Read Alur Matayo 24 Bible Online

Matayo 24 - Alur bible

Matayo 24

¹E Yesu ai woko ku i hekalu, ebecidho de i yo pare; man julubne gibino i bang’e ninyutho ire gom mi hekalu.

²Ento eloko lembe ewacu igi kumae, Wuneno gin maeni ceke ngo? andha awacu iwu kumae, Jubiweko kidi acel de ngo keni wi wagi ma jukubibolo piny ungo.

³Kan ebedo de wi got Zeituni, julub gibino i bang’e nyalwe, giwacu kumae, Wac iwa, gin maeni bitimbre awene? man giranyutha mi bino peri en e ang’o, ku mi kajik mi ng’omi?

⁴Man Yesu loko lembe ewacu igi kumae, Wukuru kara ng’atu moko kud uwingwu.

⁵Kum dupa bibino i nyinga, ma gibiwacu kumae, An a Kristu; man gibiwingo dhanu dupa.

⁶Man wubiwinjo pir ali ku rwong ali de; wunen nia cwinywu kud ung’abre: kum gin maeni bikotimbre be; ento nwang’u kajikne fodi.

⁷Kum thek bijai kum thek, ker de ni ker; ndru de bipodho ku digidi i ka ma nge nge.

⁸Ento gin maeni ceke en e landu wi can.

⁹E gibilund miowu ni masendi, man gibinegowu: thek ceke de bidaguwu kum nyinga.

¹⁰Dhanu dupa de bilund kier, gibimiri de, man gibidagri.

¹¹Jubila mi ndra de dupa gibiwok, man gibiwingo dupa.

¹²Kum camuco de bimedre, mer mi dhanu dupa de bidoko ng’ic.

¹³Ento ng’atu ma biciro cil i kajikne, ng’atuno biboth.

¹⁴Man lembanyong’a maeni mi ker jubiyero i ng’om ngung’ ni lembatuca ni thek ceke; e kajik bilund wok.

¹⁵Ka kumeno ka wuneno gin mir adegi mi nyoth, ma yang’ Daniel wacu pire, ucungo i kamaleng’ (wek ng’atu m’usomo ung’ei),

¹⁶wuwek ju ma gini i Yahudi gilund giring ba got:

¹⁷dong’ ng’atu ma ni wi ot de kud elor piny ni wodho jamb ot pare:

¹⁸ng’atu ma ni i podho de dong’ kud edwog nigamu kendi pare.

¹⁹Ento can ni ju ma igi nuti ku ju ma ketho judhoth i ceng’ maeno!

²⁰Wurwo de ya ringong’wec mu kud ubed i nindo mi koyo, kadok ceng’ sabatu:

²¹kum i nindo maeno masendi ma dit bibedo nuti, ma wagi maeno fokuwok ungo ugambre i thekri mi ng’om cil ku kawono de, ungo, kadi cil rondo ku rondo de biwok ungo.

²²Man tek jukujwigo ceng’ maeno ngo, kuno di kum moko mbe m’ubin uboth: ento ni ju ma yang’ jugoyo nying’gi re ceng’ nino jubijwigo.

²³I nindo maeno tek ng’atu moko biwacu iwu kumae, Nen, Kristu nuti keni, kadi, Kae; kud wuyi.

²⁴Kum ju ma gi Kristu mi ndra gibiwok, man jubila mi ndra de, man gibinyutho giranyutha ma dit ku musana; kara giwing ko cil ju ma jugoyo wigi de, tek ecopre.

²⁵Nen, alar ayero iwu.

²⁶Ka kumeno tek giwacu iwu kumae, Nen, eni i langa; kud wuwok woko: Nen, eni i kusika; kud wuyi.

²⁷Kum calu lukoth uai yo nyangu, junene de cil yo reto; e bino pa Wod dhanu de bibedo kumeca.

²⁸Ka ma tek avu ni i ie acuth bicokri karacelo kakeca.

²⁹Ento ndhu ndhu yo ng’ei masendi mi ceng’ maeno ceng’ bidoko col, dwi de birieny ungo, cero de bioi kud i polo, tego mi polo de biyengre;

³⁰e giranyutha pa Wod dhanu bilund wok i polo: e can bilund nego suru ceke m’i ng’om, man gibineno Wod dhanu bebino wi afuru m’i polo ku tego ku dwong’ ma dit de.

³¹Man ebioro malaika pare ku dwand agwara ma dit, e gibicoko ju ma jugoyo nying’gi karacelo kud i the yamu ang’wen, kud i tung polo kun ku kun de.

³²Nie wuponj ng’eyo lembabola ni kum ulam: kinde ma jange doko yom, elodho ithe de, wung’eyo ya cwir ni ceng’ni;

³³cil wun bende kumeno, ka wuneno gin maeno ceke, wung’ei ya eni ceng’ni, cil dhugola.

³⁴Andha ayero iwu kumae, Dhanum’utuk maeni bikadhu woko ngo, ma fodi gin maeni ceke kutimbre kakare ngo.

³⁵Polo ku ng’om bikadhu woko, ento lembe para bikadhu woko ngo.

³⁶Ento ceng’ nino ku saane de ng’atu moko mbe m’ung’eyo pire, cil ku malaika m’i polo de, kadok Wod, ento Wego kende.

³⁷Man ke calu yang’ ceng’ pa Noa bedo, e bino pa Wod dhanu de bibedo kumeca.

³⁸Kum calu i ceng’ maeca ma fodi pi ma dit m’uumo ng’om kuwok ungo gibecamu gibemadhd de, gibegambri gibemio de ya jugam, cil i ceng’ ma Noa mondo ko i avur,

³⁹e ging’eyo ngo maram pi ma dit m’uumo ng’om uwok ko, man eterogi ceke woko, e bino pa Wod dhanu bibedo kumeca.

⁴⁰I nindo maeno dhanu ario bibedo i podho; acel ugambre, acel ke dong’:

⁴¹mon ario de birego rego wi pom: acel ugambre, acel ke dong’.

⁴²Ka kumeno wuki: kum wung’eyo ngo ceng’ ma Rwoth mu bino i ie.

⁴³Ento wung’ei maeni, nia dok won ot ung’eyo ka kur ma jakwo bino i ie, kuno di ekuro, kuno di eyio ngo ya jutur ot pare.

⁴⁴Ka kumeno wun bende wubed ayika; kum Wod dhanu bino i saa ma wuwacu nyo ngo.

⁴⁵Ka kumeno ng’a ma jamiru mandha ma riek de, ma rwoth pare kethe wi juode, ya emi igi cemo migi i nindone?

⁴⁶Mugisa ni jamiru maeno, ma rwoth pare kan ebino binwang’u ebetimo kumeca.

⁴⁷Andha awacu iwu, ya ebikethe wi gin ceke m’ebedo ko.

⁴⁸Ento tek jamiru ma rac maeno biwacu i adundene kumae, Rwoth para galu:

⁴⁹man ebi maku fodo jutic wadi, man ebicamu ku madhu de karacelo ku ju ma mer:

⁵⁰e rwoth pa jamiru maeno bibino i ceng’ m’ewacu nyo ngo, i saa de m’eng’eyo ngo,

⁵¹man ebifode dit, ebiketho maka pare karacelo ku weg ambili: ywak ku kayu lak de bibedo nuti.