Read Alur Matayo 22 Bible Online

Matayo 22 - Alur bible

Matayo 22

¹E Yesu loko lembe man eyero igi kendo ku lembabola, ewacu kumae,

²Ker m’i polo pore kud ubimo moko, m’utimo agba mir ambadha ni wode,

³m’uoro jumiru pare ulwong’ ju ma juwaku ni kwend ambadha: e gikwero bino.

⁴Eoro jumiru mange kendo, ewacu kumae, Yer ni ju ma juwakugi kumae, Nen, ayiko cemo para; koni dhiang’ para ku lim para m’ucwe de junego, gin ceke de bedo ayika: wubin bang’ agba mir ambadha.

⁵Ento gidwoko lembene ni tara, gicidho de i yo migi, acel ba podho pare, mange kuloka pare;

⁶ju m’udong’ ke gimaku jumiru pare, man gitimogi rac, ginegogi de.

⁷Ento kwinyo maku ubimo; man eoro njuru asikari pare, ninyotho junek nino, ewang’u adhura migi de.

⁸Elund ewacu ni jumiru pare kumae, Ambadha bedo ayika, ento ju ma juwakugi giromo ngo.

⁹Ka kumeno wucidh i akarayo, dhanu ceke de ma wubinwang’u wulwong’gi i agba mir ambadha.

¹⁰Jumiru nino gicidho i gengi, gicoko dhanu ceke karacelo ma ginwang’u ju ma pigi rac ku ju ma pigi ber bende: e ambadha dhir ku ju ma julwong’o.

¹¹Ento kan ubimo mondo nineno ju ma julwong’ogi, eneno ng’atu acel keca m’ukendo kendi mir ambadha ngo:

¹²man ewacu ire kumae, Jarimo, imondo kakeni nenedi m’ikendo kendi mir ambadha ngo e? E dhoge tal kau.

¹³Ubimo lund uwacu ni jumiru kumae, Wutwi cinge ku tiende, man wubaye i mudho ma woko; ywak ku kayu lak de bibedo nuti.

¹⁴Kum julwong’o dhanu dupa, ento dhanu ma nyanok re ma jugoyo nying’gi.

¹⁵Jufarisayo gilund gicidho, man giporo lembe maram gicopo make ko kud uwic kum wec pare.

¹⁶Gioro julub migi de i bang’e, Juherodiano, giwacu kumae, Japonji, wang’eyo nia in i ng’atu mandha, man iponjo yo pa Mungu i lemandha, man iparu pi ng’atu moko de ngo: kum ineno dhanu ni wang’gi ngo.

¹⁷Ka kumeno wac iwa, Iwacu nyo ang’o? Cik uyio ya jumi ajok ni Kaisari, kadi ungo?

¹⁸Ento Yesu ng’eyo dubo migi, man ewacu kumae, Nedi wumulo ia, wu weg ambili?

¹⁹Wunyuth ira sente mir ajok. E gikelo ire denarius acel.

²⁰E ewacu igi kumae, Ayi maeni en e pa ng’a ku ramblembe de?

²¹Giwacu ire kumae, Pa Kaisari. Elund ewacu igi kumae, Ka kumeno wumi ni Kaisari gin pa Kaisari; ni Mungu de gin ma pa Mungu.

²²E ka giwinjo maeni, igi wang’ lii, man giweke, gicidho.

²³Ceng’ nica nwang’u Jusadukayo gibino i bang’e gi ju ma wacu ya cer umbe: man gipenje,

²⁴giwacu kumae, Japonji, Musa wacu kumae, Tek ng’atu acel utho, ma nyithindho pare mbe, umin mire bigamu dhaku pare, man ebinyayu kodhi ni umin.

²⁵Nwang’u umego abiro nuti kudwa: ma kwong’ane gamu dhaku, man etho, man kum kodhi mbe eweko cege ni umin mire;

²⁶mir arionde de kumeca, ku mir adege, cil kum mir abirone de.

²⁷Yo ng’eigi ceke de, dhaku tho.

²⁸Ka kumeno i cer ebidong’ bedo ci ng’a ku kind juabiro? kum kagi ceke gibedo kude.

²⁹Ento Yesu loko lembe ewacu igi kumae, Wukier, ma wung’eyo ko lembagora pa Mungu ngo, kadok tego pa Mungu de ngo.

³⁰Kum i cer gibigambri ngo, kadi jumio de ngo ya jugam, ento gibedo calu malaika m’i polo.

³¹Ento pi cer mi ju m’utho, fodi wusomo maeno ngo ma Mungu yero iwu, m’ewacu kumae,

³²An a Mungu pa Ibrahim, Mungu pa Isak de, man Mungu pa Yakobo? Mungu en e Mungu mi ju m’utho ngo, endre mi ju ma kwo.

³³E kan udul dhanu giwinjo maeni, igi wang’ lii kum ponji pare.

³⁴Ento Jufarisayo, ka giwinjo nia eketho Jusadukayo giling’, gicokri karacelo gigi.

³⁵E ng’atu acel m’i kindgi, ma en e jaeuthecik, epenje ku penji, emulo ko ie kumae:

³⁶Japonji, lembang’ola makani ma dit i ciki?

³⁷Man ewacu ire kumae, Mar Rwoth Mungu peri kud adundeni ceke, ku ng’eyong’ec de ceke, man ku pidoii ceke.

³⁸Maeni en e lembang’ola ma dwong’ ku ma kwong’a de.

³⁹Man mir arionde ma calkude e eni, Mar wedu calu in giri.

⁴⁰Wi lembang’ola ario maeni cik kpo, ku jubila de lwobre i kume.

⁴¹Nie ka Jufarisayo gicokri karacelo, Yesu penjogi ku penji,

⁴²ewacu kumae, Iwu pido nik ang’o pi Kristu? e wod ng’a? Giwacu ire kumae, E wod Daudi.

⁴³Ewacu igi kumae, Ka kumeno nedi Daudi lwong’e Rwoth i Tipo, m’ewacu kumae,

⁴⁴Rwoth uwacu ni Rwoth para, Jany yo ku cinga ma yor acwic, Maram aketh ko jukwoji the tiendi?

⁴⁵Ka kumeno tek Daudi lwong’e Rwoth, e kan edong’ ebedo wode nenedi?

⁴⁶E ng’atu moko mbe ma copo dwoko wang’ lembe ire, kadok ng’atu moko ma cwinye tek kum penje ku penji moko mange de mbe ugambre i ceng’ maeca.