Read Alur Matayo 20 Bible Online

Matayo 20 - Alur bible

Matayo 20

¹Kum ker m’i polo e calu ng’atu ma won ot, m’ucidho woko pir kugweno nigamu jutic m’utim i podho pare mir ulok.

²Ka giyio de giku jutic ya ceng’ acel denarius, eorogi i podho pare mir ulok.

³Ecidho woko de va saa mir adege, man eneno jumange gicungo mananu i katali;

⁴man ewacu igi kumae, Wun bende wucidh i podho mir ulok, man gin m’umaku piny abimio iwu. E gicidho i yo migi.

⁵E ecidho kendo va saa mir abusiende bende ku mir abung’wende, man etimo kumeca.

⁶Man va saa mir apar wi acende ecidho woko, enwang’u jumange de gicungo acunga; man ewacu igi kumae, Wucungo keni ceng’ du mananu nedi?

⁷Giwacu ire kumae, Kum ng’atu moko mbe ma fodumio iwa tic. Ewacu igi kumae, Wun bende wucidh i podho mir ulok.

⁸E ka piny udoko uthieno, rwoth mi podho mir ulok uwacu ni jakurpiny pare kumae, Lwong’ jutic, mi igi sukulia migi, theke kum ma cen cil kum ma kwong’a.

⁹Ka ju ma jumio igi tic va saa mir apar wi acende gibino, gigamu denarius kubang’gi nzu.

¹⁰E ka ma kwong’ane gibino, giwacu nyo gibinwang’u m’usagu; e joni bende gigamu denarius kubang’gi nzu.

¹¹Ka gigamu de, ging’ur kum won ot,

¹²giwacu kumae, Maeni ma cen gitimo saa acel kende, e idwokogi rom rom ku wan ngi, ma wasendra ku tic ma tek ceng’ du ku lietho ceng’ ma kec.

¹³Ento eloko lembe man ewacu ni acel m’i kindgi kumae, Jarimona, atimi rac ungo: wayio wakudi ngo pi denarius?

¹⁴Ting’ maeno ma peri, ici ko; ayenyo ami ni maeni ma cen, calu amio iri.

¹⁵Cik uyio ira ngo ya atim gin m’ayenyo ku para ma dhe? kadi weng’i bedo rac, kum an a beri?

¹⁶Kum ku meno m’udong’ cen gibibedo ma kwong’a, ma kwong’a de bidong’ cen.

¹⁷Man ka Yesu beidho malu Yerusalem, egamu julubne apar wi ario ecidho kugi cen, man ewacu igi kumae i yo,

¹⁸Nen, waidho malu Yerusalem; Wod dhanu de jubimie ni julam ma dongo ku jugorcik; man gibipoko lembe pare rac de ya etho,

¹⁹gibimie de ni Thekdhanumange ya gicaye, gifode de, man gigure: i ceng’ mir adege ke ebicer.

²⁰Meg wot Zebedayo ulund ubino i bang’e ku wote, m’eberwo ko ire, ekwayu gin moko de i bang’e.

²¹Man ewacu ire kumae, Iyenyo ang’o? Ewacu ire kumae, Dong’ ing’ol ya wota ario maeni gibin gijany, acel yo ku cingi ma yor acwic, acel ke yo ku cingi ma yor acam, i ker peri.

²²Ento Yesu loko lembe, ewacu kumae, Wung’eyo gin ma wukwayu ngo. Wucopo madhu kikombe ma fodi nyanok abimadhu? Giwacu ire kumae, Wacopo.

²³Ewacu igi kumae, Kikombe para wubimadhu andha: ento bedo yo ku cinga ma yor acwic, yo ku cinga ma yor acam de, en e para ngo ya ami; ento en e ni ju ma Vwa yiko igi.

²⁴E ka juapar giwinjo maeni, gibedo ku konda kum utumego ario.

²⁵Ento Yesu lwong’ogi i bang’e, man ewacu igi kumae, Wung’eyo nia jubim mi Thekdhanumange girwodho i wigi, man ke judongo migi ging’olo lembe i wigi.

²⁶Ebibedo kumeno ngo i kindwu: ento ng’atu ma tek uyenyo ebed dwong’ i kindwu, ebibedo ni jatim iwu;

²⁷man ng’atu ma tek uyenyo ebed ma kwong’a i kindwu ebibedo ni jamiru mu:

²⁸cil calu Wod dhanu bino ya jutim ire ngo, ento kara etim, emi kwo pare de ni gony mi dhanu dupa.

²⁹Man ka giai Yeriko udul dhanu ma dit gilubo ng’eye.

³⁰Man nen, dhanu ario ma abinga gibedo dhu yo, ka giwinjo nia Yesu bekadhu, gikok akoka, giwacu kumae Rwoth, bed ku kisa i kumwa, in i wod Daudi.

³¹Udul dhanu de gijukogi ya gibed ling’: ento gikok m’usagu, giwacu kumae, Rwoth, bed ku kisa i kumwa, in i wod Daudi.

³²E Yesu cungo ti, elwong’ogi de, man ewacu kumae, Wuyenyo ya atim ang’o iwu?

³³Giwacu ire kumae, Rwoth, wayenyo nia wang’wa yabre.

³⁴E Yesu, ma ngisi benege, emulo wang’gi: e eni eni gimaku neno piny, man gilubo ng’eye.