Read Alur Matayo 2 Bible Online

Matayo 2 - Alur bible

Matayo 2

¹Nie kinde ma junyolo Yesu i Beth-lehem mi Yahudi i ceng’ p’ubimo ma Herode, nen, Jurieko m’uai yo nyangu gibino Yerusalem giwacu kumae,

²Ng’atu ma unyolo ni Ubimo mi Juyahudi e, eni kani? kum waneno cero pare yo nyangu, wabino de nirwo ire,

³E ka Herode m’ubimo winjo maeni, cwinye ng’abre, en ku Yerusalem ceke bende.

⁴E kan ecoko julam ma dongo ceke karacelo ku jugorcik mi dhanu bende, epenjogi pi ka ma jubinyolo ie Kristu.

⁵E giwacu ire kumae, I Beth-lehem mi Yahudi: kum egore kumeno ni kum jubila,

⁶In i Beth-lehem, ng’om pa Yuda, In i nok ki ngo i kind juker pa Yuda: Kum jabim biai i beng’i, M’ebibedo jakwac mi dhanu para Israel.

⁷Herode lund ulwong’o Jurieko nyalwe man epenjogi cu pi kanindo ma cero wok i ie.

⁸Man eorogi Beth-lehem, ewacu kumae, Wuci wuyeny cu pi nyathin ma nok; ka wunwang’e de, wukel lembene ira, kara an bende abin arwo i bang’e.

⁹E gin, ka gidaru winjo lem p’ubimo, gicidho migi; man nen, cero, ma gineno yo nyangu, ucidho i wang’gi, maram ebino ecungo ko ka wi nyathin ma nok.

¹⁰E ka gineno cerone, anyong’a negogi ku mutoro ma dit apila.

¹¹E gibino i ot man gineno nyathin ma nok ku Mariamu ma min mire; e gipodho piny girwo ire; man gigonyo piny migi m’akana githiero ire giramia, mola ma kwar kud udok ma ng’wice ng’ar man mo ma ng’wice ng’ar.

¹²E ka Mungu poyogi ku wang’ lek ya ku gidok ba Herode, giai gidok thugi ku yo ku mange.

¹³Nie ka gidaru ai, nen, malaika pa Rwoth uwok ba Yusuf ku wang’ lek, ewacu kumae, Ai malu iting’ nyathin ma nok ku min mire, man iring i Misiri, ibed kuca de ka fok’ayero iri ngo: kum Herode biyenyo nyathin ma nok maeno enyothe.

¹⁴Man eai malu eting’o nyathin ma nok de ku min mire ku diewor, ecidho de i Misiri;

¹⁵man ebedo kuca rama Herode tho ko: kara gin ma yang’ Rwoth uwacu ku dhu jubila timbre kakare, m’uwacu kumae, Alwong’o woda kud i Misiri.

¹⁶Ka Herode lund uneno nia Jurieko gicaye, kwinyo ma apila nege, man eoro dhanu ucidh uneg nyithindho ma co ceke ma gini i Beth-lehem, cil ku m’i kieune ceke, ma oro migi ario ku ma fodi de, calu kanindo m’epenjo cu ba Jurieko.

¹⁷E maeno lund utimbre kakare m’uyere ni kum Yeremia ma jabila m’uwacu kumae,

¹⁸Dwal uwinjre i Rama, Ywak ku can ma dit, Rahel m’ubeywagu nyithindhe; Ekwero juk de, kum gimbe.

¹⁹Ento ka Herode tho, nen, malaika pa Rwoth uwok ku wang’ lek ba Yusuf i Misiri, m’uwacu kumae,

²⁰Ai malu iting’ nyathin ma nok ku min mire de, man idok i ng’om Israel: kum ju m’uyenyo gineg nyathin ma nok githo.

²¹E eai malu eting’o nyathin ma nok ku min mire de, man ebino i ng’om Israel.

²²Ento kan ewinjo nia Arkelao bebimo wi Yahudi ka Herode ma won mire, lworo make nidok kuca; e en ma Mungu poye ku wang’ lek, edong’ ecidho i ng’et Galilaya,

²³man ebino ebedo i adhura ma julwong’o Nazareti; kara gin m’uyere ku dhu jubila timbre kakare, nia jubilwong’e Janazareti.