Read Alur Matayo 4 Bible Online

Matayo 4 - Alur bible

Matayo 4

¹Tipo lund utelo wi Yesu malu i yamba kara wonabali mul ie.

²E kan eweko cam ceng’ pier ang’wen ku diewor de, yo ku ng’eye kec unege.

³Man jabidhe bino ewacu ire de kumae, Tek in i Wod Mungu, ng’ol nia kidi maeni dok ni kwen.

⁴Ento eloko lembe ewacu kumae, Egore kumae, Dhanu bibedo ni kum kwen kende ngo, ento ku lembe ceke m’uai dhu Mungu.

⁵Wonabali lund utere i adhura ma leng’; ekethe de wi usimbru hekalu,

⁶man ewacu ire kumae, Tek in i Wod Mungu, redhri piny: kum egore kumae, Ebing’olo ni malaika pare piri: man, Gibitheng’i malu i cing’gi, Kara tiendi kud ucwanjre kum kidi.

⁷Yesu wacu ire kumae, Egore kendo kumae, Kud imul i Rwoth Mungu peri.

⁸Kendo, wonabali tere malu wi got ma wiu hai, man enyutho ire ker ceke m’i ng’om, ku dwong’ne de;

⁹man ewacu ire kumae, Gin maeni ceke abimio iri, tek ibipodho piny irwo de i bang’a.

¹⁰Yesu lund uwacu ire kumae, Ai kakeni, Jok: kum egore kumae, Rwo ni Rwoth Mungu peri, man itim ire kende.

¹¹Wonabali lund uweke; man nen, malaika gibino gitimo ire.

¹²Nwang’u kan ewinjo nia jumaku Yohana, eai ecidho Galilaya;

¹³e kan eai Nazareti, ebino ebedo de Kapernaum, ma ni dhu nam, i kieu Zabulon ku Naftalim:

¹⁴kara lembe ma yang’ Isaya ma jabila yero timbre kakare, m’ewacu kumae,

¹⁵Ng’om Zabulon ku ng’om Naftalim, Yo ba nam, loka Yordan, Galilaya mi Thekdhanumange.

¹⁶Dhanu m’ubedo i mudho Gineno der ma dit, Man ni ju m’ubedo i ng’om ku tipo mi tho, Der udhenjre igi.

¹⁷Ugambre i nindo maeno Yesu kwong’o yero, man ewacu kumae Wulok cwinywu; kum ker mi polo ni ceng’ni.

¹⁸E kan ebewotho dhu nam Galilaya, eneno utumego ario, Simon ma julwong’o Petro, kud Andrea m’umin mire, m’ubebolo voi i nam; kum gi junam.

¹⁹Man ewacu igi kumae, Wulub ng’eya, abidwokowu ni junam mi dhanu.

²⁰E giweko voi ndhu ndhu nica, man gilube.

²¹E kan eai kakeca ecidho eneno utumego ario mange, Yakobo ma wod Zebedayo, ku Yohana m’umin mire, gini i yei ku Zebedayo ma weggi, gibeyiko voi migi; e elwong’ogi.

²²E ndhu ndhu nica giweko yei ku weggi de, man gilubo ng’eye.

²³E Yesu cidho i Galilaya ceke ndri ndri, ku ponjo i kacokri migi, ku yero lembanyong’a mi ker de, man ku keyo tho ceke m’unyang’ i kum ma kwonde tung’ tung’ ku tho mange ceke ma kwonde tung’ tung’ m’i kind dhanu.

²⁴E pire yik cil i Cami ceke: man gikelo dhanu ma kumgi lith ceke i bang’e, m’ubedo ku tho m’unyang’ i kum ma kwonde tung’ tung’ ku gin ma sendojo, ku weg pajogi, ku weg thimbu de, ku ju m’ubedo ku tho ma nego kum nding’; man ekeyo kumgi.

²⁵E udul dhanu ma dit gilubo ng’eye ma giai Galilaya man Dekapoli ku Yerusalem man Yahudi ku ma loka Yordan bende.