Read Alur Matayo 5 Bible Online

Matayo 5 - Alur bible

Matayo 5

¹E kan eneno udul dhanu, eidho malu wi got: kan ebedo piny de, julubne gibino i bang’e:

²ealu dhoge eponjogi de, ewacu kumae:

³Mugisa ni jucan mi tipo: kum ker m’i polo en e migi.

⁴Mugisa ni ju ma can unegogi: kum gibijukri.

⁵Mugisa ni ju m’ubedo mol: kum ng’om bidoko aba migi.

⁶Mugisa ni ju ma kec ku rieu de benegogi kum bedopwe: kum gibiyeng’.

⁷Mugisa ni ju ma kisa negogi: kum gibinwang’u kisa.

⁸Mugisa ni ju ma adundegi leng’: kum gibineno Mungu.

⁹Mugisa ni ju ma thego juwagi: kum jubilwong’ogi wot Mungu.

¹⁰Mugisa ni ju ma junyayu ragedo i kumgi kum bedopwe: kum ker m’i polo en e migi.

¹¹Mugisa iwu ka dhanu bicayuwu, man gibinyayu ragedo i kumwu, man gibiyero gin ma rac ma kwonde tung’ tung’ i kumwu ma en e ndra, ni kuma.

¹²Anyong’a negwu, ku mutoro ma dit de: kum sukulia mu e dit i polo: kum ginyayu ragedo kum jubila m’ular uwok iwu bende.

¹³Wun wu kadu m’i ng’om: ento tek kadu midone rwinyo, jubidwoko midone kud ang’o? e ber ungo kendo pi gin moko, ento pir aoya re junyone de ku tielo.

¹⁴Wun wu der m’i ng’om. Adhura ma juketho wi ungulu got pan dre ngo.

¹⁵Kadok thala jucwinyo ngo, ma nia jukethe the katoko, ento wi there re; erieny de ni dhanu ceke ma ni i ot.

¹⁶Cil kumeno wek der mu urieny i wang’ dhanu; kara ginen tic mu ma ber, giyung Wegwu de ma ni i polo.

¹⁷Kud wuwac nia nyo abino nyotho cik anyotha kadi jubila: abino nyotho anyotha ngo, endre niketho etimbre kakare.

¹⁸Kum awacu iwu andha kumae, Cil ma polo ku ng’om ukadhu woko, nyiguta acel kadi ng’et nyiguta acel de bikadhu woko ki ngo kud i cik, ma fodi gin ceke kutimbre kakare ngo.

¹⁹Ka kumeno ng’atu ma tek bikadhu ku wi cik acel ma nyathigi maeni, ebiponjo dhanu de kumeca, jubilwong’e nyathigi i ker m’i polo: ento ng’atu ma tek bitimo man ebiponjogi de, jubilwong’e dwong’ i ker m’i polo.

²⁰Kum awacu iwu, nia tek bedopwe mu sagu mi jugorcik ku Jufarisayo de ngo, wubimondo i ker m’i polo tak de ngo.

²¹Wuwinjo nia ewacre ni ju ma con kumae, Kud ineg nek; man ng’atu ma tek binego nek ebibedo ceng’ni lembapoka:

²²ento awacu iwu, nia ku ba dhanu nzu ng’atu ma tek ng’ecwiny binege kum umin ma there mbe ebibedo ceng’ni lembapoka; man ng’atu ma tek biwacu ni umin mire kumae, Raka, thelembene kumae, In ma kiti mbe e, ebibedo ceng’ni dilo; man ng’atu ma tek biwacu kumae, In i jakasegu, ebibedo ceng’ni gehena mi mac.

²³Ka kumeno tek ibethiero giramia peri dhu pemblam, ipoi kakeca nia lembe moko ni i umeru i kumi,

²⁴wek giramia peri keca wang’ pemblam, icidhi, wular wupot kindwu wukud umeru, e kan ilund ibin ithier giramia peri.

²⁵Rip kindwu ku jamon peri tho, kinde ma wuni kude i gengi; kara jamon peri kud umii ni japoklembe, japoklembe de mii ni asikari, man juboli i odkol.

²⁶Andha awacu iri kumae, Ibiai keca ki ngo, ma fodi k’iculo wang’ sente kubang’e pet ungo.

²⁷Wuwinjo nia yang’ ewacre kumae, Kud igier gier:

²⁸endre awacu iwu, nia ku ba dhanu nzu m’uneno dhaku kud awanya ma rac i kume nwang’u edaru giero gier kude ku yo i adunde.

²⁹Man tek weng’i ma yor acwic uketho ikier, wodhe woko, baye cen kud i kumi: kum en e kuloka iri nia wathkumi acel urwiny, man kumi dho re ma ku jubol i gehena.

³⁰Man tek cingi ma yor acwic uketho ikier, thume woko, baye cen de kud i kumi: kum en e kuloka iri nia wathkumi acel urwiny, kumi dho re ma ku jubol i gehena.

³¹E ewacre bende kumae, Ng’atu ma tek biriemo cege, wek emi ire waraga mi riem:

³²ento awacu iwu, nia ku ba dhanu nzu m’uriemo cege, ma k’erieme kum tarwang’ ungo, nwang’u edwoke ni won gier: man ng’atu ma tek bidong’ gome ma jukojurieme woko ca nwang’u egiero gier.

³³Kendo, wuwinjo nia yang’ ewacre ni dhanu ma con kumae, Kud ikwongri, ento itim kwong’ peri ni Rwoth:

³⁴ento awacu iwu kumae, Kud ikwong’ kwong’ ki; kadi ku polo, kum en e komker pa Mungu;

³⁵kadi ku ng’om, kum en e kom mi tiende; kadok Yerusalem, kum en e adhura p’Ubimo ma dwong’.

³⁶Kadok ku wii de kud ikwong’ kwong’, kum icopo ketho yukwii acel udok tar kadi col de ngo.

³⁷Ento wek wec mu bed kumae, Eyo, eyo; Ungo, ungo; man gin m’usagu maeni nwang’u en e pa ng’atu ma rac.

³⁸Wuwinjo nia yang’ ewacre kumae, Wang’ ndhu ku wang’, lak ke ndhu ku lak;

³⁹ento awacu iwu kumae, Kud wudhunj ni ng’atu ma rac: ento ng’atu ma tek upadu thengi ma yor acwic, lok ire ma yo kucel bende.

⁴⁰Man tek ng’atu moko yenyo eredh titi i wii, man ewodh simisi peri, wek ire jabia peri bende.

⁴¹Man ng’atu ma tek bicweli ya wucidh wukude ungolo acel, dong’ wucidh wukude ungolo ario.

⁴²Mi ni ng’atu m’ukwayu i beng’i, man, kud ilok ng’ei ni ng’atu m’uyenyo banja i beng’i.

⁴³Wuwinjo nia yang’ ewacre kumae, Mar wedu, dag jadegini:

⁴⁴endre awacu iwu kumae, Wumar judegiwu, wurwo de pi ju m’unyayu ragedo i kumwu;

⁴⁵kara wubed wot Wegwu ma ni i polo: kum eketho ceng’ pare dongo wi judubo ku jubero bende, man ekonjo koth wi ju ma pwe ku wi ju ma pwe ngo bende.

⁴⁶Kum tek wumaru ju m’umaruwu, sukulia mu ang’o? cil weg ajok gitimo kumeno ngo?

⁴⁷Man tek wumotho juwedwu kendgi, nwang’u wutimo ang’o ma sagu jumange? cil Thekdhanumange gitimo kumeno ngo?

⁴⁸Ka kumeno wubed ndhu cu, calu Wegwu ma ni i polo bedo ndhu cu.