Read Alur Matayo 7 Bible Online

Matayo 7 - Alur bible

Matayo 7

¹Kud wupok lembe, kara ku jupok lembe mu.

²Kum ku lembapoka ma wupoko, jubipoko ko lembe mu: man ku mukero ma wuporo ko, jubiporo ko iwu bende.

³Man ineno nyathi ng’ili m’i wang’ umeru nedi, endre ii pido pi riu ma ni i weng’i giri ngo?

⁴Kadi ibiwacu nenedi ni umeru kumae, Wek akab ng’ili woko kud i weng’i; man nen, riu ni i weng’i ini?

⁵In i won ambili, ilar ikab riu kud i weng’i in; e ibilund neno cu nikabu ng’iline kud i wang’ umeru.

⁶Gin ma leng’ kud wumi ni gwogi, kadok tigo mu de kud wubai wang’ kul, gimaru nyonogi the tiendgi, man gilokri giyecowu.

⁷Wukwai, man ebimire iwu; wuyeny, e wubinwang’u; wudwong’, e ebiyabre iwu:

⁸kum ku ba dhanu ma kwayu enwang’u; man ng’atu ma yenyo enyudo; ng’atu ma dwong’o de ebiyabre ire.

⁹Kadi ng’atu ma kani m’i kindwu, ma, tek wode bikwaye ku lungu kwen, ebimio ire kidi:

¹⁰kadi tek ekwaye ku rec, ebimio ire thwoli?

¹¹Ka kumeno tek wun, ma wu rac, wung’eyo mio giramia ma ber ni nyithindho mu, Wegwu ma ni i polo bimio gin ma ber ma sagu ngo ni ju m’ukwaye?

¹²Ka kumeno gin ceke ma tek wuyenyo ya dhanu gitim iwu, e wun wutim igi kumeca: kum maeni en e cik ku jabila.

¹³Wumond ku dhugang’ ma diny: kum dhugang’ ubedo lac, yo de bedo her, ma tundo kanyoth, gi dupa de ma gimondo i ie kud i yoje.

¹⁴Kum dhugang’ ubedo diny, yo de bedo likili, ma tundo i kwo, ju ma lam de e ma ginwang’e.

¹⁵Wukuru ni jubila mi ndra, m’ubino i beng’wu ku kendi mi rombe, ento ku yor i igi gin urudi m’uwor.

¹⁶Wubing’eyogi ku nying’gi. Dhanu gipono nying ulok ku kum ukudho, kadi nying ulam de kum ucoki?

¹⁷Kumeno ku ba yen ceke ma ber ecego nyinge ma ber; ento yen ma rac ecego nyinge ma rac.

¹⁸Yen ma ber copo cego nyinge ma rac ungo, kadok yen ma rac de copo cego nyinge ma ber ungo.

¹⁹Ku ba yen ceke ma cego nyinge ma ber ungo jung’ole piny, jubole de i mac.

²⁰Ka kumeno wubing’eyogi ni nying’gi.

²¹Ku ba dhanu nzu ma giwacu ira kumae, Rwoth, Rwoth, gibimondo i ker m’i polo ngo; ento ng’atu m’utimo yeny ma Vwa ma i polo yenyo re.

²²Dupa biwacu ira i ceng’ maeca kumae, Rwoth, Rwoth, waewo ku nyingi ngo, wawodho pajogi de ngo ku nyingi, man ke tic ma tek de dupa watimo ku nyingi ngo?

²³E abilund tuco igi kumae, Fodi ang’eyowu ki ngo: wuai kud i vuta, wu ju m’utimo camuco.

²⁴Ka kumeno ku ba dhanu ceke m’uwinjo lem para maeni, etimogi de, jubipore ku jarieko, m’ugomo ot pare wi cana:

²⁵koth de cwi, pi ma dit de coro ng’om, yamu de koto, e gidhongo ot maeno; ento epodho ngo: kum jugome wi cana.

²⁶Man ku ba dhanu ceke m’uwinjo lem para maeni, etimogi de ngo, jubipore ku jakasegu, m’ugomo ot pare wi kwio:

²⁷koth de cwi, pi de coro ng’om, yamu de koto, man gidhongo ot maeno; e erungre: rungrene de e dit.

²⁸Man etimbre ka Yesu daru lembe maeni, i udul dhanu wang’ lii kum ponji pare:

²⁹kum eponjogi calu ng’atu m’ubedo ku ng’ol, calu jugorcik migi de ngo.