Read Alur Matayo 16 Bible Online

Matayo 16 - Alur bible

Matayo 16

¹Jufarisayo ku Jusadukayo de gibino, man gimulo ie gipenje ya enyuth igi giranyutha m’i polo.

²Ento eloko lembe ewacu igi kumae, Ka piny udoko uthieno, wuwacu kumae, Piny bivuto: kum polo bogre.

³Kugweno ke wuwacu kumae, Piny bibedo rac tinuni kum polo bogre piny de mino. Wung’eyo ng’io wang’ polo; ento wucopo ng’io giranyutha mi nindo ngo.

⁴Dhanum’utuk ma rac ma gi weg gier de giyenyo giranyutha; giranyutha de bimire ire ngo, ento giranyutha pa Yona re. E ewekogi, ecidho.

⁵E julubne gicidho lokaca man wigi wil ku ting’o kwen.

⁶E Yesu wacu igi kumae, Wubed ku weng’wu wukuru de ni thobi mi Jufarisayo ku Jusadukayo.

⁷E giporo lembe i kindgi gigi, giwacu kumae, En e kum wating’o kwen ungo.

⁸E Yesu m’ung’eyo maeni ewacu kumae, E wun ma yioyic mu nok wuporo lembe i kindwu giwu nedi, kum kwen umbe kudu?

⁹Fodi wung’eyo ngo, kadi wupoi ngo pi lungu kwen abic ma ni rubanga abic, pi wel katoko bende ma wucoko?

¹⁰Kadi lungu kwen abiro ma ni dhanu rubanga ang’wen, pi wel katoko bende ma wucoko?

¹¹Wung’eyo ngo nedi ya ayero iwu pi kwen ungo? Ento wukuru ni thobi mi Jufarisayo ku Jusadukayo.

¹²Gilund ging’eyo nia ewacu igi ngo ya gikuri ni thobi mi kwen ento pi ponji mi Jufarisayo ku Jusadukayo.

¹³Nwang’u ka Yesu bino i ng’et Kaisaria Filipi, epenjo julubne, ewacu kumae, Meno dhanu giwacu ya Wod dhanu en e ng’a?

¹⁴Man giwacu kumae, Jumoko wacu kumae, Yohana ma Jabaputisi; jumoko ke, Elia; jumoko ke, Yeremia, kadi ng’atu acel ma kind jubila.

¹⁵Ewacu igi kumae, Ento wun ke wuwacu ya an a ng’a?

¹⁶E Simon Petro loko lembe ewacu kumae, In i Kristu, Wod Mungu ma kwo.

¹⁷E Yesu loko lembe ewacu ire kumae, Mugisa iri, Simon Bar-Yona: kum kum ku rimo nyuthe iri en ungo, ento Vwa ma ni i polo re.

¹⁸An bende awacu iri, nia in i Petro, man ke abigomo kanisa para wi cana maeni; e dhugang’ mi Hadeya de biloye ngo.

¹⁹Abimio iri kifungula mi ker m’i polo: man gin ma tek ibitwio i ng’om ebibedo atwia i polo; man gin ma tek ibigonyo i ng’om ebigony i polo.

²⁰Elund eng’olo ni julubne ya ku giwac ni ng’atu moko nia en e Kristu.

²¹Ugambre i nindo maeni Yesu maku nyutho ni julubne, nia ekocidho be Yerusalem, ecisendre de ku gin dupa ni kum judongo ku julam ma dongo ku jugorcik, jubinege de, i ceng’ mir adege ke ebicer.

²²Petro de game, emaku juke de, ewacu kumae, Maeni kud uwok i kumi, Rwoth: maeno biwok i kumi ki ngo.

²³Ento elokre, man ewacu ni Petro kumae, Kadh i ng’eya, Jok: kum ibedo ni cudho mi kier ira: kum ii pido pi gin pa Mungu ngo, ento gin mi dhanu re.

²⁴Yesu lund uwacu ni julubne kumae, Tek ng’atu moko yenyo elub ng’eya, dong’ ekwere gire, eting’ yen m’athara pare de, elub ng’eya.

²⁵Kum ng’atu ma tek uyenyo egwok kwo pare ebirwinye: ng’atu ma tek birwinyo kwo pare de pira ebinwang’e.

²⁶Kum kuloka ang’o ma dhanu binwang’u tek ebilimo ng’om yu ni kuloka ire, ma kwo pare ke rwinyo? kadi girang’o ma dhanu biwilo ku kwo pare?

²⁷Kum Wod dhanu bibino i dwong’ pa Won karacelo ku malaika pare; e ebilund mio ni dhanu ceke kubang’gi calku tic pare.

²⁸Awacu iwu andha kumae, Jumoko ma kind ju m’ucungo kakeni bibilo tho ki ngo, ma fodi gikuneno Wod dhanu ngo m’ubebino i ker pare.