Read Alur Matayo 6 Bible Online

Matayo 6 - Alur bible

Matayo 6

¹Wukuru ya kud wutim bedopwe mu i wang’ dhanu, kara ginengi: tek kumeno sukulia mu mbe ba Wegwu ma ni i polo.

²Ka kumeno kinde m’imio giramia kud ikudh agwara i weng’i, calu weg ambili timo i kacokri kud i gengi de, kara ginwang’ dwong’ ba dhanu. Awacu iwu andha kumae, Gidaru maku sukulia migi.

³Ento kan imio giramia, kud iwek cingi ma yor acam ung’ei gin ma cingi ma yor acwic ubetimo:

⁴kara mic m’imio bed nyaling’: man Wuru m’uneno ku ka ma nyaling’ ebimio sukulia iri.

⁵Man ka wurwo kud wubed calu weg ambili: kum gimaru rwo ma gicungo ko i kacokri ku i akarayo de, kara dhanu nengi. Awacu iwu andha kumae, Gidaru maku sukulia migi.

⁶Ento in, kan irwo, mond i kusika peri, e kan iciko dhugola i wii, irwo ni Wuru ma eni i ka ma nyalwe, Wuru de m’uneno ku ka ma nyalwe ebimio sukulia iri.

⁷Kan iberwo de kud iyer lembe acel wang’ udul kpa mananu, calu Thekdhanumange timo: kum giwacu nyo dwandgi biwinjre kum wec migi ma dit.

⁸Ka kumeno kud wubed calu jono: kum Wegwu ng’eyo gin ma cande benegowu, ma fodi wukupenje ngo.

⁹Ka kumeno wurwo kumae, Wegwa ma ni i polo, Nyingi bed leng’.

¹⁰Ker peri bin, Yeny m’iyenyo utimbre i ng’om calu etimbre i polo.

¹¹Mi iwa tin kwen mwa ma ku ba rupiny.

¹²Wek iwa banja mwa, calu wan bende waweko mi jubanja mwa.

¹³Kud iterwa i abidhe, ento ilarwa ni ng’atu ma rac.

¹⁴Kum tek wuweko kier mi dhanu, Wegwu ma ni i polo biweko mu bende.

¹⁵Ento tek wuweko kier mi dhanu ngo, kadok Wegwu de biweko kier mu ngo.

¹⁶Mange ke ka wuweko cam, kud wubed, calu dhanu ma weg ambili, ku weng’wu mi can: kum giranju wang’gi, kara dhanu ginen nia giweko cam. Andha awacu iwu kumae, Gidaru maku sukulia migi.

¹⁷Ento in, kan iweko cam, wir wi, man ilog weng’i;

¹⁸kara wekocam peri kud unen ni dhanu, ento ni Wuru ma ni i ka ma nyalwe: e Wuru, m’uneno ku ka ma nyalwe, ebimio sukulia iri.

¹⁹Kud wukan piny m’akana mu i ng’om, ka m’ukoko ku munyali de gicamu i ie, ka ma jukwo gituro i ie gikwalu ko:

²⁰ento wukan piny m’akana mu i polo ka m’ukoko kadi munyali de gicamu i ie ngo, ka ma jukwo de gituro i ie ngo kadi gikwalu de ngo:

²¹kum ka ma piny peri m’akana ni i ie, adundeni bende bibedo keca.

²²Thala mi kum en e nyingwang’: ka kumeno tek nying weng’i cungo acel, kumi ceke bicare ku der.

²³Ento tek nying weng’i bedo rac, kumi ceke bicido ku mudho. Ka kumeno tek der ma ni ii bedo mudho, meca mudho sagre dit apila!

²⁴Ng’atu moko mbe ma copo timo ni judongo ario: kum ebidagu acel, ebidong’ maru mucelo; kadi ebimoko bang’ acel, man ebicayu mucelo. Wucopo timo ni Mungu ku ni lonyo de ngo.

²⁵Ka kumeno awacu iwu kumae, Cwinywu kud uring pi kwo mu, nia girang’o ma wubicamu, kadi girang’o ma wubimadhu; kadok pi kumwu, nia girang’o ma wubikendo. Kwo sagu cam ungo, kum de sagu kendi ngo?

²⁶Wunen winyo m’i lietho, ya gicoyo ngo, kadok akaya de gikayu ngo, gicoko i dero de ngo; e Wegwu ma ni i polo kakugi ku cam. Wun wusagugi hai ngo?

²⁷Ng’a ma i kindwu de ma tek cwinye ringo copo medo bot acel ni kadongo pare?

²⁸Cwinywu beringo nedi kum kendi? Dong’ iwu pid pi thiuboko m’i thim, maram gidongo ko; gitimo tic ungo, kadok acwia de gicwio ngo:

²⁹ento awacu iwu, nia cil Suleman i dwong’ pare ceke eronjre calkud acel mi maeni de ngo.

³⁰Ento tek Mungu ronyo lum m’i thim kumeno, ma nuti tin, man urwo de jubaye i mac, e ebironyowu ma sagu dit ungo, E wun ma yioyic mu noki?

³¹Ka kumeno cwinywu kud uringi, ma nia wuwac kumae, Wabicamu ang’o? kadi, Wabimadhu ang’o? kadi, Jubironyowa kud ang’o?

³²Kum gin maeni ceke Thekdhanumange giyenyo; kum Wegwu ma ni i polo ng’eyo nia can gin maeni ceke benegowu.

³³Ento ma kwong’a wuyeny ker pare, ku bedopwe pare; man gin maeni ceke bimedre iwu.

³⁴Ka kumeno cwinywu kud uring pir urwo: kum urwo biringo ku cwinye gire. Dubo ma tin uromo ku tin.