Read Alur Matayo 21 Bible Online

Matayo 21 - Alur bible

Matayo 21

¹Man ka gidhingo Yerusalem, gibino de Bethfage, ba got Zeituni, Yesu lund uoro julub ario,

²ewacu igi kumae, Wucidh i pacu m’i weng’wu, e eni eni wubinwang’u kana m’ubedo atwia, giku nyathine: wugonygi, wukelgi de i bang’a.

³Man tek ng’atu moko wacu lem moko iwu, wubiwacu kumae, Candgi benego Rwoth; e ndhu ndhu ebiorogi.

⁴Nie maeni timbre, kara lembe ma yang’ jabila yero timbre kakare, m’ewacu kumae,

⁵Wuyer ni Nyasayuni Nen, Ubimo peri bebino i beng’i, Emol ebewotho de ku wi kana, Wi nyathi kana ma thwone.

⁶Julub gicidho, man gitimo cil calu Yesu ng’olo igi,

⁷e gikelo kana, ku nyathine de, gipedho kendi migi de i wigi; man ejany i wie.

⁸Man udul dhanu kucel ma dit gipedho kendi migi i yo; jumange ke gitong’o jang yen, gipedhogi de i yo.

⁹E udul dhanu ma wi piro, ku ju m’udong’ cen de, gikok, giwacu kumae, Hosana ni wod Daudi: mugisa ni ng’atu m’ubino ku nying’ Rwoth; Hosana ma malu ngbir.

¹⁰E kan ebino i Yerusalem, adhura bo igi wang’ lii, giwacu kumae, Maeni ng’a?

¹¹Man udul dhanu giwacu kumae, Maeni en e jabila, Yesu, ma Nazareti mi Galilaya.

¹²E Yesu mondo i hekalu pa Mungu, man eriemo dhanu ceke m’uloko piny m’ung’iewo ng’ieu de i hekalu, eredho mesa mi juwilsente de, ku kom mi ju m’uloko akuru de;

¹³ewacu igi de kumae, Egore kumae, Ot para jubilwong’o odrwo: ento wukethe ni kagonjo mi weg ayeki.

¹⁴Ju ma abinga ku ju ma weg abala m’i tielo gibino i bang’e i hekalu; e ekeyo kumgi.

¹⁵Ento ka julam ma dongo ku jugorcik gineno gin ma wang’u ijo m’etimo, kud awia m’ubekok akoka i hekalu ma giwacu kumae, Hosana ni wod Daudi; e konda makugi dit,

¹⁶man giwacu ire kumae, Iwinjo gin ma joni beyero? E Yesu wacu igi kumae, Eyo: fodi wusomo ngo kumae, Ibedo ku pakupak ma cu ku dhu mukere ku nyithindho ma fodhoth de?

¹⁷Man ewekogi, eai kud i adhura ecidho Bethania, e egonjo keca.

¹⁸Nie kugweno kan ebedwogo i adhura kec ubenege.

¹⁹E kan eneno ulam dhu yo, ebino i bang’e, enwang’u gin moko de mbe i wie, ento ithe kende; man ewacu ire kumae, Dong’ nyingi kud ucek i kumi ki cil nja ku nja. E ulam uner ndhu ndhu nica.

²⁰E ka julub ginene, igi wang’ lii, giwacu kumae, Ulam uner woko aringa ringa e nenedi?

²¹E Yesu loko lembe ewacu igi kumae, Andha awacu iwu kumae, Tek wubedo ku yioyic, cwinywu de bedo jiji ngo, wubitimo gin m’utimbre ni ulam kende ngo, ento tek wubiwacu cil ni got maeni, Dong’ juting’i jubei de i nam, e ebitimbre.

²²Man gin ceke, ma tek wubikwayu i rwo, wuyio de, wubigamu.

²³E kinde m’emondo i hekalu, julam ma dongo ku judongo mi dhanu gibino i bang’e kan ebeponjo, man giwacu kumae, Itimo gin maeni ku ng’ol manedi? ng’a m’umio iri ng’ol maeni?

²⁴E Yesu loko lembe, ewacu igi kumae, An bende abipenjowu ku penji acel, ma tek wuyero ira, an bende abiyero iwu pi ng’ol m’atimo ko gin maeni.

²⁵Baputisi pa Yohana, uai kani? uai i polo kadi ba dhanu? E giporo lembe i kindgi gigi, giwacu kumae, Tek wabiwacu kumae, Uai i polo; ebiwacu iwa kumae, Ka kumeno wukwero yie nedi?

²⁶Ento tek wabiwacu kumae, Uai ba dhanu; walworo udul dhanu; kum dhanu ceke giyio nia Yohana en e jabila.

²⁷E giloko lembe ni Yesu, giwacu de kumae, Wang’eyo ngo. En de ewacu igi kumae, Kadok an bende ayero iwu ngo pi ng’ol m’atimo ko gin maeni.

²⁸Ento wuwacu nyo ang’o? Ng’atu moko bedo ku wote ario; ebino de ba ma kayu, ewacu kumae, Woda, ci tim tic i podho mir ulok tinuni.

²⁹Man eloko lembe ewacu de kumae, Ayenyo ngo; ento macen elokre, ecidho de.

³⁰Ebino de ba mir arionde, ewacu de kumeca. Man eloko lembe ewacu kumae, Acidho, rwoth: ere ecidho ngo.

³¹Makani ma kind juario m’utimo ka cwiny woni? Giwacu kumae, Ma kwong’ane. Yesu wacu igi kumae, Andha awacu iwu, nia weg ajok ku weg tarwang’ gilar gimondo iwu i ker pa Mungu.

³²Kum Yohana bino i beng’wu i yo mi bedopwe, wuyie de ngo; ento weg ajok ku weg tarwang’ e ma giyie; wun de, ka wuneno maeni, macen wuloko cwinywu ngo, kara wuyie.

³³Wuwinj lembabola mange: Ng’atu moko nuti ma won ot, m’upidho podho mir ulok, etwode kud arara de, ekunyo ka ma jubio ie nying ulok bende, man egomo odtra, emie de ni jutipodho, en ke ecidho i ng’om mange.

³⁴E ka nindo mi nyinge dhingo, eoro jumiru pare ba jutipodho, gici gigam nyinge.

³⁵E jutipodho gimaku jumiru pare, gifodo ng’atu acel, mange ke ginego, mange ke gicanyu ku kidi.

³⁶Kendo, eoro jumiru mange ma sagu ma kwong’a: e gitimo de kumeca i kumgi.

³⁷Ento macen edong’ eoro wode i bang’gi, ewacu kumae, Gibijwigri ni woda.

³⁸Ento jutipodho, ka gineno wode, giweco i kindgi gigi kumae, Meni jacampacu; wubin, dong’ wanegue, wagemu camupacu pare.

³⁹E gimake, gicwale woko kud i podho mir ulok, ginege de.

⁴⁰Ka kumeno ka rwoth mi podho mir ulok bibino, ebitimo ang’o kum jutipodho nino?

⁴¹Giwacu ire kumae, Ebinyotho dhanu ma rac maeno ku rac, man ebimio podho mir ulok ni jutipodho mange, nia bimio ire nyinge ku ba nindo migi.

⁴²Yesu wacu igi kumae, Fodi wusomo ngo i lembagora pa Mungu kumae, Kidi ma jugomot gikwero, En nini ma judwoke ni wi gul; Maeni ai ba Rwoth, Man en e gin ma wang’u ijo i wang’wa?

⁴³Ka kumeno awacu iwu kumae, Jubikabu ker pa Mungu woko kud i beng’wu, jubimie de ni thek ma cego nyingene.

⁴⁴Man ke ng’atu m’upodho wi kidi maeni ebing’wekre nziki nziki: ento ng’atu ma tek ebipodho i wie, ebikethe pamir utur.

⁴⁵E ka julam ma dongo ku Jufarisayo giwinjo lembabola pare, ging’eyo nia eyero pigi.

⁴⁶E ka giyenyo gimake, lworo makugi ni udul dhanu, kum kud i wang’gi en e jabila pa Mungu.