Read Alur Matayo 26 Bible Online

Matayo 26 - Alur bible

Matayo 26

¹Gini timbre de, ka Yesu daru lembe maeni ceke, ewacu ni julubne kumae,

²Wung’eyo nia yo ng’ei ceng’ ario kadhukuwijo bino, e jumio Wod dhanu ya jugure.

³Julam ma dongo ku judongo mi dhanu gilund gicokri karacelo, i pondot pa jalam ma dit, ma julwong’o Kayafa;

⁴man giporo lembe karacelo kara gimak Yesu ku rieko, ginege de.

⁵Ento giwacu kumae, I nindo mir agba re ngo, rop umaru moc i kind dhanu.

⁶Nie kan eni i Bethania, i ot pa Simon ma won joi,

⁷dhaku ma won cupa mi kidi ma tar ma ie ju mo ma pire tek apila, ebino i bang’e, ekonjo moje de i wie, nwang’u ebedo dhu cam.

⁸Ento ka julub gineno maeni, eton i igi, giwacu kumae, Edubo maeni mir ang’o?

⁹Kum mojuni copo loko jupiny dupa, man jumio ni jucan.

¹⁰Ento Yesu m’ung’eyo maeni ewacu igi kumae, Wunyayu can i dhaku maeni nedi? kum etimo tic ma dre i kuma.

¹¹Kum wubedo thiri thiri wuku jucan; ento an re wabedo wakudu thiri thiri ngo.

¹²Kum mo maeni m’ekonjo i kuma, maeni etimo m’eyika ko mi kuny.

¹³Andha awacu iwu kumae, Ka ma tek lembanyong’a maeni biyere i ie i ng’om yu, maeno bende ma dhaku maeno timo biyere ni poi ma jupoi ko pire.

¹⁴Ng’atu acel m’i kind juapar wi ario, ma julwong’o Yuda Iskariote, ulund ucidho ba julam ma dongo,

¹⁵man ewacu kumae, Wuyenyo ya wumi ang’o ira kan amie iwu? E giporo ire kum mola ma tar pier adek.

¹⁶Ugambre i nindo maeca eyenyo maram ecopo mie ko igi.

¹⁷Nie i ceng’ ma kwong’a mi kwen ma thobi mbe i ie julub gibino ba Yesu, giwacu kumae, Iyenyo wayik iri ka cemo mi kadhukuwijo kani?

¹⁸Man ewacu kumae, Wucidh i adhura ba ng’adi, man wuwac ire kumae, Japonji wacu kumae, Nindo para dhingo; abikwiro kadhukuwijo i ot peri waku julubna.

¹⁹Julub gitimo calu Yesu ng’olo igi; e giyiko kadhukuwijo.

²⁰Nwang’u ka piny udoko uthieno, ebedo dhu cam giku julub apar wi ario;

²¹ka gibecamu de, ewacu kumae, Andha awacu iwu, nia ng’atu acel m’i kindwu biciba.

²²E can umakugi dit apila, man gimaku wacu ire kubang’gi kubang’gi kumae, En e ani, Rwoth?

²³Eloko lembe de ewacu kumae, Ng’atu ma wagwio bwa wakude i tabu, ng’atuno e ma biciba.

²⁴Wod dhanu cidho, cil calu pire gore: ento can wi ng’atu ma Wod dhanu cibre ni kume! E ber ni ng’atuno tek junyole ngo.

²⁵Yuda de, m’ucibe, eloko lembe ewacu kumae, En e ani, Japonji? Ewacu ire kumae, Iwacu.

²⁶Ka gibecamu de, Yesu ting’o kwen, man emio mugisa i wie, eng’wenyo ie de; e emio ni julub, ewacu kumae, Wugam, wucam; maeni kuma.

²⁷Eting’o kikombe de, emio foc, emio igi de, ewacu kumae, Madhe kewu ceke;

²⁸kum maeni rimba mi lembariba, m’uthwogre pi dhanu dupa ni ruc mi dubo.

²⁹Ento awacu iwu kumae, Ugambre kawono abimadhu kum nying ulok maeni ngo, cil i ceng’ maeno kan amadhe m’e nyen i ker pa Vwa karacelo kudu.

³⁰E ka giwero wer, giwok woko gicidho wi got Zeituni.

³¹E Yesu lund uwacu igi kumae, Kewu ceke wubikier ni kuma i diewor maeni: kum egore kumae, Abigoyo jakwac, e rombe mir udul bilal mba.

³²Ento ku yo ng’ei cer para, abicidho i nyimwu i Galilaya.

³³Ento Petro loko lembe ewacu ire kumae, Kadok ceke bikier ni kumi, an re abikier ki ngo.

³⁴Yesu wacu ire kumae, Andha awacu iri, nia i diewor maeni, ka fodi kulok kukok ungo, ibikwera wang’ adek.

³⁵Petro wacu ire kumae, Kadok atho karacelo kudi ngi, abikweri ngo. Julub ceke bende giwacu kumeca.

³⁶Yesu gilund gibino gikugi i ka ma julwong’o Gethsemane man ewacu ni julubne kumae, Wubed keni, kinde m’aci rwo kuca.

³⁷Man ecidho ku Petro giku wot Zebedayo ario, e can umake cwinye de ng’abre sok.

³⁸Elund ewacu igi kumae, Can unego ng’eyong’ec para apila, cil ni tho: wukowubed keni, wakuru de wakudu.

³⁹Ecidho yor i wang’gi nyanok, epodho de i wang’e, erwo, ewacu kumae, Vwa, tek ecopre, wek kikombe maeni kadh woko kud i bang’a: ento, calu ayenyo an ungo, endre calu iyenyo in.

⁴⁰Ebino de ba julubne, man enwang’u gibenindo, man ewacu ni Petro kumae, Ei, wacopo kuro wakudu ngo saa aceli?

⁴¹Wukur wurwo de, kara kud wumond i abidhe: cwiny uyenyo andha, ento kum re bedo ng’ic.

⁴²Ecidho cen kendo mir arionde, erwo de, ewacu kumae, Vwa tek maeni copo kadhu woko ngo, tek amadhe ngo, dong’ etimbre kacwinyi.

⁴³Man ebino kendo, enwang’u gibenindo, kum wang’gi bedo pek.

⁴⁴E ewekogi kendo, man ecidho cen, erwo de mir adege, ewacu kendo lembe ma calacel.

⁴⁵Elund ebino ba julub, man ewacu igi kumae, Wunind asu kawono, wuyom mu: nen, saa ni ceng’ni, Wod dhanu de jucibe i cing’ judubo.

⁴⁶Wuai malu, wacidhu: nen, ng’atu m’uciba eni ceng’ni.

⁴⁷Kinde ma fodi ebeweco, nen, Yuda, ma ng’atu acel ma kind juapar wi ario, ubino kud udul dhanu ma dit ma gi weg palamularu ku dul de, ma giai ba julam ma dongo ku judongo mi dhanu.

⁴⁸Nwang’u ng’atu m’ucibe emio igi rieko, ewacu kumae, Ng’atu ma tek abicwio limbe, nwang’u en e en: wumake.

⁴⁹E ndhu ndhu nica ebino ba Yesu, man ewacu kumae, Moth iri, Japonji; e ecwio limbe.

⁵⁰Yesu wacu ire kumae, Jarimo, tim gin m’ibino pire. E gilund gibino giketho cing’gi kum Yesu, e gimake.

⁵¹Nen, ng’atu acel ma kind ju ma gibedo giku Yesugi erieyo cinge, ewodho palamularu pare, egoyo jamiru pa jalam ma jadit, man etong’o ithe woko.

⁵²Yesu lund uwacu ire kumae, Dwok palamularu peri kendo kakare: kum dhanu ceke m’umaku palamularu gibitho ku palamularu.

⁵³Kadi iwacu nyo acopo kwayu Vwa ngo, man ebioro ira cil kawono nini udul malaika ma sagu apar wi ario ngo.

⁵⁴Ka kumeno lembagora pa Mungu bilund timbre kakare nenedi, nia ekoebed kumeno be.

⁵⁵I saa nica Yesu wacu ni udul dhanu kumae, Wubino calu kum won ayeki ku palamularu ku dul de nimaku ko ani? Abedo ku ba rupiny i hekalu abedaponjo, di wumaka ngo do.

⁵⁶Ento lembe nini ceke timbre, kara lembagora mi jubila timbre kakare. Julub ceke gilund giweke, giringo.

⁵⁷Man ju ma gimaku Yesu gitere ba Kayafa ma jalam ma dit, ka ma jugorcik ku judongo gicokri ie karacelo.

⁵⁸Ento Petro lubo ng’eye ku cen, ba pondot pa jalam ma jadit, emondo de i ie, gibedo kud asikari, nineno kajikne.

⁵⁹Nwang’u julam ma dongo man dilo ngung’ giyenyo lembacuka kum Yesu, kara ginege;

⁶⁰e ginwang’e ngo, kadok jumulembe mi ndra gibino dupa. Ento macen juario gibino,

⁶¹giwacu kumae, Ng’atuni wacu kumae, Acopo nyotho hekalu pa Mungu, kan agome de ceng’ adek.

⁶²E jalam ma dit uai malu, ewacu ire kumae, Idwoko lembe moko ngo? girang’o ma joni benyutho piri?

⁶³Ento Yesu bedo pare ling’. Jalam ma dit de wacu ire kumae, Aketho ikwong’o ku Mungu ma kwo, ya iwac iwa tek in i Kristu, ma Wod Mungu.

⁶⁴Yesu wacu ire kumae, Iwacu: endre awacu iwu kumae, Ugambre kawono wubineno Wod dhanu ujany yo ku cing’ ma yor acwic mi Tego, kan ebebino de ku i afuru m’i polo.

⁶⁵Jalam ma dit ulund uyeco kendi pare, ewacu kumae, Eyero lembacidi kum Mungu: can jumulembe mange negowa nedi? nen, kawono wuwinjo lembacidi pare:

⁶⁶e iwu wacu nyo ang’o? Giloko lembe giwacu kumae, Eromo ku tho.

⁶⁷E gimaku ng’ulo lau i wang’e gipade de ku diecing’gi,

⁶⁸giwacu kumae, Cu iwa, in i Kristu: ng’a m’upedi?

⁶⁹Nwang’u Petro bedo woko i pondot: e nyaku bino i bang’e, ewacu kumae, In bende wubedo wuku Yesu ma Jagalilaya.

⁷⁰Ento ekwero i wang’gi ceke, ewacu kumae, Ang’eyo gin m’iwacu no ngo.

⁷¹Kan ecidho woko i pondot, nyaku mange nene, ewacu kumae de ni ju m’ubedo keca, Ng’atuni bende gibedo giku Yesu ma Nazareti.

⁷²Ekwero de kendo ku kwong’ kumae, Ang’eyo ng’atuno ngo.

⁷³Yo ng’eye nyanok ju ma gicungo gikugi giwacu ni Petro kumae, Andha in bende in i acel m’i kindgi; kum jung’ei ni wec peri.

⁷⁴Elund emaku yanyu ayany ku kwong’o kwong’ de, ewacu kumae, Ang’eyo ng’atuno ngo. E ndhu ndhu nica kulok ukok.

⁷⁵E Petro poi kum lembe ma Yesu wacu kumae, Ka fodi kulok kukok ungo, ibikwera wang’ adek. E ewok woko, eywak ku can ma apila.