Read Alur Matayo 15 Bible Online

Matayo 15 - Alur bible

Matayo 15

¹E Jufarisayo ku jugorcik gilund giai Yerusalem, gibino ba Yesu, giwacu kumae,

²Julubni gikadhu ku wi lembe mi kei mi judongo nedi? kum gilogo cing’gi ngo ka gicamu kwen.

³Eloko lembe de ewacu igi kumae, Wun bende wukadhu ku wi cik pa Mungu nedi kum lembe mi kei mu?

⁴Kum Mungu wacu kumae, Yung wuru ku meru: man, ng’atu m’uyero lembe ma rac kum won kadi min, wek etho athoa.

⁵Ento wun re wuwacu kumae, Ng’atu ma tek biwacu ni won kadi min kumae, Maeno ma nwang’u ande bedo iri ni kuloka ni kuma emire ni Mungu;

⁶meca ebiyungo won ungo. E wuthiro lembe pa Mungu kum lembe mi kei mu.

⁷Wu weg ambili, yang’ Isaya ewo piwu dre, m’ewacu ko kumae,

⁸Dhanu maeni giyunga ku dendhoggi; Ento adundegi tung’ i kuma.

⁹Ento girwo i bang’a mananu, Ma giponjo ko cik mi dhanu ni ponji migi.

¹⁰Man elwong’o udul dhanu i bang’e, ewacu igi kumae, Wuwinji, man wung’ei:

¹¹giki ma mondo i dhok cido i dhanu ngo; ento maeno ma ai kud i dhok, maeno e ma cido i dhanu.

¹²Julub gilund gibino, giwacu ire kumae, Ing’eyo nia Jufarisayo ka giwinjo lembe maeni, gikieri?

¹³Ento eloko lembe ewacu kumae, Ku ba girapidha ceke ma Vwa m’i polo kupidho en ungo jubifudhe woko.

¹⁴Wekgi: gi jutelwidhanu ma gin de gin abinga. Man tek abinga telo wi abinga, gin ario de gibipodho i vur.

¹⁵E Petro loko lembe ewacu ire kumae, Tuc iwa the lembabolane.

¹⁶Man ewacu kumae, Wun bende kara fodi wumbe ku ng’eyong’eci?

¹⁷Wung’eyo ngo, nia gin ma tek umondo i dhok kadhu i ic, jutere de woko i odbari?

¹⁸Ento giki ma ai kud i dhok re giai kud i adunde; man gicido i dhanu.

¹⁹Kum pidoic ma rac ai ku i adunde, ku negonek, ku gier, ku tarwang’, ku kwo, ku cwayu ndra, ku cayucac:

²⁰maeni e ma giki ma cido i dhanu; ento camu ku cing’ m’aloga ngo re cido i dhanu ngo.

²¹E Yesu ai woko ku kakeca, ecidho de i ng’et Turo ku Sidon.

²²Man nen, Dhakananaya uai kud i kieu maeno, man ekok akoka, ewacu kumae, Bed ku kisa i kuma, E Rwoth, i wod Daudi; nyara besendre dit ku pajogi.

²³Ento eloko lembe acel de ngo ire, Julubne de gibino gikwaye, giwacu kumae, Keth ecidhi; kum ebekok i ng’eiwa.

²⁴Ento eloko lembe ewacu kumae, Juora ngo ento ni rombe m’urwinyo m’i ot pa Israel kende.

²⁵Ento ebino erwo de ire, ewacu kumae, Rwoth, konya do.

²⁶Eloko lembe ire ewacu kumae, Emaku ya jugam kwen mi nyithindho ngo jubol ni gwogi.

²⁷Ento ewacu kumae, Eyo, Rwoth: kum cil gwogi gicamu ng’ili m’upodho ku wi mesa pa weggi.

²⁸Yesu lund uloko lembe ewacu ire kumae, E dhaku, yioyic peri bedo dit: dong’ etimbre iri cil calu iyenyo. E kum nyare kei i saa nica.

²⁹E Yesu ai kakeca, man ebino ceng’ni ba nam Galilaya; man eidho malu wi got, ebedo de kuca.

³⁰E udul dhanu ma dit de gibino i bang’e, ma gibedo ku weg abala, ku ju ma abinga, ku ju ma ajuba, ku weg abala mi bot, ku ju mange de dupa, man gipielogi piny the tiende; e ekeyo kumgi:

³¹ketho udul dhanu igi wang’ lii, ka gineno ju ma ajuba weco, weg abala mi bot de titri, man weg abala mi tielo de wotho, ju ma abinga de neno piny: e giyungo Mungu pa Israel.

³²E Yesu lwong’o julubne i bang’e, ewacu de kumae, Ngisi benega kum udul dhanu, kum gibedo i bang’a kawono ceng’ adek man giracama mbe kugi: man ayenyo ngo alalgi ku kec, gimaru voc i yo.

³³Julubne de giwacu ire kumae, Wabinwang’u lungu kwen dupa ma kumeni kani i ng’om ngele ma biyeng’o udul dhanu ma dit ma rokeni?

³⁴E Yesu wacu igi kumae, Wutie ku lungu kwen adi? Man giwacu kumae, Abiro, ku rec moko ma thindho.

³⁵Man eng’olo ni udul dhanu ya gibed piny i ng’om;

³⁶man egamu lungu kwen abiro ku rec de; man emio foc, eng’weko ie, emio de ba julub, julub ke mio ni udul dhanu.

³⁷E kagi ceke gicamu, giyeng’ de: e gicoko dong’ kwen ma jung’weko m’udong’, upong’o katoko abiro.

³⁸Man ju m’ucamune jumaco rubanga ang’wen, ku mon man nyithindho bende.

³⁹E elalu udul dhanu, man emondo i yei, ebino de i kieu ng’om mi Magdala.