam.

²Udul dhanu de ma dit gicokri i bang’e, ketho eidho i yei, ebedo de; udul dhanu ceke de gicungo dhu wath.

³Man eyero igi gin dupa ku lembabola, ewacu kumae, Nen, jacoikodhi cidho nicoyo;

⁴e kan ecoyo, kodhi moko podho dhu yo, winyo de gibino gicamugi:

⁵mange ke podho i ka ma ie ju kidi, ka ma ng’om ubedo dit i ie ngo: ekawono gicobo, kum ng’om ubedo thuth ungo:

⁶e ka ceng’ uwok, giwang’; man kum ulaggi mbe, giner woko.

⁷Mange ke podho kind ukudho; ukudho de dongo man edeyogi:

⁸mange ke podho wi ng’om ma ber, ecego nyinge de, moko acel bang’ dak, moko acel bang’ pier abusiel, moko acel bang’ pier adek.

⁹Ng’atu ma ithe nuti, wek ewinji.

¹⁰Man julub gibino, giwacu ire kumae, Iyero igi ku lembabola nedi?

¹¹Man eloko lembe ewacu igi kumae, Ecibre iwu ya wung’ei giramung’a mi ker m’i polo, endre ecibre ngo igi.

¹²Kum ng’atu ma tek ubedo ko, jubimio mange ire, man ebibedo ku muluma: ento ng’atu ma tek ubedo ko ngo, jubikabu woko kud i bang’e cil maeno m’ebedo ko.

¹³Ka kumeno ayero igi ku lembabola: kum anena to gineno ere gineno ngo, awinja to giwinjo ere giwinjo ngo, kadok ang’eya de ging’eyo ngo.

¹⁴E lembila ma yang’ Isaya yero timbre igi kakare, m’uwacu kumae, Awinja re wubiwinjo, ere wubing’eyo ki ngo; Anena de wubineno, ento wubineno ki ngo:

¹⁵Kum adunde dhanu maeni doko nwang’, Ithgi de dhing’, Wang’gi de gimio; Kara ku ginen ku wang’gi, Ku giwinj ku ithgi, Ku ging’ei kud adundegi, Gimaru lokri kendo, Man amaru cangugi.

¹⁶Ento mugisa ni weng’wu, kum gineno; ni ithwu de, kum giwinjo.

¹⁷Kum andha awacu iwu, nia jubila man dhanu ma pwe de dupa giyenyo ginen gin ma wuneno, ere ginenogi ngo; giyenyo giwinj gin ma wuwinjo, ere giwinjogi ngo.

¹⁸Ka kumeno wuwinj lembabola pa jacoikodhi.

¹⁹Ka ng’atu moko winjo lembe mi ker, eng’eye de ngo, ng’atu ma rac lund bino, emayu de maeno ma jucoyo i adundene. Maeni en e ma jucoyo dhu yo.

²⁰E maeni ma jucoye ka ma ie ju kidi, maeni en e ng’atu m’uwinjo lembe, ejole de pio pio ku mutoro;

²¹ento ebedo kud ulage i ie gire ngo, ento ebedo nyangba; man ka masendi kadi ragedo wok kum lembe, e aruca ruca ekier.

²²E maeni ma jucoyo kind ukudho, maeni en e ng’atu m’uwinjo lembe; e giki m’i ng’om, kud awondi mi lonyo, gideyo lembene, e ecego nyinge ngo.

²³Man maeni ma jucoye i ng’om ma ber ke, maeni en e ng’atu m’uwinjo lembe, man eng’eye; m’ecego nyinge andha, ecego de, moko acel bang’ dak, moko acel bang’ pier abusiel, moko acel bang’ pier adek.

²⁴Eting’o lembabola mange de i wang’gi ewacu kumae, Ker m’i polo pore ku ng’atu m’ucoyo kodhi ma ber i podho pare:

²⁵ento ka dhanu nindo, jadegine bino ecoyo ngoli bende kind nganu, e ecidho.

²⁶Ento ka nganu twi ecego nyinge de, ngoli bende lund uwok.

²⁷Man jumiru pa won ot ubino uwacu ire kumae, Rwoth, icoyo kodhi ma ber ungo i podho peri? ngoli ke lund uai kani?

²⁸Man ewacu igi kumae, Ng’atu ma jadegi timo maeni en. E jumiru giwacu ire kumae, Ka kumeno iyenyo waci wacokgi?

²⁹Ento ewacu kumae, Ungo; kinde ma wucoko ngoli, wumaru doyo nganu bende.

³⁰Wek gin ario gidong karacelo cil i palacam: man i nindo mi palacam abiwacu ni jukaicam kumae, Wular wucok ngoli, wutwigi de ni wie kara juwang’gi; nganu re e ma wucok i dero para.

³¹Eting’o lembabola mange i wang’gi, ewacu kumae, Ker m’i polo e calu kodhi atingli, ma dhanu gamu, ecoyo de i podho pare:

³²ma nyathigi andha ma sagu kodhi ceke: ento kan edongo, e dit ma sagu uboko, man edoko ni yen, ketho winyo m’i polo gibino gibedo de wi jange.

³³Eyero igi lembabola mange de kumae; Ker m’i polo e calu thobi, ma dhaku gamu, ekane de i mogo katoko adek, maram eyenye ko ceke.

³⁴Gin maeni ceke Yesu yero ni udul dhanu ku lembabola; man lembe moko mbe ma k’eyero ku lembabola ngo:

³⁵kara lembe ma yang’ jabila yero timbre kakare, m’ewacu kumae, Abialu dhoga ku lembabola; Abiweco pi gin m’ugamu pandre cil i thekri mi ng’om.

³⁶Elund eweko udul dhanu emondo de i ot: julubne de gibino i bang’e, giwacu kumae, Tuc iwa the lembabola mi ngoli mi podho.

³⁷Man eloko lembe ewacu kumae, Ng’atu m’ucoyo kodhi ma ber en e Wod dhanu;

³⁸podho ke en e ng’om; kodhi ma ber ke, maeni gi wot mi ker: ngoli ke gi wot ng’atu ma rac;

³⁹jadegi ke m’ucoyogi en e wonabali: palacam ke en e kajik mi ng’om; jukaicam ke gi malaika.

⁴⁰Ka kumeno calu jucoko ngoli juwang’u de ku mac; ebibedo kumeno i kajik mi ng’om.

⁴¹Wod dhanu bioro malaika pare man gibicoko kud i ker pare gin ceke m’uketho jukier, ku ju m’udubo lembe bende,

⁴²e gibibologi i majubi: ywak ku kayu lak de bibedo nuti.

⁴³Weg bedopwe bilund rieny pami ceng’ i ker pa Weggi. Ng’atu ma ithe nuti wek ewinji.

⁴⁴Ker m’i polo e calu piny m’akana m’upandre i podho: ma ng’atu acel unwang’u ekane de; man kum mutoro pare ecidho eloko jupiny ceke m’ebedo ko, man eng’iewo podho maeno de.

⁴⁵Kendo, ker m’i polo e calu ng’atu ma jakuloka m’uyenyo kidi ma beco ma i upal:

⁴⁶e kan enwang’u kidi acel ma i upal ma wel pinje lwar, ecidho eloko jupiny ceke m’ebedo ko, man eng’iewe.

⁴⁷Kendo, ker m’i polo e calu voi, ma jubolo i nam, man ecoko mi kwond ceke:

⁴⁸ma, kan epong’, giywayu woko dhu wath; gibedo piny de, man gicoko ma becone i alara, ento ma recone gibayu woko.

⁴⁹E ebibedo kumeno i kajik mi ng’om: malaika biwok woko, man gibikoyo judubo ma kind weg bedopwe,

⁵⁰e gibibologi i majubi: ywak ku kayu lak de bibedo nuti.

⁵¹Wung’eyo gin maeni ceke? Giwacu ire kumae, Eyo.

⁵²Man ewacu igi kumae, Ka kumeno ku ba jugorcik nzu ma judwoke jalub mi ker m’i polo e calu ng’atu ma won ot, m’ewodho woko kud i kind piny pare m’akana giki ma nyen ku giki m’uti.

⁵³Man etimbre, ka Yesu daru lembabola maeni, eai ku kakeca.

⁵⁴Ebino i ng’om ma thugi ma dhe man eponjogi i kacokri migi, ketho igi wang’ lii, giwacu de kumae, Ng’atuni nwang’u rieko maeni, ku tic ma tek maeni kani?

⁵⁵Ng’atuni wod jabodho mi bau ngo? min mire julwong’o Mariamu ngo? utumin ke, Yakobo, ku Yusuf, man Simon, ku Yuda de ngo?

⁵⁶Nyimin mire de, kagi ceke wabedo wakugi ngo? Ng’atuni lund unwang’u gin maeni ceke kani?

⁵⁷E gikier ni kume. Ento Yesu wacu igi kumae, Yung ma juyungo ko jabila mbe ngo, ento umbe i ng’om ma thugi ma dhe re, man i ot pare ma dhe.

⁵⁸Man etimo tic ma tek dupa ngo keca kum yioyic migi m’umbe.